Bwiinguzi bwamu Bbaibbele

Peepe, zikombelo zyoonse tazikozyenye pe. Bbaibbele lilaamba zikozyanyo zinji zyazikombelo zitamukkomanisyi Leza. Zikombelo eezyi inga twazibikka muzibeela zyobilo.

Cibeela 1: Kukomba baleza bakubeja

Ibbaibbele nolyaamba kujatikizya kukomba baleza bakubeja libelesya mabala mbuli aakuti “zintu zyabuyo,” alimwi “zinyina mulimo.” (Jeremiya 10:​3-5; 16:19, 20) Jehova * Leza wakalailila bana Israyeli kuti: “Utabi abaleza bambi kunze lyangu.” (Kulonga 20:​3, 23; 23:24) Ciindi bana Israyeli nobakali kukomba baleza bambi, “bukali bwa Jehova bwakababukila.”​—Myeelwe 25:3; Levitiko 20:2; Babetesi 2:​13, 14.

Leza kunyina naacinca mbwalimvwa caboola kumakani aakukomba baabo “baambwa kuti baleza.” (1 Bakorinto 8:​5, 6; Bagalatiya 4:8) Aboobo ulailila baabo ibayanda kumukomba kuti baleke kuyanzana abaabo bazulilwa kubukombi bwakubeja kuti: “Amuzwe akati kabo, akulyaandaanya.” (2 Bakorinto 6:​14-​17) Ikuti naa zikombelo zyoonse zisololela kuli Leza, nkaambo nzi Leza ncapeda malailile aali boobu?

Cibeela 2: Kukomba Leza wakasimpe munzila njatakkomanini

Zimwi ziindi, bana Israyeli bakali kukomba Leza kubelesya njiisyo alimwi aziyanza izyakali kubelesyegwa kukomba baleza bakubeja, pele Jehova wakabakasya kusanganya bukombi bwakasimpe abukombi bwakubeja. (Kulonga 32:8; Deuteronomo 12:​2-4) Jesu wakabanyemena basololi bazikombelo ciindi naakali anyika akaambo kanzila nzyobakali kubelesya kukomba Leza; bakali kulitondezya kuti mbakombi, pele cakuupaupa ameso ‘tiibakali kubikkila maano kumakani mapati aa Mulawo, nkokuti bululami, luse, alimwi alusyomo.’​—Matayo 23:23.

Mbubwenya buyo amazuba aano, bukombi bwakasimpe mbobusololela bantu kuli Leza. Kasimpe aako kajanika mu Bbaibbele. (Johane 4:​24; 17:17; 2 Timoteyo 3:​16, 17) Muzikombelo muli njiisyo ziteendelani ancolyaamba Bbaibbele zitantamuna bantu kuli Leza. Injiisyo zinji bantu nzyobayeeya kuti zyamu Bbaibbele zibikkilizya, Butatu, kupya mulilo uutamani alimwi akutafwa kwabuumi, zyakazwa kubantu bakali kukomba baleza bakubeja. Bukombi ibukulwaizya njiisyo mbuli zeezyi “mbwabuyo,” naa bunyina mulimo, akaambo kakuti bukulwaizya zilengwa zyabantu muciindi camilawo ya Leza.​—Marko 7:​7, 8.

Leza bulamusesemya bukombi bwakuupaupa ameso. (Tito 1:​16) Kutegwa bantu babe acilongwe a Leza, bukombi bweelede kubagwasya mubuumi bwabo kutali buyo kubakulwaizya kutobela tunsiyansiya. Mucikozyanyo, Bbaibbele lyaamba kuti: “Ikuti muntu uuli woonse kayeeya kuti mukombi wa Leza, pele taujati mulaka wakwe, weena moyo wakwe mwini, alimwi bukombi bwakwe mbwabuyo. Ibukombi busalala alimwi butasofweede mumeso aa Leza wesu alimwi Taata mboobu: ikulanganya bamucaala abamukabafwu mumapenzi aabo, alimwi akulibamba katutakwe kabala kali koonse kamunyika.” (Jakobo 1:​26, 27) Ibbaibbele lyabelesya mabala aakuti “bukombi busalala” ikupandulula bukombi butali bwakuupaupa ameso.

^ munc. 5 Jehova ndizina lya Leza wakasimpe kweelana ambolitondezya Bbaibbele.