Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 52

Gedeón soka 300 swiniki

Gedeón soka 300 swiniki

¿WAN maʼ xa wila jasa wan ekʼel ja ili? Ja it kʼakʼanume bʼa Israel. Ja matik waxa wila nujane ekʼi wane yujel jaʼ. Ja jwes Gedeón ti tekʼan ekʼ bʼa stsʼeʼel ja yeʼnleʼi. Ja yeʼn wan skʼeljel jastal wane yujel ja jaʼi.

Kʼela jastal ja winike tuktukil ja jastal wane yujel jaʼi: jujuntik nujane ekʼ, pe june sbʼechunej kʼen ja jaʼi man bʼa stiʼ bʼa oj bʼobʼ yil ja jas wan ekʼel ja bʼa sjoyanali. Ja it jelni tʼilan yujni ja Jyoba yalunej yabʼ ja Gedeón kechanta a-stsaʼ ja matik kʼelan jakan aye yajni wane yujel jaʼi. Jaxa tuki akumxuk bʼa snaje. La kiltik jas yuj.

Ja israʼelenyo cha ayexa pilan ekʼele bʼa jun tsatsal wokol yuja mini skʼuʼane ja Jyoba. Ja swinkil Madián mas xa jel chapan aye yuja yeʼnle sok wa ixtalajiye. Ja yuj ja israʼelenyo wa skʼanawe yi skoltajel ja Jyoba, soka yeʼn yala oj koltanuk.

Jyoba yala yabʼ ja Gedeón a-stsom kʼakʼanum, ja yuj ja Gedeón stsomo 32,000 kʼakʼanumik. Pe ja matik oj tiroʼanuke soki aye 135,000 winike. Jyoba yala yabʼ ja Gedeón: «Jel jitsan awiʼoj ja wa winiki». ¿Jas yuj jachʼ yala?

Yujni ja israʼelenyo ta skʼulane ganar ja kʼakʼaneli, oj bʼobʼ yal-e yuj yip yeʼnle skʼuluneje ganar, sok mini xmakuniyujile ja skoltajel ja Jyoba. Ja yujil ja Jyoba yala yabʼ ja Gedeón: «Alayabʼ spetsanil ja matik wa xiwi akumxuk bʼa snaje». Yajni ja Gedeón skʼulan ja it, 22,000 kʼakʼanumik kumxiye. Kechanxta kanye 10,000 winike bʼa oj tiroʼanuke sok ja 135,000 kʼakʼanumiki.

Pe ¡abʼanawil! Jyoba yala: «Jeltoni jitsan ja wa winiki». Ja yuj yala yabʼ ja Gedeón a-skʼuluk ja swiniki ayuʼe jaʼ ja bʼa yok jaʼi, sok ja matik wa xkoʼ yuʼe nujani a-sjek bʼa snaje. Ja Jyoba yala: «Oj ka kʼul ganar soka 300 winike ja matik kʼelan jakan ajyiye yajni wane yujel ja jaʼi».

Kʼot ja tyempo oj tiroʼanukeʼi. Gedeón spila bʼa oxe kʼole ja 300 swiniki. Bʼa jujune ja winiki yaʼ yi jun skacho, jun sjarroʼe soka bʼa yojoli jun jape ijlabʼ. Yajni mojan xa snalan akʼwal, spetsanile sjoybʼane ja bʼa jijlele ja skontraʼeʼi. Anto, junta lajan sjuʼu ja skachoʼeʼi, spojowe ja sjarroʼeʼi sok awaniye: «¡Jaʼa skʼakʼanel ja Jyoba soka bʼa Gedeón!». Yajni ja skontraʼe yaʼa sbʼaje ja bʼa swayele, chʼak jom s-olome sok xiwye. Spetsanile chʼak spak-e ajnel, sok ja israʼelenyo skʼulane ganar.

Jueces, skapituloʼil 6 man 8.