Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja Bibliʼa: ¿jas rason yiʼojani?

 XETʼAN 10

Ja Salomoni jun mandaranum jel bibo

Ja Salomoni jun mandaranum jel bibo

Ja Jyobaji bibo lek wa xya wajuk ja Salomoni. Ja tyempo wan yajel mandari, ja israʼelenyoʼiki kulani lek skʼujol wa x-ajyi yeʼa sok jel lek xwajyujile

¿JASTAL oj ajyuk ja sakʼanil jun chonabʼ lek ja swinkili soka machʼ wa xyaʼa mandari wa snochowe ja Jyobaji sok kʼuʼabʼal wa x-ajyi ye sok? Ja sjakʼjel ja sjobʼjel it axi yi ja bʼa 40 jabʼil yaʼa mandar ja Salomoni.

Bʼajtanto oj chamuk, ja Davidi yala ja maʼ oj och kan jastal slokʼoli jani ja skerem Salomoni. Jun ekʼele, ja Dyosi yala yabʼ ja Salomoni bʼa jun wayichal a-skʼan ja jas wa skʼanaʼi. Ja Salomoni skʼana yi ja Dyosi ayaʼ yi sbiboʼil sok a-sjam yi ja s-olomi bʼa oj snaʼ jastal oj ya mandar toj ja ixuk winikeʼi. Ja Jyobaji jelni lek yabʼ ja jas skʼana ja Salomoni, ja yuj yaʼ yi ja jas skʼanaʼi. Chomajkil, ja Jyobaji yala yabʼi ta kʼuʼabʼal kʼa wa x-ajyi smok, ja yeʼn ojni yaʼ yi jitsan jastik sbʼaja, jel oj najuk sbʼaj ekʼe sok oj ajyuk sakʼan albʼel tyempo ja bʼa luʼumi.

Ja Salomoni jelni taji tiʼal bʼa tuktukil lugar yuja jel snaʼa jastal oj stojbʼes jun kʼumal. Jun kʼakʼujil, chabʼ ixuke kʼeye kʼumal yuj jun yal alats, ja juneʼi wa xyala yeʼn bʼi sbʼaj ja alatsi, pe, ja juni cha wa xyala yeʼn bʼi ja nanali. ¿Jastal oj stojbʼes ja tiro it ja Salomoni? ¡Yala a-stʼaj-e snalan ja yal alatsi sok ayawe yi snalantik ja ixuke jaw! Ja bʼajtan ixuki ochni akwerdoʼa, pe, ja juni miyuk sok yala ayawe yiʼ ja yal alatsi ja bʼajtan ixuki. Jachuk yila ja Salomoni ja mero nanali jani ja maʼ snaʼa yiʼ syajal ja yal alatsi. Yajni spetsanil ja israʼelenyoʼiki yabʼye jastal stojbʼes ja kʼumal it ja Salomoni, snaʼaweni ja sbiboʼil ja Dyosi tini ay smoka.

Ja templo x-ajlixta bʼa Jerusaleni, jani waj ja aʼtel jel tʼilan skʼulan ja Salomoni. Bʼa templo it tini mero oj yaʼteltaye ja Jyobaji ja israʼelenyoʼi. Yajni wan kʼintaxel ja temploʼi, ja Salomoni skʼulan jun orasyon: «¡Kʼela! Ja satkʼinali, jaʼi, ja satkʼinal jumasaʼ, anke jel niwan mini malanuk abʼaja; ¡jaʼukto maʼ, ja naʼits it jkʼulunejawiʼi!» (1 Reyes 8:27).

Ja Salomoni kʼotni tajuk tiʼal bʼa najtik lugar, jastal Seba, bʼa Arabia. Ja maʼ wa xyaʼa mandar bʼa Seba, jun ixuk, jak man bʼa Israel bʼa oj skʼel sok sat yeʼna ja jastik yiʼoj ja Salomoni, sok bʼa oj yil ta bibo meran. Ja ixuk it kani jakʼan yuj ja sbiboʼil ja Salomoni sok yuja yila jel lek xwajyujile ja israʼelenyoʼiki. Ja ixuki stoyoni ja Jyobaji yuj ja yaʼunej och mandaranumil jun winik jel bibo. Soka slekilal skʼujol ja Dyosi, kechantani ja bʼa yojol ja smandar ja Salomoni ja israʼelenyoʼiki jel lek wajyujile sok lamani lek ajyi ja sakʼanileʼa.

Ajulasbʼaj ni yaljel, pe, ja Salomoni mini yaʼ kan ja sbiboʼil ja Dyosi atojuk yuj tolabida ja bʼa sakʼanili. Ja Salomoni wani snaʼa ja Dyosi yalunej ja mandaranumiki mok sle jitsan xcheʼume, pe, ja yeʼn sbʼatani ja mandar jaʼwa, pes jitsani lek ixuk yiʼaja. ¿Yaʼtum maʼ Dyos ja matik yiʼaji? Miyuk, jitsan ja bʼa ixuke jaw wa xyaʼteltaye kʼulubʼal dyos. Takal takal ja xcheʼumiki yawe jitsuk el bʼa stsʼeʼel ja Jyobaji sok skʼumbʼese yiʼ ja skʼujoli bʼa oj yaʼteltay kʼulubʼal dyos. Ja yuj, ja Jyobaji yala yabʼ ja Salomoni ja spamilya oj xchʼay jun niwan penka ja luʼum bʼa wa xyaʼawe mandari. Yuja mi oj chʼak xchʼay-e el spetsanili ja yuj ja trato skʼulan ja Jyobaji sok ja stat ja Salomoni, ja Davidi. Ama ja Solomoni yaʼ kanyiʼ spatik ja Dyosi, ja Jyobaji mini skʼutsu ja trato yaʼunej kulan sok ja Davidi.

(Akʼubʼal eluk bʼa 1 Reyes skapituloʼil 1 man 11, bʼa 2 Crónicas skapituloʼil 1 man 9 sok Deuteronomio 17:17.)