Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 46

Ja sbardaʼil ja Jericó

Ja sbardaʼil ja Jericó

¿JAS wan ekʼelsbʼaj ja wan jemelkon ja sbardaʼil ja Jericó? Jachʼ jastal jun niwan bomba bʼojtelsbʼaj. Pe ja bʼa tyempo jaw mitoni ayuk ja bombaʼik. ¡Cha pilan ekʼele jani ja yip ja Jyoba! La kiltik jastal ekʼi.

Maklay ja jas yala Jyoba oj skʼuluk ja Josué: «Ja weʼn soka wa kʼakʼanum jumasaʼ bʼejtayik sjoyanal ja chonabʼi. Bʼejtayik sjoyanal jun ekʼele ja kʼakʼu, kʼulanik jachuk bʼa wake kʼakʼu sok iʼawik ekʼ ja kopre bʼa trato. Tʼilan juke olomalik awajuke bʼajtan yuja kopre sok a-sjuʼe ja skachoʼe.

Ja bʼa sjukil kʼakʼuʼi a-sbʼejtaye ja chonabʼ juke ekʼele. Anto juʼuwik ja wa kachoʼex tsats lek, sok awik yi juna awanelex bʼa kʼakʼanel. ¡Sok ja sbardaʼil ja chonabʼi oj jemkon!».

Josué soka kʼakʼanumiki jachʼni skʼulane ja jastal yala Jyoba. Malan wane sbʼejtajel, nake chʼabʼan aye. Kechanta wa x-abʼxi ja yokʼelal ja kachoʼik sok ja sbʼejyeleʼi. Ja kontraʼanumik bʼa Jericó jelni ma wane xiwel. ¿Wan maʼ xbʼobʼ awil ja chakal laso lokan ekʼ ja bʼa bentana? ¿Maʼ snaj ja jaw? Ja bʼa Rahabi; ja yeʼn skʼulunej ja jasa alubʼal yabʼ yuja chabʼ tsʼelsatinumi. Spetsanil ja spamilya stsomunej bʼa yojol snaj, sok wane smajlajel ja jasa oj ekʼuki.

Ja bʼa sjukil xa kʼakʼu, yajni ja kʼakʼanumiki chʼak sbʼejtaye juke ekʼele sjoyanal ja chonabʼi, yawe okʼuk ja kachoʼiki, awaniye, sok ja bardaʼik kʼe jemuk. Josué yala: «Milawik ja ixuk winikeʼi, tsikawik ja chonabʼi soka sbʼaʼali; kechan ja plata, oro, kobre soka hierro ti oj chʼak waj axuk bʼa tabernáculo».

Josué yala yabʼ ja chabʼ tsʼelsatinumi: «Awik eluk ja Rahab sok spetsanil ja spamilya». Ja yeʼnleʼi kanyeni sakʼan, jastal ni alubʼal yabʼye yuja tsʼelsatinumeʼi.

Josué 6:1-25.