Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Lekil yaljelik jakel bʼa Dyos

 XETʼAN 3

¿Meran maʼ lek ti jakel bʼa Dyos ja lekil yaljelik bʼa Biblia?

¿Meran maʼ lek ti jakel bʼa Dyos ja lekil yaljelik bʼa Biblia?

1. ¿Maʼ spensar tsʼijbʼunubʼal ja bʼa Biblia?

Ja lekil yaljelik sbʼaja oj ajyukotik sakʼan bʼa tolabida ja bʼa Luʼumi tini wa xtax bʼa Biblia (Salmo 37:29). Ja Biblia ayiʼoj 66 juʼunik. Ja Dyosi stsaʼa jun 40 winike bʼa oj stsʼijbʼuke ja Biblia. Ja bʼajtan joʼe juʼuni ja stsʼijbʼan ja Moisés ayxa junuk 3,500 jabʼil. Jaxa tsaʼanxta juʼuni ja stsʼijbʼan ja jekabʼanum Juani ayxa junuk 1,900 jabʼil. Anto, ¿maʼ spensar tsʼijbʼunubʼal ja bʼa Biblia? Jaʼa Dyosi. Ja winike matik stsʼijbʼaneʼi ja tojiye yuj ja yip ja Dyosi (2 Samuel 23:2). Ja yuj, ja jas stsʼijbʼaneʼi mi spensaruk yeʼnle, jaʼa spensar ja Dyosi. Kʼuman ja 2 Timoteo 3:16 sok 2 Pedro 1:20, 21.

2. ¿Jas yuj wa xbʼobʼ jipjkʼujoltik sbʼaja jas yiʼojan ja Biblia meraniʼa?

Yujni ti jakel bʼa Dyos. Pes ja it wa xyala tsʼikan lek ja jasa ojto ekʼuk ja bʼa tyempo jakumi sok jachʼni oj ekʼuka. Ja ixuk winiki mini xbʼobʼ skʼuluk ja ita (Josué 23:14). Kechanta ja Dyos maʼ jel ja yipi wa xbʼobʼ yuj skʼulajel. Kʼuman ja Isaías 42:9; 46:10.

Ta jun juʼun ti jakel bʼa Dyos, wani xmajlaxi jelni chaʼanyabʼalila, sok jachniʼa. Ja Biblia pukxel ekʼ bʼa jitsan miyon bʼa junuk 450 kʼumalik. Anima jitsan xa jabʼil tsʼijbʼunubʼal, pe yajni wa staʼa tiʼal sbʼaja jastal kujlaji ja jastik junuki, jastal ja Luʼumi, wani slaja sbʼaja. Chomajkil, wani slaja sbʼaj ja jastik chʼak stsʼijbʼanekan ja 40 winikeʼi. * Ja bʼa slamik ja Biblia jani jel chikan ja syajal skʼujol ja Jyoba. Ayiʼoj yip bʼa stukbʼesel ja sakʼanil ja ixuk winiki. Ja yuj, jitsan wani sjipawe skʼujol ja Biblia jani ja Yabʼal ja Dyosi. Kʼuman ja 1 Tesalonicenses 2:13.

 3. ¿Jastik maʼ wa staʼa tiʼal ja Biblia?

Ja Biblia wa staʼa tiʼal sbʼaja tsamalik jastik junuk wa skʼana ja Dyos sbʼaja ixuk winiki. Ja Yabʼal ja Dyosi wa xcholo sbʼaja jastal xchʼaya ja tsamal snaj ja bʼajtan winiki soka bʼajtan ixuki, sok wa xcholo jastal oj cha lokʼolaxuk ja jas chʼayi. Kʼuman ja Apocalipsis 21:4, 5.

Ja Yabʼal ja Dyosi ayiʼojan leyik sok rasonik. Pe chomajkil wa sjeʼakitik ja lekil smodo ja Jyoba sbʼaja jastal stalnay ja ixuk winik bʼa ekʼpaxtakujtiki. Ja yuj, ja Biblia wa skoltayotik bʼa oj jnatik sbʼaj sok jastal oj bʼobʼ kamigoʼuktik ja Dyosi. Kʼuman ja Salmo 19:7, 11 sok Santiago 2:23; 4:8.

4. ¿Jastal maʼ oj bʼobʼ awabʼ stojolil ja Biblia?

Yajni Jesús yala jun teksto, cha xcholo stojolil. Ja juʼun it chapubʼal junxta jastal jaw bʼa oj awabʼ stojolil ja Biblia. Kʼuman ja Lucas 24:27, 45.

Jelni oj akʼul gusto snebʼjel sbʼaja Dyosi soka jasa wa skʼana. Anima ay jujuntik ixuk winik mi xyawe yi stʼilanil, ma ay tuk wa xkʼe yolome, pe moka wakan ja jaw a-sjom jawa wolomi. Pes bʼa oj ataʼ jawa sakʼanil bʼa tolabida, tʼilani oj anebʼ sbʼaja Dyosi. Kʼuman ja Juan 17:3.