¿JAS notisyaʼik waxa taʼa yajni waxa kʼuman ja peryodiko, waxa kʼela ja telebisyoni sok waxa maklay ja radyo? ¡Jel ja matik wa sleʼa chaʼan smuleʼi, ja kʼakʼaneli soka terrorismo! Pe pensaraʼan ja wokolik wan ekʼelabʼaji. Bʼobʼta ja chameli ma ja xchamelal juna pamilya jel wan yajela wiʼ wokol. Sok bʼobʼta jach aya xa wabʼ jastal ja Job, jun lekil winik sok yala ja yeʼn jel yiʼaj «jitsan kʼixwel sok wokol» (Job 10:15).

Bʼobʼta ja weʼn xa jobʼo abʼaj:

  • ¿Ja maʼ it ja jasa wa skʼana ja Dyos sbʼaja keʼn sok bʼa yibʼanal ja ixuk winiki?

  • ¿Bʼa oj bʼobʼ jtaʼ koltajel bʼa oj kuchkuj ja wokoliki?

  • ¿Oj maʼ kʼot jun kʼakʼu oj ajyuk lamanil ja bʼa Luʼumi?

Ja Biblia wa xyaʼa ja meran sjakʼjeliki.

 JA BIBLIA WA SJEʼA JANI IT JA JASA OJ SKʼULUK JA DYOS JA BʼA LUʼUMI.

«Mi xa ni oj to ocʼuque otro vuelta. Mi xa oj to tristeaxuque. Mi xa oj couc mas ja xchamelei. Mi oj ajyuc ja syajaj ja scuerpoi. Mi ni maʼ oj chamuca porque ja svida jastal ajyi, ecʼ ni junitora, stzʼacatal ja Diosi.» (Apocalipsis 21:4)

«Ja maʼ renkoʼayi oj lujpuk jastal ja kʼujlal cheji.» (Isaías 35:6)

«Ja matik mi x-ilwani oj jamxuk ja sati.» (Isaías 35:5)

 «Oj ni cʼotuc ja cʼacʼu ja maʼ chamel xa, [...] oj eluque ja ba sqʼuejnalei.» (Juan 5:28, 29)

«Sok mini jun swinkil oj yale: ‹Maloʼayon›.» (Isaías 33:24)

«Oj ajyuk jitsan sat jastik junuk [ma waʼelal] ja bʼa luʼumi.» (Salmo 72:16)

 AʼEL SLEKILAL JA JASA WA SJEʼA JA BIBLIA

Moka pensaraʼuk ja jas wa xtax ja bʼa slamik bʼajtanto kechanta jun wayichal. Jani skʼapunej ja Dyosi, sok ja Biblia wa xcholo jastal oj skʼuluk.

Pe ja it mi kechanuk. Chomajkil, ja Biblia wa sjeʼa jastal meran oj ajyukotik sakʼan gusto ja bʼa jtyempotiki. Pensaraʼan jutsʼin ja chamkʼujolili soka wokolik awiʼoji. Bʼobʼta ja yuj ja takʼini, ja pamilya, ja chameli sok ta ay maʼ chamelawuji. Pes ja Biblia wa xyaʼa jkoltajeltik bʼa oj kuchkujtik ja wokolik jaw, chomajkil wa xyaʼ kulan jkʼujoltik stajel sjakʼjelik sbʼaja sjobʼjelik jastalik ja it:

  • ¿Jas yuj wa xkiʼajtik wokoli?

  • ¿Jastal oj bʼobʼ kuchkujtik ja wokolik ja bʼa jsakʼaniltiki?

  • ¿Jasa oj bʼobʼ jkʼuluktik bʼa jachuk mas gusto aʼajyuk ja jsakʼaniltik bʼa pamilya?

  • ¿Jasa wa x-ekʼ ja wala chamtiki?

  • ¿Ojto maʼ kiltike yajkʼachil ekʼele ja matik chamelxa kujtiki?

  • ¿Jas yuj wa xbʼobʼ jkʼuʼuktik lek ojni ya kʼot smeranil ja jasa skʼapunej ja Dyosi?

 Yuja weʼn wana skʼumajel ja juʼun it waxa jeʼa wani xa kʼana oja naʼ ja jasa wa sjeʼa ja Biblia, soka juʼun it ojni skoltaya. Oja wil ja bʼa parrapo’iki ayiʼoj sjob’jelik. Jitsan mil ixuk winik jelni lek xyilawe ja jastal wa sjeʼawe ja taʼumantiʼik bʼa Jyoba, pes wani xyawe makunuk sjobʼjelik sok sjakʼjelik bʼa spaklajel ja Biblia. Wa xmajlatikon lekni oja cha wil ja weʼn. Wa xkʼanatikon ja Dyosi a-skoltaya bʼa oja wabʼ stsamalil snebʼjel ja jasa wa sjeʼa meran lek ja Biblia.