Bwiinguzi bwamu Bbaibbele

Ibbala lyakuti “kufwutula” alimwi alyakuti “lufwutuko” zimwi ziindi alabelesyegwa abasikulemba Bbaibbele kwaamba kuti muntu wafwutulwa kuntenda naa kulunyonyooko. (Kulonga 14:13, 14; Milimo 27:20) Pele kanji-kanji, mabala aaya aamba kufwutulwa kucibi. (Matayo 1:​21) Mbwaanga lufwu lulaboola akaambo kacibi, bantu ibafwutulwa kucibi balijisi bulangizi bwakupona kukabe kutamani.​—Johane 3:​16, 17. *

Ino ninzila nzi iitola kulufwutuko?

Kutegwa mukafwutuke, mweelede kuba alusyomo muli Jesu alimwi akulutondezya lusyomo oolo kwiinda mukumvwida milawo yakwe.​—Milimo 4:​10, 12; Baroma 10:​9, 10; Bahebrayo 5:9.

Bbaibbele lyaamba kuti mweelede kutondezya kuti mulamvwida kwiinda mumulimo yanu, kutegwa mubonwe kuti lusyomo lwanu talufwide. (Jakobo 2:​24, 26) Nokuba boobo, eeci tacaambi kuti mulakonzya kujana lufwutuko. Lufwutuko “ncipego buyo ca Leza” ncapa kwiinda “muluzyalo” lwakwe naa “luse.”​—Baefeso 2:​8, 9.

Sena tulakonzya kwaalilwa kufwutuka?

Inzya. Mbubwenya mbuli muntu iwafwutulwa kukunyikila mbwakonzya kuwa naa kusotokela mumaanzi alimwi, imuntu wafwutulwa kucibi pele iwaalilwa kuzumanana kuba alusyomo takonzyi kufwutuka. Akaambo kaceeci, Bbaibbele likulwaizya Banakristo ibakatambula lufwutuko kuti ‘bayume kulwanina lusyomo.’ (Juda 3) Alimwi licenjezya baabo bakafwutulwa kuti: “Amuzumanane kubelekela lufwutuko lwanu cakuyoowa akukankama.”​—Bafilipi 2:​12.

Ino nguni Mufwutuli​—Leza naa Jesu?

Ibbaibbele lyaamba Leza kuti ngokasensa kalufwutuko, alimwi kanji-kanji limwaamba kuti “Mufwutuli.” (1 Samuele 10:19; Isaya 43:11; Tito 2:​10; Juda 25) Kuyungizya waawo, Leza wakabelesya bamaalumi baindene-indene kufwutula bana Israyeli bakaindi, alimwi Bbaibbele libaamba kuti “basikufwutula.” (Nehemiya 9:​27; Babetesi 3:​9, 15; 2 Bami 13:5) * Mbubwenya buyo, mbwaanga Leza ulafwutula kucibi kwiinda mucituuzyo cacinunuzyo ca Jesu Kristo, Bbaibbele lyaamba Jesu kuti “Mufwutuli.”​—Milimo 5:​31; Tito 1:4. *

Sena bantu boonse bayoofwutuka?

Peepe, bamwi tabakafwutuki pe. (2 Batesalonika 1:9) Ciindi Jesu naakabuzyigwa kuti, “Sena masimpe kuti aabo ibayakufwutuka banooli buyo basyoonto?” wakaingula kuti: “Amubeleke canguzu kuti munjile mumulyango uusyanikide, nkaambo ndimwaambila kuti banji bayooyanda kunjila, pele bayookakilwa.”​—Luka 13:23, 24.

Twaambo tutaluzi kujatikizya kufwutuka kwabantu boonse

Kaambo kataluzi: Lugwalo lwa 1 Bakorinto 15:22 luyiisya kuti bantu boonse bayoofwutuka kwiinda mukwaamba kuti “muli Kristo boonse bayoopegwa buumi.”

Kaambo kaluzi: Makani aajatikizya kapango aaka aamba bubuke. (1 Bakorinto 15:12, 13, 20, 21, 35) Aboobo majwi aakuti “muli Kristo boonse bayoopegwa buumi” apandulula buyo kuti boonse ibayoobusyigwa bayootambula cilongezyo eeci kwiinda muli Jesu Kristo.​—Johane 11:25.

Kaambo kataluzi: Lugwalo lwa Tito 2:​11 luyiisya kuti bantu boonse bayoofwutuka kwiinda mukwaamba kuti Leza ‘uleta lufwutuko kubantu boonse.’

Kaambo kaluzi: Bbala lya Chigiriki ilyakasandululwa kuti “boonse” mukapango aaka alimwi lilakonzya kwaamba “musyobo uuli woonse naa baindene-indene.” * Aboobo, bupanduluzi buluzi bwalugwalo lwa Tito 2:​11 mbwakuti Leza wapa kuti bantu boonse bakonzye kujana lufwutuko, kubikkilizya abantu “ibazwa muzisi zyoonse, mumisyobo yoonse, mumikowa yoonse alimwi amumilaka.”​—Ciyubunuzyo 7:​9, 10.

Kaambo kataluzi: Lugwalo lwa 1 Petro 3:9 luyiisya kuti bantu boonse bayoofwutuka kwiinda mukwaamba kuti Leza “tayandi kuti muntu uuli woonse anyonyoonwe.”

Kaambo kaluzi: Leza uyanda kuti bantu bakafwutuke, pele tabasinikizyi kuzumina lufwutuko lwakwe. ‘Buzuba bwakwe bwalubeta’ buyoobikkilizya ‘alunyonyooko lwabantu basampaula Leza.’​—2 Petro 3:7.

^ munc. 3 Bbaibbele lyaamba kuti muntu ‘wafwutulwa’ nokuba kuti lufwutuko lwini-lwini kuzwa kucibi alufwu lucili kumbele.​—Baefeso 2:5; Baroma 13:11.

^ munc. 10 Mutupango itwabikkwa, busanduluzi bumwi bubelesya mabala aakuti “mwiiminizi,” “muvwuni,” “musololi,” naa “umwi muntu” muciindi cakwaamba kuti “mufwutuli.” Nokuba boobo, mumalembe aakusaanguna aamu Bbaibbele aa Chihebrayo, ibbala ndimunya eeli lilibelesyedwe kwaamba bantu aaba basikufwutula mbubwenya mbolibelesyedwe mutupango tumbi twamu Bbaibbele ciindi nolyaamba Jehova Leza kuti Mufwutuli.​—Intembauzyo 7:​10.

^ munc. 10 Izina lyakuti Jesu lizwa kuzina lya Chihebrayo lyakuti Yehoh·shuaʽ, ilyaamba kuti “Jehova Ndufwutuko.”

^ munc. 17 Amubone Vine’s Complete Expository Dictionary of Old and New Testament Words. Ndimunya bbala eeli lya Chigiriki lilajanika mulugwalo lwa Matayo 5:​11, ilwaamba majwi aa Jesu aakuti bantu bayakwaamba “zintu zibi ziindene-indene” kujatikizya basikumutobela.