Kaʼax ja bʼa sbʼaʼal

Kaʼax ja bʼa sbʼaʼali

Taʼumantiʼik bʼa Jyoba

Stsajel jun kʼumal tojol-abʼal

 LOʼIL 102

Wa sakʼwi ja Jesusi

Wa sakʼwi ja Jesusi

¿WAXA naʼa machunkiluk ja ixuk soka chabʼ winik bʼa dibujo? Ja ixuki jaʼa María Magdalena, jun snebʼuman ja Jesús. Jaxa chabʼ winik sakal spalkʼuʼeʼi anjelik. Ja María wan skʼeljel ja yojol ja kʼeʼen bʼa aji ja skwerpo ja Jesusi, ¡pe ja skwerpoʼi mixa teyuk! ¿Bʼa waja? La kiltik.

Tsaʼan yajni cham ja Jesús, ja olomaliki yalawe yabʼ ja Pilato: «Ja meto xchami, ja Jesús yala ojbʼi sakʼwuk jan ja bʼa yoxil kʼakʼu. Ja yuj, jeka matik oj waj stalnay ja kʼeʼeni. Jachuk ja snebʼumaniki mi oj bʼobʼ ya eluke ja skwerpo sok mi oj bʼobʼ yal-e sakʼwita». Ja Pilato yala yabʼ ja olomaliki a-sjeke kʼakʼanumik bʼa oj stalnaye ja kʼeʼeni.

Sajto lek ja bʼa yoxil kʼakʼu chamel ja Jesús, junta chʼaykʼujol sjeʼa sbʼaj jun anjel bʼa Jyoba. Sbʼaltsun och ja ton makubʼal soka kʼeʼeni. Ja kʼakʼanumiki mixa xbʼobʼ nijkuke yuja xiweli. Yajni skʼelawe ja bʼa yojol ja kʼeʼeni, ¡mixa ni teyuk ja skwerpo ja Jesusi! Jujuntik ja kʼakʼanumiki wajye ja bʼa chonabʼi sok yalawe yabʼ ja olomaliki. ¿Wan maʼ xa naʼa jas skʼulane ja tantik olomaliki? Stupuwe ja kʼakʼanumiki bʼa ayal-e abʼal. Ja olomaliki yalawe: «Alawik ja snebʼumaniki yawe eluk ja skwerpo yajni ja weʼnlex wanex wayeli».

Yajni wan ekʼel ja it, jujuntik yamigaʼik ja Jesús wajye bʼa kʼeʼeni. ¡Ja bʼa yojoli mixa ni teyuk ja kwerpoʼali! Sok junta chʼaykʼujol, chabʼ anjelik sok spalkʼuʼe xlijpixta ti aye tiw. Sjobʼowe: «¿Jas yuj ti wanex sleʼjel il ja Jesusi? Ja yeʼn sakʼwita. Kaʼaxik sok kax alawik yabʼye ja snebʼumaniki». Ja ixukeʼi weʼgoxta ni wajye. Pe ja bʼa bʼeji staʼawe jun winik sok aji kʼotuke tekʼan. ¡Yeʼna Jesús! Yala: «Kaʼaxik sok alawik yabʼ ja jnebʼumaniki».

Yajni ja ixukeʼi yalawe yabʼ ja snebʼumanik ja Jesús sakʼan ay sok yilaweta kani, ja yeʼnle mini xkʼan skʼuʼuke leka. ¡Ja Pedro soka Juan weʼgo wajye ja bʼa kʼeʼen, pe mixa ni teyuk ja Jesusi! Yajni ja yeʼnle wajye, ja María Magdalena kan patikajel. Anto ti skʼela ja bʼa yojol ja kʼeʼeni sok yila chabʼ anjel.

¿Wan maʼ xa naʼa jas ekʼ soka skwerpo ja Jesusi? Yeʼna Dyos ja skʼulan achʼay ele. Ja Dyos mi ya sakʼwuk jan ja Jesús sok jun skwerpo jastal yiʼoj ajyi, yaʼ yi jun skwerpo jastal Yeʼna, jastal ja bʼa anjeliki. Pe bʼa oj skʼuʼuk ja snebʼumaniki ja yeʼn meran sakʼan ay, ja Jesús sjeʼa sbʼaj sok jun skwerpo bʼa jastal keʼntik.

Mateo 27:62-66; 28:1-15; Lucas 24:1-12; Juan 20:1-12.