Kaʼax ja bʼa sbʼaʼal

Kaʼax ja bʼa xchabʼil menú

Kaʼax ja bʼa sbʼaʼali

Taʼumantiʼik bʼa Jyoba

tojol-abʼal

Jeʼayi bʼa Biblia jawa wuntikili

 SJEJEL 7

¿Jasa oja kʼuluk ta wana xiweli?

¿Jasa oja kʼuluk ta wana xiweli?

Kʼela ja yal kerem ja bʼa dibujo. ¿Anke stuchʼil ay sok xiwel ay skʼeljel? ¿Ay ma bʼa jun ekʼele xiwela?... Jpetsaniltik ekʼel jbʼajtik. Ja bʼa Biblia wa staʼa tiʼal bʼa yaʼtijumik Dyos bʼa och xiwele sok stuchʼil yabʼ ajyiye. June bʼa yeʼnle jani ja Elías. La kiltik jasa ekʼ sbʼaji.

Ja Jezabel wa skʼana oj smil ja Elías

Ja Elías ti ajyi sakʼan bʼa slujmal Israel, bʼajtanto oj pojkuk ja Jesús. Ja bʼa tyempo jaw, ja mandaranum bʼa Israel soka xcheʼumi mi xyaʼteltaye ja Jyoba, ja Dyos smeranili. Ja yeʼnleʼi sbʼiʼile Acab sok Jezabel, sok jaʼ yaʼteltaye ja Baal, jun kʼulubʼal dyos. Ja yuj, tʼusan mi spetsaniluk ja israʼelenyo chomajkil ja yaʼteltaye ja Baal. Ja mandaranum Jezabel jel min kʼakʼ sok wa skʼana oj smil spetsanil ja yaʼtijum ja Jyoba. Pe yuja Elías wa xyaʼteltay ja Jyoba, ¡cha yala oj smile! ¿Wan maʼ xa naʼa jasa skʼulan ja Elías?...

 ¡Ja Elías spaka ajnel! Ti waj man bʼa takin kʼinal sok ti snakʼa sbʼaj bʼa jun kʼeʼen. ¿Jas yuj snakʼa sbʼaji?... Yujni xiwi. Ja mero mi oj bʼobʼ xiwuk. ¿Jas yuj? Yujni ja yeʼn wa snaʼa ojni bʼobʼ koltajuk yuja Dyosi. Pes axani bʼa koltubʼala. Jun ekʼele, ja Elías skʼanayi ja Dyosi bʼa a-sjekon kʼakʼ man bʼa satkʼinal, soka Jyoba jachni skʼulana. ¿Anke ja Jyoba jelni ja yipa? Jachukniʼa. ¡Ja Elías wani xbʼobʼ sjip skʼujol bʼa Jyoba!

¿Jastal koltaji ja Elías yuja Jyoba?

Yajni ja Elías tey ja bʼa yoj kʼeʼeni, ja Jyoba sjobʼoyi: «¿Jas yuj teya ili?». Ja Elías sjakʼa: «Ja ajyi jitsanto ja matik wa xyaʼteltaya, pe ja wego kechanxta keʼn kanelon. Sok wala xiwyon bʼa oj cha miljukon ja keʼn». Ja Elías spensaraʼan ta chʼakta miljuk spetsanil ja yaʼtijum ja Dyosi. Pe ja Jyoba yala yabʼi: «Miyuk, me la kana tuchʼil. Ayto juke mil ixuk winik ja matik wa xyaʼteltayoni. Mok xiwan, yujni oj kawi juna waʼtel bʼa oja kʼuluk». Yajni ja Dyos yala yabʼ jachuki, ¿gustoʼaxi maʼ ja Elías?... Jachniʼa, jelni gustoʼaxiʼa.

¿Jasa wa xnebʼatik sbʼaja jas ekʼ sbʼaj ja Elías?... Pes ayni ekʼele oj xiwan ma atuchʼil oja wabʼ aya. Pe yajni la tax jachuki, ¿machun oja pensaraʼuk? Pes ajuluka kʼujol mi atuchʼiluk aya, yujni aya wamigoʼik bʼa wa syajtaye ja Jyoba sok cha wa syajtaya ja weʼn. Sok mok chʼayuka kʼujol ja Jyoba jel ja yipi sok tolabida oj skoltaya. ¿Anke jelni tsamal yabʼjel ja mini atuchʼiluk aya?...

KʼUMAN BʼA WA BIBLIA:

  • 1 Reyes 19:3-18

  • Salmo 145:18

  • 1 Pedro 5:9