Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Lekil yaljelik jakel bʼa Dyos

 XETʼAN 4

¿Machunkiluk ja Jesusi?

¿Machunkiluk ja Jesusi?

1. ¿Jastal maʼ kujlaji ja sakʼanili?

¿Jastik modoʼal yiʼoj ja Jesús wa sjeʼa wa xyaʼa sbʼaj tajel loʼil? (MATEO 11:29; MARCOS 10:13-16)

Ja Jesusi tukni ja sakʼanil yuja ixuk winiki, ja yeʼn tixani ay ajyi bʼa satkʼinal jastal ikʼ ason bʼajtanto yuj oj pojkuk ja bʼa Luʼumi (Juan 8:23). Ja jas bʼajtan skʼulan ja Jyoba jani ja Jesusi. Ja yeʼn skoltay ja Dyos bʼa skʼulajel spetsanil ja tuk jastik junuki, ja yuj ja Biblia wa xya sbʼiʼiluk «ja kechan yunin ja tatali». Chomajkil, ja Jyoba ya makunuk bʼa oj ya yi ekʼuk ja ixuk winiki ja srasonik wa xyaʼa ja yeʼn, ja yuj wa xcha sbʼiʼilan «ja Yabʼali» (Juan 1:14YD). Kʼuman ja Proverbios 8:22, 23, 30 sok Colosenses 1:15, 16.

2. ¿Jas yuj tʼilan jak ja bʼa Luʼumi?

Jyoba yaʼa ja sakʼanil ja Yunini bʼa yojol ja slukum jun akʼix judía, sbʼiʼil María. Ja yuj, ja Jesús mini ajyiyuj jun stat ja bʼa luʼumi (Lucas 1:30-35). Ja yeʼn jak ja bʼa Luʼumi yuj oxe rason. June, bʼa sjeʼjelkitik ja smeranil sbʼaja Dyosi, xchabʼil, bʼa sjeʼjelkitik jastal oj jkaʼteltaytik ja Dyosi anima wan ekʼel jbʼajtik wokol, sok yoxil, bʼa yajel ja sakʼanil bʼa jkoltajeltik. Kʼuman ja Mateo 20:28.

3. ¿Jas yuj tʼilan wa xkʼana jun jkoltajeltik?

Jun koltanel jachʼ jastal stsʼakol wa xtupxi bʼa skoltajel jun ixuk winik bʼa mi oj miljuk (Éxodo 21:29, 30). Ja awelaxeli soka chamelchʼakeli mini teyuk ajyi ja bʼa jas wa skʼana ja Dyosi sbʼaja ixuk winiki. Wa xnaʼatik ja it yuja jas alji yabʼ ja Adán yuja Jyoba, ta mi kʼa skʼuʼani, oj chamuk. Ja yuj, skʼuʼukto, mi oj chamuk ajyi (Génesis 2:16, 17; 5:5). Jastal ni wa xyala ja Biblia, ja chamelchʼakeli «ochi» yuj smul jun winik, ja Adani. Jachuk ja yeʼn ya ekʼ yi ja mulali spetsanil ja yintil jumasaʼ, ja yuj stʼilanil ja koltajeli. Kʼuman ja Romanos 5:12; 6:23.

 ¿Maʼ oj skoltayotik bʼa oj ya elkotik ja bʼa chamelchʼakeli? Yajni wala chamtiki, ti tiw wa xtupxi ja mulali. Yuja mulanumotiki, mini xbʼobʼ jtuptik yi ja smul ja tuki. Kʼuman ja Salmo 49:7-9.

4. ¿Jas yuj cham ja Jesusi?

Ja Jesusi mi jachuk jastal keʼntik, ja yeʼn mey yiʼoj mulal. Ja yeʼn chami, pe mi yuj ay jun smul, chami bʼa oj stup ja jmultiki. Ja Dyosi sjeʼa ja niwan syajalskʼujol jmoktik yajni sjekakon ja yunini bʼa jak cham yuj keʼntik. Chomajkil, ja Jesusi sjeʼa ja syajalskʼujol jmoktiki yajni skʼuʼan yi ja stati jak ya ja sakʼanil yuja jmultiki. Kʼuman ja Juan 3:16 sok Romanos 5:18, 19.

5. ¿Jasa wan skʼulajel ja Jesús ja bʼa jtyempotiki?

Yajni Jesús ajyi bʼa Luʼumi, stojbʼes ja matik maloʼayi, ya sakʼwuk ja matik chameleʼi sok skoltay ja matik wane yijel wokoli. Ja it sjeʼa jasa oj skʼuluk ja bʼa tyempo jakumto sbʼaja spetsanil ja matik kʼuʼabʼal ayeʼi (Mateo 15:30, 31; Juan 5:28). Tsaʼan yajni cham ja Jesusi, ja Dyosi ya sakʼwuk sok yaʼ yi jun sakʼanil bʼa satkʼinal (Efesios 1:20). Ja yeʼni smajlay bʼa stojol skʼabʼ ja stati man aji och mandaranum (Hebreos 10:12, 13). Ja bʼa jtyempotiki, ja Jesusi mandaranum xa ja bʼa satkʼinali, soka snebʼuman jumasaʼ wane xcholjel ja lekil rason it bʼa spetsanil ja luʼumkʼinali. Kʼuman ja Daniel 7:13, 14 sok Mateo 24:14.

Xmojojixtajan ja Jesús, jastal jun mandaranum bʼa jel ja yipi, oj ya chʼaysnajel ja wokoliki soka matik wa skʼulane aʼajyuk ja wokoliki. Spetsanil ja matik wa skʼuʼane sok kʼuʼabʼal aye soka Jesús oj yabʼye stsamalil ja sakʼanile bʼa jun kʼachinubʼ ja bʼa Luʼumi. Kʼuman ja Salmo 37:9-11.