Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Jeʼayi bʼa Biblia jawa wuntikili

 SJEJEL 10

Ja Jesús tolabida ajyi kʼuʼabʼal

Ja Jesús tolabida ajyi kʼuʼabʼal

¿Jel maʼ wokol ajyel kʼuʼabʼal soka wa nantati?... Ayni ekʼele jelni wokola. Pe ¿wan maʼ xa naʼa jasa oj skoltaya bʼa oj ajyan kʼuʼum-abʼal? Jani oja nebʼ sbʼaja smodo ja Jesús. ¿Wan maʼ xa naʼa ja yeʼn tolabida ajyi kʼuʼabʼal soka Jyoba soka snantati?... La jnebʼtik tʼusan mas sbʼaja Jesús.

Bʼajtanto oj jakuk ja Jesús ja bʼa Luʼumi, ja yeʼn ti ajyi bʼa satkʼinal soka sTati, ja Jyoba. Pe chomajkil ja Jesús ajyi snantat ja il ja bʼa Luʼumi. Ja yeʼnleʼi sbʼiʼilane José sok María. ¿Wan maʼ xa naʼa jastal kʼot snantatuk ja José soka María?...

Bʼajtanto oj jakuk ja bʼa Luʼumi, ja Jyoba skʼulan jun jasunuk mi bʼa ilubʼala. Yiʼaj ja sakʼanil ja Jesús ja bʼa satkʼinali sok ti yaʼa bʼa yojol ja María. Ja Jesús ti ajyi bʼa yojol ja María jastalni wa x-ajyi spetsanil yal alatsik. Sok ekʼ bʼalune ixaw, ja Jesús tixa pojkiʼa. Jach jastal it ja Jesús kʼot snantatuk ja José soka María.

Yajni ja Jesús kechanto 12 ja sjabʼili, ja yeʼn ay jas skʼulan bʼa sjeʼa jel syatay ja sTati, ja Jyoba. Ja it ekʼi yajni ja Jesús soka spamilya wajye man Jerusalén. Ja tiw wajye bʼa oj yaweyi stoyjel ja Jyoba. Pe yajni kumxumexa bʼa snajeʼi, ja José soka María mi staʼawe bʼa kan ja Jesusi. ¿Wan maʼ xa naʼa bʼa kan ja Jesusi?...

¿Jas yuj ja Jesús tey ja bʼa templo?

Ja José soka María kumxiye wego man Jerusalén sok och sleʼe ekʼ ja Jesús. Ja yeʼnleʼi jel chamkʼujol aye juntiro yujni mi staʼawe ekʼe. Pe ja bʼa yoxil kʼakʼu, ¡ti staʼawe bʼa templo! ¿Wan maʼ xa naʼa jas yuj ja Jesús tey ja bʼa templo?... Yujni ja bʼa lugar jaw wa xbʼobʼ snebʼ jitsan jastik junuk bʼa Jyoba. Ja Jesús jel syajtay ja sTati sok wa skʼana oj snaʼe jastal oj ya gustoʼaxuk ja Jyoba. Yajni ja Jesús kʼiʼi sok jul skʼujol, kʼuʼabʼalni ajyi soka Jyoba. Ja yeʼn tolabida ajyi kʼuʼum-abʼal, ama ayni ekʼele wokol waj bʼa yeʼna yuja ajyi ixuk winik bʼa kʼulajiyi bʼa mi lekuk. Pe ¿oj maʼ awal ja Jesús cha ajyi kʼuʼabʼal soka José soka María?... Ajyiniʼa, jach wa xyala ja Biblia.

¿Jasa wa xnebʼatik sbʼaja Jesús?... Ja yuj ja weʼn tʼilani oja kʼuʼukyi ja yabʼal jawa nantati, anima ayni wokol bʼa weʼnaʼa. ¿Oj maʼ ajyan kʼuʼabʼal ja weʼn?...

KʼUMAN BʼA WA BIBLIA:

  • Lucas 1:30-35; 2:45-52

  • Efesios 6:1

  • Hebreos 5:8