¿Ay maʼ bʼa wa kʼumanta ja Bibliʼaʼi? Ja juʼun it kechantani jaʼa jel pilubʼal bʼa spetsanil ja sakʼaniltiki. Man najate sok man bʼa jkʼakʼujiltik ixuk winik bʼa tuktukil kʼumal sok yelaw staʼunej skoltajele sok slamanil skʼujole ja bʼa jas wa xyalaʼi, sok ja lekilik rason yiʼojani jelni makunel ja bʼa sakʼanileʼi. Pe, ja weʼgo aytoni jitsan ixuk winik mi snaʼawe lek ja jas wa xyala ja Bibliʼa. Ama ja weʼn aya relijyon ma miyuk, bʼobʼta wani xkʼana naʼ mas ja bʼa Bibliʼaʼi. Ja juʼun it kʼulubʼal bʼa oj yaʼa naʼ ja jastik junuk tʼilan sbʼaj ja Bibliʼa.

BʼAJTANTO oj kʼeʼa yam skʼumajel ja Bibliʼaʼi, lekni oja naʼ jujuntik jas junuk. Ja Bibliʼa cha wa x-aji sbʼiʼiluk Yabʼal Dyos. Ja bʼa yojoli tsomubʼal 66 juʼun. Ja juʼun wa xkʼe soki sbʼiʼil Génesis, jaxa wa xchʼak soki sbʼiʼil Apocalipsis ma Ja swayichi.

¿Maʼ spensar tsʼijbʼunubʼal ja bʼa Bibliʼa? ¿Ay maʼ bʼa wa jobʼota abʼaja? Ja juʼunik yiʼojan ja Bibliʼa stsʼijbʼane jun 40 winike bʼa jun tyempo bʼa 1,600 jabʼil. Tʼilani yaljel yuj ja mini june ja bʼa winike jaw yala yeʼn bʼa s-olom ya eluk ja jas stsʼijbʼani. June ja bʼa yeʼnleʼi yala: «Spetsanil ja Yabʼal ja Dyosi, Dyos ni ya jak skʼujol ja maʼ stsʼijbʼan kani» (2 Timoteo 3:16, YT). Cha june yala jachuk: «Ja yip ja Jyobaji yeʼnani ya makunuk ja jtiʼi, soka jas oj yali tini ajyi bʼa kakʼ» (2 Samuel 23:2). Ja matik stsʼijbʼani yalawe yeʼn ja Jyobaji, ja niwan Mandaranum bʼa satkʼinali, ja maʼ spensar tsʼijbʼunubʼal bʼa yojol ja Bibliʼa. Ja bʼa jas tsʼijbʼunubʼal kani wa sjeʼa ja Dyosi yakitik ja Bibliʼa bʼa oj jnatik sbʼaj.

Aytoni jun jas junuk tʼilan oja naʼ bʼa oja wabʼ stojolil ja Bibliʼa. Ja Bibliʼa ayni yiʼoj jun yolomajel, jaʼa it: ja Dyosi ojni ya kulan jun gobyerno bʼa satkʼinal bʼa jachuk oj kisjuk ja xchol yiʼoji bʼa kechanta yeʼn oj yaʼotik mandar. Oja wil och bʼa yojol ja juʼun it, jastal ja yolomajel ja Bibliʼa wa statalan sbʼaj oche, man bʼa sjuʼunil Génesis sok man bʼa sjuʼunil Apocalipsis.

Wa xlokowatikon oja wa tʼabʼan wa kʼujol ja it yajni xkʼeʼa paklay ja rason yiʼojan ja juʼun jel tʼilan bʼa spetsanil ja luʼumi, ja Bibliʼa.

^ par. 9 Ay tuktukil modo bʼa yaljel ja tyempo it. Pe, ja bʼa juʼun iti oj katik makunuk ja bʼ.j. 1 wa stojolan «bʼajtanto bʼa jabʼil 1». Jaxa bʼa tuk tyempoʼi kechanta oj chiknajuk och ja jabʼili. Bʼa yibʼel jujune slam ja juʼun iti tiʼ oj chiknajuk och ja tyempoʼik jaw.