Bwiinguzi bwamu Bbaibbele

Nkondo ya Amagedoni caamba nkondo yamamanino akati kamfwulumende zyabantu alimwi a Leza. Mfwulumende eezyi alimwi abaabo bazisyoma bakazya Leza kwiinda mukukaka kulibombya kubweendelezi bwakwe. (Intembauzyo 2:2) Nkondo ya Amagedoni iyoogusya bulelo bwabantu.​—Daniele 2:​44.

Ibbala lyakuti “Amagedoni” lijanwa buyo ciindi comwe mu Bbaibbele, ku Ciyubunuzyo 16:16. Bbuku lya Ciyubunuzyo lisinsima kuti “kubusena butegwa Amagedoni mu Chihebrayo,” “bami bamunyika yoonse” bayoobungana “antoomwe kunkondo yabuzuba bupati bwa Leza Singuzuzyoonse.”​—Ciyubunuzyo 16:14.

Ino mbaani ibayoolwana lya Amagedoni? Jesu Kristo uyoosololela basikalumamba bakujulu kutegwa bazunde basinkondonyina Leza. (Ciyubunuzyo 19:11-​16, 19-​21) Basinkondo aaba babikkilizya baabo ibakazya bweendelezi bwa Leza alimwi ibasampaula Leza.​—Ezekieli 39:7.

Sena nkondo ya Amagedoni iyoolwaninwa ku Middle East? Peepe. Muciindi cakubeda buyo kubusena bomwe, nkondo ya Amagedoni inooli yanyika yoonse.​—Jeremiya 25:32-​34; Ezekieli 39:17-​20.

Ibbala lya Amagedoni, zimwi ziindi ililembwa kuti “Har–​Magedoni” (Mu Chihebrayo Har Meghiddohnʹ), lyaamba “Cilundu ca Megido.” Megido wakali munzi mucooko ca Israyeli wansiku. Mumakani aakaindi kwaambwa kuti nkondo zyakali kulwanwa mubusena oobu, kubikkilizya azyeezyo izilembedwe mu Bbaibbele limwi nkamu imwi yazunda. (Babetesi 5:​19, 20; 2 Bami 9:​27; 23:29) Nokuba boobo, Amagedoni inga tiiyaamba busena bwini ibuli afwaafwi a Megido wansiku. Kunyina cilundu cipati kubusena oobu, alimwi aabo boonse ibayoolwana Leza tabakonzyi kukkwana nomuba mubusena ibuli afwaafwi, nkokuti Kkuti lya Jezreeli. Muciindi caboobo, Amagedoni nciindi zisi munyika yoonse noziyoobungana ciindi camamanino kulwana bweendelezi bwa Leza.

Ino zintu zinooli buti lya Amagedoni? Nokuba kuti tatuzyi Leza mbwayoobelesya nguzu zyakwe, pele unoojisi zibelesyo zyankondo izili mbuli zyeezyo nzyaakali kubelesya kaindi​—civwulamabwe, muzuzumo, mvwula iilobya zintu, mulilo asulufa, tulabo, alimwi amalwazi. (Jobu 38:22, 23; Ezekieli 38:19, 22; Habakuku 3:​10, 11; Zekariya 14:12) Kabanyongene, basinkondonyina Leza bamwi bayoojayana mulicabo, pele bayoozyiba kuti ngu Leza uuli mukubalwana.​—Ezekieli 38:21, 23; Zekariya 14:13.

Sena Amagedoni nganooli mamanino aanyika? Tanooli mamanino aanyika nkaambo nyika eeyi ngomunzi wabantu walyoonse alyoonse. (Intembauzyo 37:29; 96:10; Mukambausi 1:4) Muciindi cakunyonyoona bantu boonse, Amagedoni iyoobafwutula, nkaambo “nkamu mpati” yababelesi ba Leza iyoofwutuka.​—Ciyubunuzyo 7:​9, 14; Intembauzyo 37:34.

Kunze lyakupandulula nyika, ibbala lyakuti “nyika” mu Bbaibbele zimwi ziindi lyaamba bantu babyaabi ibakazya Leza. (1 Johane 2:​15-​17) Munzila eeyi, Amagedoni iyooleta “mamanino aanyika.”​—Matayo 24:3, King James Version.

Ino Amagedoni iyooba lili? Ciindi Jesu naakali kubandika makani ‘aamapenzi mapati’ aayoosololela kunkondo ya Amagedoni, wakaamba kuti: “Kujatikizya buzuba oobo alimwi aciindi kunyina uuzyi pe, nobaba bangelo kujulu naba Mwana, pele buyo Taata alikke.” (Matayo 24:21, 36) Nokuba boobo, Bbaibbele litondezya kuti Amagedoni iyooba ciindi cakubako kwa Jesu, ikwakatalika mu 1914.​—Matayo 24:37-​39.