Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 95

Ja jastal wa sjeʼa ja Jesús

Ja jastal wa sjeʼa ja Jesús

JUN kʼakʼu, ja Jesús yala yabʼ jun winik tʼilani oj syajtay ja smoji. Ja winiki sjobʼo: «¿Machunkʼa ja meran jmoji?». Jesús wani snaʼa jasa wan spensarajel ja winiki. Ja winiki wa spensaraʼan ja matik meran smoj oj syajta yi jaʼita maʼ junxta yelawsoki sok junxta srelijyoni. Ja yuj, la kiltik jastal xcholo yabʼ ja Jesús.

Ayni ekʼele ja Jesús, yajni wa sjeʼa, wa xyala sok jun loʼil sok jani it ja jasa skʼulani. Xcholo jun loʼil bʼa jun winik judío sok jun winik bʼa Samaria. Jnebʼunejtik xa sbʼaja judíoʼiki: tʼusan mi spetsaniluke mini lek xyilawe ja swinkil Samaria. ¿Jasa kʼe yal ja weʼgo ja Jesusi?

Jun kʼakʼu, jun winik judío koʼumkoʼ bʼa bʼej man Jericó. Pe jujuntik elkʼanum sjapawe yi ja jastik sbʼaji, ja stakʼini sok kal sakʼan yaʼawekan.

Tsaʼan jun judío, olomal wa x-aʼtiji bʼa templo, koʼumkoʼ ja bʼa bʼeji sok ti yila ja winik yajbʼesnubʼali. ¿Wan maʼ xa naʼa jasa skʼulani? Pes kechani sjoybʼankan sok yiʼaj ja sbʼeji. Anto pilan winik wa xyaʼteltay Dyos, jun levita, ti cha ekʼumkoʼa. ¿Kʼot maʼ tekʼan ja yeʼn bʼa oj skoltay ja winiki? Miyuk, mini kʼot tekʼana. Wa xbʼobʼ awil ja bʼa dibujo ja olomal bʼa templo soka levita ekʼyeta koʼ ja bʼay ja winik yajbʼesnubʼali.

Pe kʼela maʼ teysok ja winik yajbʼesnubʼali, jun winik bʼa Samaria sok wan skoltajel ja winik judío. Ja yeʼn och yajnay sok sbʼechʼa yi ja syajbʼeli. Tsaʼan yiʼaj och bʼa jun lugar bʼa oj jijluk sok oj tojbʼuk.

Yajni ja Jesús chʼak xchol ja loʼili, sjobʼo yi ja winik maʼ ajiyiyuj sjobʼjeli: «Anto, ¿machunkiluk ja bʼa oxwane it yila jastal smoj-aljel ja maʼ yajbʼesnubʼali? ¿Ja maʼ ja olomal bʼa templo, ja levita ma jaʼ winik bʼa Samaria?».

Ja winiki sjakʼa: «Jaʼa winik bʼa Samaria, ja yeʼn snaʼani syajulal ja winik yajbʼesnubʼali».

Jesús yala: «Jachʼni jastal waxa wala. Ja yuj, kaʼax sok kʼulan yi ja weʼn ja tuki jastal ni skʼulan ja winik bʼa Samaria».

¿Mi maʼ jel lek xa wila jastal wa sjeʼa ja Jesús? Ja keʼntiki wa xbʼobʼ jnebʼtik jitsan jastik junuk jel tʼilan ta wa xmaklaytik ja Jesús ja bʼa jas wa xyala ja Biblia, ¿anke meran?

Lucas 10:25-37.