Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Lekil yaljelik jakel bʼa Dyos

 XETʼAN 7

¿Jasunkiluk ja sGobyerno ja Dyosi?

¿Jasunkiluk ja sGobyerno ja Dyosi?

1. ¿Jasunkiluk ja sGobyerno ja Dyosi?

¿Jas yuj jaʼita Jesús wa xkan sbʼaj ja yajel mandari? (MARCOS 1:40-42)

Jun tikʼe Gobyerno tey bʼa satkʼinal sok oj xchʼay-el snajel ja gobyernoʼik bʼa luʼumi. Ja Gobyerno it kechanta yeʼn oj kanuk bʼa jachuk akʼot smeranil ja jasa wa skʼana ja Dyos oj kʼulaxuk ja bʼa Luʼumi jastal ni bʼa satkʼinali. Ja Gobyerno it ojni bʼobʼ yuj skʼulajel ja jastik wa skʼana ja ixuk winiki, sok bʼa oj ajyuke tsoman bʼa jun ita pensar yaʼteltajel ja Dyosi. ¿Mi maʼ smeraniluk juni lekil yaljel ja ita? Kʼuman ja Daniel 2:44 sok Mateo 6:9, 10; 24:14.

Ja Jyoba stʼojunej ja Yunini, ja Jesukristo, bʼa yeʼn aʼoch Mandaranum ja bʼa sGobyerno. Kʼuman ja Apocalipsis 11:15.

2. ¿Jas yuj jaʼita Jesús wa xkan sbʼaj ja yajel mandari?

Yujni jun lekil Mandaranum, ja yeʼn jel lek ja skʼujoli, tolabida stojolil ja jasa wa skʼulani (Juan 1:14). Chomajkil, ayni yip bʼa skoltajel ja ixuk winiki. Tsaʼan yajni sakʼwi, waj bʼa satkʼinal sok smajlay bʼa stsʼeʼel ja Jyoba bʼa oj ajuk yi ja xchol jastal mandaranum (Hebreos 10:12, 13). Ja Dyosi yata yi ja cholal jaw, sok masan bʼa satkʼinal, ja Jesús oj ya mandar ja bʼa Luʼumi. Kʼuman ja Daniel 7:13, 14.

3. ¿Ay maʼ tuk oj yaʼe mandar lajan soka Jesusi?

Ay jun kʼole tsaʼubʼale oj wajuke bʼa satkʼinal bʼa oj yaʼe mandar lajan soka Jesusi (Daniel 7:27). Ja bʼajtan matik tsajiyeʼi jaʼa snebʼumanik ja Jesús. Ja bʼa jtyempotiki, ja Jyoba wantoni stsajel ixuk winik bʼa toj aye bʼa oj wajuke bʼa satkʼinal. Jastal ni ja Jesús, ja ixuk winike it wa xwajye bʼa satkʼinal ja yajni wa xchamyeʼi, pe sok xa jun skwerpoʼe jastal ikʼ ason. Kʼuman ja Juan 14:1-3 sok 1 Corintios 15:42-44.

 ¿Janekʼ maʼ oj wajuke ja bʼa satkʼinali? Ja Jesús ya sbʼiʼiluk ja matik oj wajuke bʼa satkʼinali «chʼin kʼole» (Lucas 12:32, YD). Ja yeʼnleʼi aye 144,000 ixuk winik, sok ojni yaʼekon mandar lajan soka Jesús bʼa satkʼinal. Kʼuman ja Apocalipsis 14:1.

4. ¿Jasa ekʼi yajni kʼe ya mandar ja Jesús?

Ja Jesús kʼe ya mandar bʼa jabʼil 1914. * Yajni kʼe ya mandari, ja jasa bʼajtan skʼulani ja snutsuʼel ja Satanás soka spukuj ja bʼa satkʼinali sok sjipakon bʼa Luʼum. Ja Satanasi jel kʼe skoraja sok och yijan wokolik bʼa spetsanil ja Luʼumi (Apocalipsis 12:7-10, 12). Man tyempo jaw, ja sakʼanil ja ixuk winiki och ipaxuk ele. Ja kʼakʼaneli, ja chamel jumasaʼ sok ja waʼini jani senyaʼik wa sjeʼa mojan xa ja xchʼakelal ja jastik junuk mi lekuki. Kʼuman ja Lucas 21:7, 10, 11, 31.

5. ¿Jasa wan skʼulajel ja sGobyerno ja Dyosi, sok jas oj skʼuluk ja bʼa tyempo jakumi?

Soka aʼtel bʼa xcholjel ja lekil rason bʼa spetsanil ja luʼumkʼinali, ja sGobyerno ja Dyosi wan stsomjel jitsan ixuk winik bʼa spetsanil ja chonabʼ jumasaʼ. Ja it wa stojolan jitsan mil yata sbʼaje akʼulajuke mandar yuja Jesús. Ja ixuk winike it oj kanuke sakʼan yajni ja sGobyerno ja Dyosi xchʼaya snajel ja jastik mi lekuk ja bʼa luʼumkʼinali. Wan kʼa xkʼanatik oj jbʼajuktik ja jastik lek oj skʼuluk ja sGobyerno ja Dyosi, tʼilani kʼuʼabʼal oj ajyukotik soka Jesusi. Kʼuman ja Apocalipsis 7:9, 14, 16, 17.

Ja bʼa yojol ja mil jabʼil oj ya mandar ja sGobyerno ja Dyosi, ojni skʼuluk akʼot smeranil ja jasa wa skʼana ajyi ja Dyos sbʼaja ixuk winiki. Ja Luʼumi oj pax jun tsamal kʼachinubʼ. Xchʼak ja mil jabʼili, ja Jesús oj ya ekʼ yi bʼa skʼabʼ ja sTati ja cholal akʼubʼal yiʼi (1 Corintios 15:24-26). ¿Wan maʼ xa kʼana oj awal yabʼ ja tuki sbʼaja sGobyerno ja Dyosi? Kʼuman ja Salmo 37:10, 11, 29.

 

^ par. 6 Bʼa oj anebʼ mas ja jas yala ja Biblia bʼajtanto yuj ja jas ekʼ ja bʼa jabʼil 1914, kaʼax ja bʼa slam 215-218 ja bʼa juʼun ¿Jasa wa sjeʼa meran lek ja Biblia?