Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 50

Chabʼ ixuk mix xiwye

Chabʼ ixuk mix xiwye

YAJNI ja israʼelenyo wa xchʼika sbʼaje wokol, wa skʼanawe yi skoltajel ja Jyoba. Ja yeʼn wa sjeka olomalik bʼa mini tʼun xiwye bʼa oj koltajuke. Ja Biblia wa xya sbʼiʼiluk jwes jumasaʼ. Josué yeʼnani waj ja bʼajtan jwesi, sok tsaʼan ja tuk jwesiki sbʼiʼile Otniel, Ehúd soka Samgar. Pe chawane matik skoltaye ja israʼelenyo wajye ixuk: sbʼiʼile Débora sok Jael.

Débora alumaniʼa. Jyoba wa xya snaʼ ja jasa ojto ekʼuki, sok jaxa yeʼni wa xya ekʼ yi ja israʼelenyo. Pe chomajkil ja Débora juni jwesa. Ti wa xkulani bʼa yibʼel jun ibʼe xaʼan bʼa jun lugar jel ja witsaltiki, sok ja ixuk winiki wa xjakye smok bʼa oj stojbʼese ja swokoleʼi.

Ja bʼa tyempo jaw, Jabín yeʼnani ja mandaranum ja bʼa Canaán. Ayiʼoj 900 karroʼik bʼa kʼakʼanel, sok jelni chapan ja skʼakʼanum jumasaʼ. Ja yuj jitsan israʼelenyo kʼotele xa yaʼtum jumasaʼ ja Jabini. Ja maʼ wa skʼela ja skʼakʼanum jumasaʼ ja Jabín sbʼiʼil Sísara.

Jun kʼakʼu, ja Débora sjeka spayjel ja jwes Barac sok yala yabʼ: «Jaʼ it ja jas yalunej ja Jyoba: “Iʼaj 10,000 winik man bʼa wits Tabor, ti oj kiʼochawi tiw ja Sísara sok keʼn oj kaʼa kʼul ganar”».

Barac yala yabʼ ja Débora: «Oj wajkon ja ta oj wajan jmoki». Ja Débora smojtayniʼa, pe chomajkil yala yabʼ: «Mini oj toyjan yuja weʼn oja kʼul ganari, yujni ja Jyoba oj yakan bʼa skʼabʼ jun ixuk ja Sísara». Jani it ja jasa ekʼi.

Barac koʼkon ja bʼa wits Tabor bʼa oj staʼ sbʼaj sok ja skʼakʼanum ja Sísara. Junta chʼaykʼujol, Jyoba skʼulan ajak jun bʼutʼ jaʼ, sok jitsan skʼakʼanum ja Sísara sjikʼawe jaʼ. Sísara koʼ ja bʼa skarro sok spaka ajnel.

Tsaʼan ja Sísara ti kʼot bʼa yal chʼin snaj ja Jael. Ja yeʼn sloko bʼa oj ochuk bʼa yoj snaj sok yaʼ yi tʼun lech bʼa oj yuʼe, ja it ya jakuk swayel sok ochni swayela. Anto ja Jael yiʼajan jun tsʼapteʼ sok juneta stsʼapa yi ja bʼa s-olomi. ¡Yajni ja Barac ochjul, ja yeʼn sjeʼa yi ja Sísara chamel xa! Ja jas yala ja Débora jachʼni elkʼota.

Tixa milji ja mandaranum Jabín, sok bʼa jun tyempo, ja israʼelenyo ajyi jun sakʼanil bʼa laman.

Jueces 2:14-22; 4:1-24; 5:1-31.