Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 14

Wa x-aji och preba ja skʼuʼajel ja Abrahani

Wa x-aji och preba ja skʼuʼajel ja Abrahani

¿WAN maʼ xbʼobʼ awil ja jas wan skʼulajel ja Abrahani? Ja yeʼn syamunej jun kuchiyo, lajan sok wa skʼana oj smil ja skeremi. ¿Jas yuj? Bʼajtan, la kiltik jastal staʼawe ja skereme ja Abrahán soka Sara.

Ajuluk akʼujol, ja Dyosi yala yabʼye oj ajyuk jun skereme. Pe ja abʼani lajansok mini oj ekʼuka, yujni ja yeʼnleʼi awelexa. Pe ja Abrahani wani sjipa lek skʼujol ja Dyosi wani xbʼobʼ skʼuluk ja jasa lajan sok mini oj bʼobʼuki. Ja yuj, ¿jasa ekʼi?

Tsaʼan ja jasa yala ja Dyos oj ekʼuki, ekʼto jun jabʼil tsʼikan lek. Anto, yajni ja Abrahán ayiʼoj jun 100 jabʼil sok jaxa xcheʼumi 90, ajyi jun yalatse sbʼiʼil Isaac. ¡Ja Dyosi ya kʼotuk ja jasa yaluneji!

Yajni ja Isaac junxa kerem, ja Jyobaji wa xyila ta meran tsats ay lek ja skʼuʼajel yiʼoj sbʼa yeʼn ja Abrahani. Skʼuman: «¡Abrahán!». Jaxa yeʼn sjakʼa: «¡It bʼayonjula!». Anto ja Dyosi ti yala yabʼa: «Iʼaj ja wa wunini, ja Isaaki, ja kechana wunini, sok kaʼax ja bʼa wits oj jeʼa wiʼi. Ja tiw ti oja mil ja wa wunini sok aki jastal jun majtanal».

¡Ja it jelni och spensar ja Abrahana, pes ja yeʼn jel skʼana juntiro ja yunini! Ajuluk akʼujol, ja Dyosi skʼapunej yi ja Abrahani ja yuntikili tini oj ajyuke bʼa slujmalil Canaán. Pe ¿jastal xa oj bʼobʼuk ja jaw ja ta cham ja Isaaki? Ja Abrahani mini xyabʼ stojolila, pe skʼuʼani yiʼa.

Yajni kʼot ja bʼa wits, ja Abrahani smocho ja yunini sok ti yaʼa bʼaʼan bʼa lugar skʼulunej bʼa wa xkʼapxi majtanal. Anto ti stasa jan ja kuchiyo bʼa oj smil ja yunini. Pe ja bʼa jutsʼin jaw ja yanjel ja Dyosi skomo: «¡Abrahán, Abrahán!». Ja yeʼn ti sjakʼaʼa: «¡It bʼayonjula!».

«Moka yajbʼes jawa keremi», jach yala ja Dyosi. «Ja yan wa xkila meran tsats ay lek ja skʼuʼajel awiʼoj jmok yujila mi atima jawa wunini, ja kechana wunini, bʼa oj awaki.»

¡Janekʼto ja skʼuʼajel yiʼoj ja Abrahani sbʼaja Dyosi! Ja yeʼn wa skʼuʼan ja Jyobaji mini ay jas mi oj bʼobʼ yuja, sok ja Jyobaji oj yaʼ sakʼwuk jan ja Isaac ja bʼa chamwinik jumasaʼ. Pe ja Jyobaji mini wa skʼana ja Abrahán a-smil ja skerem Isaaki; ja yuj ja Dyosi skʼulan akan lapan jun chej bʼa jujuntik ibʼe yal kʼul bʼa mojan ay ja Abrahani, sok ti yala yabʼ mok smil ja yunini jaʼ a-smil ja cheji.

Génesis 21:1-7; 22:1-18.