Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 48

Ja jas skʼulan ja swinkil Gabaón

Ja jas skʼulan ja swinkil Gabaón

JITSAN chonabʼ ja bʼa slujmalil Canaán wa xchapa sbʼaje bʼa oj tiroʼanuke sok ja israʼelenyo. Ja yeʼnle wa spensaraʼane oj skʼuluke ganar. Pe ja swinkil ja chonabʼ Gabaón mi wa spensaraʼane jachuk. Wani snaʼawe ja Dyos wan skoltajel ja israʼelenyo sok mi skʼanawe oj tiroʼanuke soka Dyosi. Ja yuj, ¿wan maʼ xa naʼa jas skʼulane?

Skʼulane lajan sok jakele bʼa jun najat lugar. Ja yuj jujuntik slapa skʼuʼe bʼa chʼiʼel xa sok xanabʼe bʼa poko xa. Yawe kʼeʼuk bʼa sbʼuruje koxtal kʼaʼelik xa sok yiʼawe och takin pan. Anto wajye ja bʼay ja Josué sok yalawe yabʼ: «Jakelotikon bʼa jun najat chonabʼ. Kabʼunejtikon sbʼaja Jyoba, wa niwan Dyosexi. Kabʼunejtikon yibʼanal ja jasa skʼulan bʼa weʼnlex yajni tito ayex bʼa Egipto. Ja yuj ja matik olomalkujtikoni yala oj jchaptikon waʼelal bʼa jun najat bʼejyel bʼa oj jak kaltikon awabʼyex: “Nake awaʼtijumotikon. Ja yuj aʼel bʼa wa tiʼex mi oj tiroʼanan jmoktikon”. Wa xbʼobʼ awil-ex ja jkʼutikoni jelxa chʼakel soka pani nake takin xa yuja najat bʼejyeli».

Josué soka tuk olomaliki skʼuʼane ja jas yalawe ja swinkil Gabaón. Ja yuj yalawe mi oj tiroʼanukesok. Pe oxe kʼakʼu tsaʼan kʼot snaʼe mini najatuk ja bʼa kulane ja swinkil Gabaoni.

Ja yuj ja Josué sjobʼo: «¿Jas yuj awalawex kabʼtikon jakelex bʼa jun najat chonabʼ?».

Ja swinkil Gabaón sjakʼawe: «Yujni aljikabʼtikon ja wa Dyosex, Jyoba, skʼapunej oj yawilex yibʼanal ja slujmalil Canaán. Ja yuj xiwtikon oja mil-otikonex». Pe ja israʼelenyo jachʼni skʼulane ja jasa elel bʼa stiʼeʼi, sok mini smilawe ja swinkil Gabaón. Ja yuj ya ochuke bʼa yaʼtijume.

Ja mandaranum bʼa Jerusalén jel tajki yuja swinkil Gabaón yaʼaweta slamanil soka israʼelenyo. Ja yuj yala yabʼ chane mandaranum: «Laʼik sok koltayonik bʼa oj tiroʼanukotik sok ja swinkil Gabaón». Jachʼni skʼulane ja joʼe mandaranum it. ¿Lek maʼ skʼulane ja swinkil Gabaón yuja yaʼawe slamanil soka israʼelenyo yajni ja joʼe mandaranumiki jakum tiroʼanuke soka israʼelenyo? La kiltik.

Josué 9:1-27; 10:1-5.