Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 34

Jun yajkʼachil waʼelal

Jun yajkʼachil waʼelal

¿WAN maʼ xa naʼa jasunkiluk ja jas wane stsomjel bʼa luʼum ja ixuk winiki? Lajansok sakal teʼew, jay sok jachʼ jastal yal poʼoj. Pe mini sakal teʼewuka; juni waʼelala.

Kechanta maʼ ekʼel jun ixaw ja israʼelenyo ja elele ja bʼa Egipto, tixa aye bʼa takin kʼinal. Ja tiw mini jel x-ajyi waʼelala, ja yuj ja israʼelenyo wanexta woʼoljuk sok wa xyalawe: «Mas lekukxta ajyi ja Jyoba ti ya chamkotik ja bʼa Egipto. Ja tiw jelni ja waʼelal ajyiʼa».

Ja yuj ja Jyoba ti yala yabʼyeʼa: «Oj jkʼuluk ja bʼa satkʼinali akoʼuk waʼelal». Sok jachʼni skʼulana. Yajni el ja kʼaʼuji, sok ja israʼelenyo yilawe ja jas sak koʼel bʼa luʼumi, sjobʼo sbʼaje: «¿Jasunkiluk ja it?».

Ti yala ja Moisés: «Jaʼa it ja waʼelal yaʼunej awilex ja Jyoba bʼa oj awabʼyexi». Ja ixuk winiki wa xya sbʼiʼiluke MANÁ. Ja maná jachʼ yajbʼal jastal setan pan kʼulubʼal sok chabʼ.

«Tsomowik ja janekʼ oj awabʼyexi», jachʼ yala yabʼ ja Moisés ja ixuk winiki. Ja yuj, ja bʼa saʼan sakbʼelajeli wa stsomowe ja maná. Anto yajni wa xkʼixnaji ja kʼaʼuji, ja maná kanta bʼa luʼum bʼa mixa stsomoweʼi wa xchʼak jaʼaxuk ele.

Moisés chomajkil yala yabʼ ja ixuk winiki: «Mok maʼ snolkan waʼelal ja x-el ja pilan kʼakʼuʼi». Pe jujuntik mi skʼuʼane. Ja yuj, ¿wan maʼ xa naʼa jas ekʼi? Ja kʼakʼu jaw ja maná snolunejekani kʼe ajyuk syaljaʼil sok kʼe tubʼuk.

Jyoba mi oj ya koʼuk waʼelal ja bʼa sjukil kʼakʼuʼi ja yuj yala yabʼye a-stsom-e chabʼ ekʼele mas ja maná ja bʼa swakil kʼakʼu. Sok yala yabʼye a-snol-e kan tʼusan ja x-el ja pilan kʼakʼuʼi. ¡Ja jas ekʼi juni niwan senyaʼa! Pes ja bʼa sjukil kʼakʼu, ja maná mini ajyi syaljaʼil sok mini tubʼiʼa.

Ja 40 jabʼil ajyiye bʼa takin luʼum ja israʼelenyo jani swaʼelane ja maná.

Éxodo 16:1-36; Números 11:7-9; Josué 5:10-12.