Peepe. Bbaibbele litondezya kuti tweelede kupaila buyo kuli Leza, kwiinda muzyina lya Jesu. Jesu wakaambila basikwiiya bakwe kuti: “Mboobu mbomweelede kupaila: Taateesu ooli kujulu, alisalazyigwe zyina lyako.” (Matayo 6:9) Kunyina naakalailila basikwiiya bakwe kupaila kubasaante, bangelo, naa muntu uuli woonse kunze lya Leza.

 Alimwi Jesu wakaambila basikumutobela kuti: “Ndime nzila, kasimpe alimwi abuumi. Kunyina uuboola kuli Taata ccita kuti wainda mulindime.” (Johane 14:6) Alikke Jesu nguuzumizyidwe a Leza kuba simwiimaakati wesu.—Bahebulayo 7:25.

Mbuti kuti kandipaila kuli Leza alimwi akubasaante?

 Mumilawo iili Kkumi, Leza wakaamba kuti: “Ndime Jehova Leza wako, ndi Leza sibuzuba.” (Kulonga 20:5) Muunzila nzi Leza mwali “sibuzuba”? Leza uyanda kuti kakombwa alikke, alimwi eeci cilabikkilizya amipailo.—Isaya 48:11.

 Tulamunyemya Leza ikuti katupaila kumuntu uumbi, nokuba kubasaante naa bangelo basalala. Mwaapostolo Johane naakasola kukomba mungelo, mungelo wakamukasya kwiinda mukumwaambila kuti: “Utaciti oobo pe! Mebo ndili muzike buyo mbubonya mbuli nduwe abanabokwanu ibajisi mulimo wakucitila Jesu bumboni. Komba Leza.”—Ciyubunuzyo 19:10.