Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 40

Moisés wa spakʼtsun ja patakʼ toni

Moisés wa spakʼtsun ja patakʼ toni

¡EKʼTA 39 jabʼil, sok ja israʼelenyo titoni aye ja bʼa takin luʼumi! Spetsanil ja jabʼil jumasaʼ it ja Jyoba wani stalna ja xchonabʼi. Wa smakʼla sok maná. Ja bʼa satkʼakʼu wa xtojiye yuj jun tsome ason jaxa bʼa akʼwali wa x-ijlabʼajiyujile sok yijlabʼ kʼakʼ. Ja skʼuʼeʼi mini xchʼaki, sok mini ja yokeʼi wa xjujchi.

Jaxa it ja sbʼajtanil ixaw ja bʼa 40 jabʼil aye masan elye ja bʼa Egipto, sok ja israʼelenyo tixa aye pilan ekʼele bʼa Qadés. Tini il waji yajni ja 12 nakʼul kʼelwanum waj skʼel-e ja slujmal Canaán, ekʼel xa jun 40 jabʼil. Míriam, ja swats ja Moisés, ti cham bʼa Qadés. Cha ayexa ni wokol jastal ni bʼajtanto.

Ja ixuk winiki mini staʼawe jaʼ bʼa oj bʼobʼ yuʼe. Ja yuj kʼe kʼumanuke sbʼaj ja Moisés: «Mas lek ja chʼakeluk xa chamkotikoni. ¿Jas yuj wa elkotikon jani ja bʼa Egipto bʼa kechan jak kitikon wokol ja bʼa tan kistal lugar it bʼa mini jas wa xkʼiʼi? Ja ili mini xyaʼa sat inat, mini higo, mini tsʼusubʼ, mini granadaʼik sok mini jaʼ bʼa oj kutikon».

Yajni ja Moisés sok ja Aarón waj yawe yi orasyon bʼa tabernáculo, ja Jyoba yala yabʼ ja Moisés: «Tsomo ja chonabʼi. Anto bʼa stiʼ sat ja yeʼnleʼi kʼuman ja patakʼ ton tey tiw. Anto ja bʼa patakʼ toni oj el jitsan jaʼ bʼa oj yuʼe ja ixuk winiki sok spetsanil ja xchanteʼiki».

Ja yuj ja Moisés stsomo ja ixuk winiki sok yala yabʼ: «¡Maklayik ja weʼnlex ixuk winik mixa jipa kʼujolex bʼa Dyos! ¿Tʼilan maʼ ja keʼn soka Aarón oj katikon eluk jaʼ ja bʼa patakʼ ton it?». Anto, ja Moisés sok jun teʼ spakʼtsun chabʼ ekʼele ja patakʼ toni, sok kʼe eluk jun niwan yok jaʼ. Sok ajyini jitsan jaʼ bʼa spetsanil ja chonabʼi sok ja chanteʼiki.

Pe ja Jyoba tajki sok ja Moisés soka Aaroni. ¿Wan maʼ xa naʼa jas yuj? Yujni yalawe yeʼnle oj ya eluke jaʼ ja bʼa patakʼ toni, pe jaʼa Jyoba ja maʼ skʼulani. Yuj ja Moisés sok ja Aarón mi yawe yi stoyjel, ja Jyoba yala: «Ja weʼnlexi mini oj wa ochukex ja jchonabʼi ja bʼa Canaán».

Mixa albʼi ja israʼelenyo elye ja bʼa Qadés sok tsaʼan ti kʼotye ja bʼa wits Hor. Ja bʼa wits it cham ja Aaroni. Yiʼoj xa 123 ja sjabʼili. Ja israʼelenyo jelni tristeʼaye sok yokʼantaye ja Aarón 30 kʼakʼu. Eleazar ja yunin ja Aarón yeʼnxa ni ochkan ja yajkʼachil olomal ja bʼa tabernáculo.

Números 20:1-13, 22-29; Deuteronomio 29:5; Nehemías 9:21.