Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Ja jlibro wa sloʼiltay loʼilik bʼa Biblia

 LOʼIL 7

Jun winik mix xiwi

Jun winik mix xiwi

YAJNI kʼe jitsanbʼuk ja ixuk winike bʼa Luʼumi, tʼusan mi spetsaniluke jaʼ snochowe ja jastik mi lek skʼulan ja Caini. Pe jun winik mini snocho ja modoʼal jaw. Ja winik jaw sbʼiʼilan Enoc. Ja yeʼn waj jun winik mix xiwi. Ja Enoki mini yakan yaʼteltajel ja Dyosi ama ja ixuk winike bʼa skʼakʼujili mini tʼun lekuk ja jastik wa skʼulaneʼa.

¿Wan maʼ xa naʼa jas yuj ja ixuk winike jaw wa skʼulane jastik mi lekuk? Ajuluk akʼujol, ¿maʼ skʼulan ja Adán soka Eva a-skʼok-e ja smandar ja Dyosi sok a-sloʼe ja sat teʼ yalunej ja Dyos mok sloʼe ajyi? Ja Biblia wa xya sbʼiʼiluk Satanás. Ja yeʼn jun anjel mixa lekuk ja skʼujoli. Ja yeʼn wa skʼana oj jnochtik yiʼ ja smodo mi lekuki.

Jun kʼakʼu ja Jyobaji sjeka ja Enoki bʼa oj yal yabʼ ja ixuk winikeʼi jun jas junuk mi lek oj yabʼye. Ja it ja jas aljiyabʼ oj yali: «Oj kʼotuk ja skʼakʼujil ja Dyosi oj xchʼaysnajel spetsanil ja matik wa skʼulan jastik junuk mi lekuki». Bʼobʼta ja ixuk winikeʼi jel tajkiye soka jas yala ja Enoki sok bʼobʼta sleʼawe modo bʼa oj smil-e. Ja yuj, ja Enoki skʼanani mix xiwa bʼa oj yal yabʼ ja jas oj skʼuluk ja Dyosi ja ixuk winike jaw.

Ja Dyosi mini ya ajyuk sakʼan mas tyempo ja Enoki bʼa yojol ja tantik ixuk winike jaw. Ja Enoki kechanta ajyi sakʼan 365 jabʼil. ¿Jas yuj wa xkalatik «kechanta 365 jabʼil»? Yujni ja ixuk winike bʼa tyempo jaw masto yije sok mas albʼel wa x-ajyiye sakʼan yuj ja weʼgo. ¡Jun skerem ja Enoki sbʼiʼil Matusalén ajyi sakʼan 969 jabʼil!

Tsaʼan yajni cham ja Enoki, ja smodo ja ixuk winikeʼi jom-el juntiro. Ja Biblia wa xyala: «Ja ixuk winikeʼi jaxani wajel skʼujole tolabida ja jas mi lekuki», ja yuj «ja Luʼumi bʼutʼ-el sok jastik junuk bʼa mini tʼun lekuk».

¿Wan maʼ xa naʼa jas yuj ja bʼa kʼakʼu jumasaʼ jaw jel ajyi juntiro ja wokoli? Yujni ja Satanasi staʼa jun yajkʼachil modo bʼa oj skʼuluk ja ixuk winike a-skʼuluke jastik junuk mi lekuk. La kiltikawil jasunkiluk waj ja jaw.

Génesis 5:21-24, 27; 6:5, 11-13; Hebreos 11:5; Judas 14, 15.