Bwiinguzi bwamu Bbaibbele

Kubbapatizyigwa nkubbizya muntu mumaanzi alimwi akumugwisya. * Nkakaambo kaako Jesu ncaakabbapatizyigwa mumulonga wakali amaanzi manji. (Matayo 3:​13, 16) Mbubwenya buyo, mwaalumi muna Etiopiya wakalomba kubbapatizyigwa nobakasika “abusena aakali maanzi.”​—Milimo 8:​36-​40.

Ncocaamba kubbapatizyigwa

Bbaibbele likozyanisya lubbapatizyo kukuzikkwa. (Baroma 6:4; Bakolose 2:​12) Kubbapatizyigwa mumaanzi caamba kuti muntu wafwa kubukkale bwakwe bwakaindi akutalika bukkale bupya kali Munakristo uulyaabide kuli Leza. Kubbapatizyigwa alimwi antaamu izisololela kukubbapatizyigwa mbubambe bwa Leza bwakuti muntu abe amanjezyeezya aasalala akaambo kalusyomo lwakwe mucituuzyo ca Jesu Kristo. (1 Petro 3:​21) Aboobo, Jesu wakayiisya kuti basikwiiya bakwe beelede kubbapatizyigwa.​—Matayo 28:19, 20.

Sena kubbapatizyigwa mumaanzi kusalazya zibi?

Peepe. Bbaibbele liyiisya kuti bulowa bwa Jesu ibwakatilwa mbobukonzya kusalazya zibi zyesu. (Baroma 5:​8, 9; 1 Johane 1:7) Nokuba boobo, kutegwa agwasyigwe acituuzyo ca Jesu, muntu weelede kuba alusyomo muli Jesu, kucinca bukkale bwakwe kutegwa bweendelane anjiisyo zya Jesu, alimwi akubbapatizyigwa.​—Milimo 2:​38; 3:​19.

Sena Bbaibbele liyiisya kuti bana bamvwanda beelede kubbapatizyigwa?

Peepe, taliyiisyi boobo. Muzeezo wakubbapatizya mwana muvwanda tauko mu Bbaibbele. Basizikombelo bamwi balaacilengwa cakubbapatizya bana bavwanda (kwiinda mukubasansaila naa kubatila maanzi amutwe) mpoonya akubaulika zina. Lubbapatizyo lwa Bunakristo ndwabaabo ibasika aciimo cakumvwisya alimwi akwaasyoma ‘makani mabotu aa Bwami bwa Leza.’ (Milimo 8:​12) Kuliswaangene akumvwa jwi lya Leza, kulizumina, alimwi akweempwa, zintu nzyatakonzyi kucita mwana musyoonto.​—Milimo 2:​22, 38, 41.

Kuyungizya waawo, Bbaibbele litondezya kuti Leza ubona bana basyoonto ba Banakristo kuti balasalala, naa banyina cibi mumeso aakwe, akaambo kakusyomeka kwabazyali babo. (1 Bakorinto 7:​14) Ikuti naa kubbapatizyigwa kwabana basyoonto kuli kabotu, bana aabo nobatali kuyandika kwiimininwa amuntu uumbi. *

Makani aataluzi kujatikizya lubbapatizyo lwa Bunakristo

Makani aataluzi: Kusansaila naa kumutila maanzi muntu cili buyo kabotu nkaambo ncimwi buyo akumubbizya mumaanzi.

Makani aaluzi: Lubbapatizyo loonse lwaambidwe mu Bbaibbele lwakali kubikkilizya kubbila buya mumaanzi. Mucikozyanyo, ciindi sikwiiya Filipo naakali kuyanda kubbapatizya mwaalumi muna Etiopiya, “bakaseluka akunjila mumaanzi” akumubbapatizya. Kumane, ‘bakazwa mumaanzi.’​—Milimo 8:​36-​39. *

Makani aataluzi: Bbaibbele litondezya kuti bana basyoonto bakali kubikkilizyigwa ciindi banamukwasyi boonse nobakali kubbapatizyigwa. Mucikozyanyo, kujatikizya mulindizi wantolongo waku Filipi Ibbaibbele lyaamba kuti: “Walo abamuŋanda yakwe boonse bakabbapatizyigwa.”​—Milimo 16:31-​34.

Makani aaluzi: Cibalo icitondezya kusanduka kwamulindizi wantolongo caamba kuti aabo bakabbapatizyigwa bakalimvwisya “jwi lya Jehova” alimwi akuti “bakakondwa kapati.” (Milimo 16:32, 34) Twaambo ootu tutondezya kuti kunyina bana basyoonto ibamuŋanda yamulindizi wantolongo ibakabbapatizyigwa, nkaambo tiibakali kukonzya kumvwisya jwi lya Jehova.

Makani aataluzi: Jesu wakayiisya lubbapatizyo lwabana basyoonto kwiinda mukwaamba kuti Bwami mbwabana basyoonto.​—Matayo 19:13-​15; Marko 10:13-​16.

Makani aaluzi: Jesu tanaakali kubandika zyalubbapatizyo ciindi naakaamba majwi aayo. Muciindi caboobo, wakali kutondezya kuti aabo beelela mu Bwami bwa Leza beelede kuba mbuli bana, ibabombe alimwi bayiisyika.​—Matayo 18:4; Luka 18:16, 17.

^ munc. 3 Ibbala lya Chigiriki lyakasandululwa kuti “lubbapatizyo” lizwa kubbala lyaamba “kubbizya.” Amubone bbuku Theological Dictionary of the New Testament, Volume I, peeji 529.

^ munc. 10 Ibbaibbele liitwa kuti The International Standard Bible Encyclopedia, lyaamba kuti “kunyina makani aajanika mu Cizuminano Cipya aamba kujatikizya kubbapatizyigwa kwabana basyoonto.” Alimwi lyaamba kuti cilengwa eeci cakatalika akaambo “kamakani aataluzi kujatikizya kubbapatizyigwa,” wakuti lubbapatizyo lusalazya zibi.​—Volume 1, peeji 416-​417.

^ munc. 13 Mubbuku litegwa New Catholic Encyclopedia ansi aamutwe wakuti “Baptism” lyaamba kuti: “Tacidoonekwi kuti lubbapatizyo ilwakali kucitwa mu Cikombelo cakusaanguna lwakali lwakubbizya buya mubili woonse.”—Volume 2, peeji 59.