Bwiinguzi bwamu Bbaibbele

Mu Bbaibbele, ibbala lya Chigiriki ilyakasandululwa kuti “kulekelela” lyaamba “kuleka buyo,” mbubonya mbuli muntu mbwakonzya kucileka buyo cikwelete kuti citabbadelwi. Jesu wakacibelesya cikozyanyo eeci ciindi naakayiisya basikumutobela kupaila kuti: “Kotulekelela zibi zyesu, nkaambo andiswe tulabalekelela boonse ibajisi milandu kulindiswe.” (Luka 11:4) Mbubwenya buyo, mucikozyanyo camuzike uutakwe lweetelelo, Jesu wakatondezya kuti kulekelela kuli mbuli kulekelela cikwelete.​—Matayo 18:23-​35.

Ciindi notutababikkilili bamwi alimwi anotutalimvwi kuti beelede kucita cintu cimwi akaambo kakuti bakatubisyizya, nkokuti tulalekelela. Bbaibbele liyiisya kuti luyando lwini-lwini mpaayeeme kulekelela kwini-kwini, mbwaanga luyando “talubikkilili.”​—1 Bakorinto 13:​4, 5.

Kulekelela tacaambi

  • Kuubyaubya cibi cacitika. Alimwi buya Bbaibbele talibakkomanini aabo ibaamba kuti micito mibi taakwe mboibede naa ibaamba kuti ili buyo kabotu.​—Isaya 5:20.

  • Kulipanga mbuli kuti kunyina cibi icacitika. Nokuba kuti Leza wakamulekelela Mwami Davida kujatikizya zibi zipati nzyaakacita, tanaakamukwabilila kumapenzi aakaboola akaambo kazibi nzyaakacita. Alimwi buya Leza wakapa kuti zibi zya Davida zilembwe kutegwa katuziyeeya mazuba aano.​—2 Samuele 12:​9-​13.

  • Kulekela bamwi kuti kabamudyaaminina. Mucikozyanyo, atwaambe kuti mwakweletesya muntu mali mpoonya waabelesya munzila iitaluzi akwaalilwa kuzuzikizya cisyomezyo cakwe cakwaapilusya. Mpoonya wausa kapati akulilekelela. Mulakonzya kusala kumulekelela kwiinda mukutamubikkilila, kutaabusya makani aaya lyoonse, alimwi ambweni akwaaluba buyo makani aacikwelete. Nokuba boobo, mulakonzya kusala kutamukweletesya limbi mali.​—Intembauzyo 37:21; Tusimpi 14:15; 22:3; Bagalatiya 6:7.

  • Kujatila buyo muntu kakunyina kaambo. Leza tabalekeleli bantu ibacita cibi acaali kabajisi makanze aakujaya zina lyaumwi, aabo ibakaka kulubizya kwabo, ibatayandi kucinca alimwi ibakaka kulilekelela kubantu mbobabisizya. (Tusimpi 28:13; Milimo 26:20; Bahebrayo 10:26) Bantu bali boobu ibateempwi baba basinkondonyina Leza, alimwi Leza tatwaambili kuti tuyandika kubalekelela aabo mbaatalekelela.​—Intembauzyo 139:21, 22.

    Ino inga mwacita buti ikuti kuli muntu uumubisizya mpoonya ulakaka kulilekelela alimwi ambweni tayandi buya akuzumina ncaakacita? Bbaibbele likulwaizya kuti: “Koleka kunyema abukali.” (Intembauzyo 37:8) Nokuba kuti tacaambi kuti mulikkomene acakacitika, mulakonzya kusala kutaciindizya kunyema. Amusyome Leza kuti uyoomubeteka muntu ooyo. (Bahebrayo 10:30, 31) Alimwi mulakonzya kuumbulizyigwa kuzyiba kuti kuyooba ciindi Leza nayoopa kuti katutamvwi kucisa nkotumvwa lino naa kuusa akaambo kazintu zicitika lino.​—Isaya 65:17; Ciyubunuzyo 21:4.

  • “Kulekelela” twaambo tutayi komoonga. Zimwi ziindi, muciindi cakulimvwa kuti tweelede kulekelela umwi, inga cabota kuzumina kuti kunyina akaambo keni ikatupede kunyema. Bbaibbele lyaamba kuti: “Utafwambaani kunyema pe, nkaambo kunyema-nyema ncitondezyo camufwubafwuba.”​—Mukambausi 7:9, bupanduluzi buyungizyidwe.

Mbomukonzya kulekelela bamwi

  1. Amuzyibe cijatikizyidwe mukulekelela. Takuli kuti muubya-ubya cibi cakacitika naa kulipanga mbuli kuti kunyina cibi cakacitika pe, caamba buyo kuti mwasala kwaaleka buyo makani.

  2. Amuzyibe bubotu buboola akaambo kakulekelela. Kutabikkilila bamwi alimwi akutanyema zilakonzya kumugwasya kubatama, kupona buumi buli kabotu alimwi akuyungizya lukkomano lwanu. (Tusimpi 14:30; Matayo 5:9) Kuyungizya waawo, kulekelela bamwi kupa kuti Leza awalo atulekelele zibi zyesu.​—Matayo 6:​14, 15.

  3. Amweetelele. Toonse buyo tatulondokede. (Jakobo 3:2) Mbubwenya mbotubotelwa kuti umwi watulekelela, andiswe tweelede kubalekelela bamwi.​—Matayo 7:​12.

  4. Amulange twaambo kweelana abwini mbotubede. Ikuti katujisi kaambo katayi komoonga katupa kutongooka, tulakonzya kutobela lulayo lwamu Bbaibbele lwakuti: “Amuzumanane kweengelelana.”​—Bakolose 3:​13.

  5. Mutanoowayi-wayi kulekelela. Muciindi cakubikkilila, kamusolekesya kulekelela bamwi kakutanainda ciindi cilamfwu.​—Baefeso 4:​26, 27.