Bakubusi banji tabalibiliki kujatikizya kulanganya bazyali babo. Kayi, inga kucili myaka kuti bazyali babo basike mpobatalika kuciswa-ciswa.

Pele ino mbuti kuti bauso naa banyoko baciswa kamutanakomena? Amulange-lange bakubusi bobilo ibakajisi buyumuyumu.

 Cakuluula ca Emmaline

Bamaama baciswa bulwazi bwa Ehlers-Danlos syndrome (EDS), mbuwazi ibutola ciindi cilamfwu alimwi ibucisa bwalo ibulwana manungo, lukanda alimwi ansinga zyabulowa.

Bulwazi oobu tabusilikiki, alimwi buumi bwabamaama bwaindila kunyongana mumyaka iili 10 yainda. Mubwini, ziindi zimwi kudunta kwamoyo kwali kuunka ansi kapati cakuti buumi bwabo bwakali kuba muntenda alimwi zimwi ziindi bakali kumvwa kucisa kapati cakuti tiibakacili kuyanda kuzumanana kupona.

Mebo amukwasyi wangu tuli Bakamboni ba Jehova, alimwi mbungano yesu ilatuumbulizya toonse! Mucikozyanyo, caino-ino musimbi umwi wamusela wangu wakatuma kkaadi kumukwasyi wesu kutwaambila mbwatuyanda alimwi akutusyomezya kuti tulakonzya kulangila lugwasyo lwakwe. Ncibotu kapati kuba amulongwe mbuli yooyu!

Bbaibbele lyandigwasya kapati. Mucikozyanyo, lugwalo lumwi ndondiyandisya ndugwalo lwa Intembauzyo 34:18 ilwaamba kuti: “Jehova ulaafwaafwi abaabo batyompedwe mumoyo.” Alumbi, ndugwalo lwa Bahebrayo 13:⁠6, ilwaamba kuti: “Jehova ngomugwasyi wangu; tandikooyoowa pe.”

Lugwalo oolu lwamamanino lulandigwasya kapati. Ncondilibilika kapati ncakuti bamaama bayakufwa. Ndilabayanda kapati, alimwi ndilalumba kapati akaambo kakuba ambabo buzuba bumwi abumwi. Kapango aako kamu Bbaibbele kandigwasya kuzyiba kuti ndilakonzya kuyuma akaambo kazintu ziboola kumbele, kunyina makani naa zintu nzi.

Pele alimwi kuli cimbi ncondilibilika. Mbocibede, bulwazi bwa EDS mbwamubulowa. Bamaama bakabujana kuli bakaapa, pele mebo ndakabujana kuli bamaama. Mbombubo​—Andime ndilibujisi bulwazi bwa EDS. Pele lugwalo lwa Bahebrayo 13:6 lundisyomezya kuti Jehova unooli “mugwasyi wangu” mulubazu oolu alwalo.

Calino, ndilalumba nzyondijisi lino alimwi akutabikkila maano zyamusyule​—naa kulibilika kujatikizya zyakumbele. Ndilakonzya kutyompwa kapati ikuti ndatalika kweezyanisya nzyobatakonzyi kucita bamaama azyeezyo nzyobakali kukonzya kucita kaindi. Bbaibbele lyaamba kuti masunko ngotujana “ngakaindi buyo kaniini alimwi mauba-uba” tweezyanisya abulangizi bwabuumi butamani nokunoonyina kuciswa.​—2 Bakorinto 4:​17; Ciyubunuzyo 21:​1-4.

Ncomweelede kuyeeya: Ncinzi cimugwasya Emmaline kuzilanga kabotu zintu? Mbuti mbomukonzya kuzumanana kuzilanga kabotu zintu ciindi nomujisi mapenzi?

 Cakuluula ca Emily

Ciindi nindakacili kucikolo, bataata bakaciswa bulwazi bwakutyompwa. Cakali mbuli kuti bataata bakaunka kumbi ple ndikkala amuntu uumbi buyo. Kuzwa leelyo, bataata baluuside, balayoowa, alimwi akulibilika. Bali mubukkale oobu kwamyaka iili 15 lino. Akaka cilacisa kapati kuusa, nokuba kuti balizyi kuti kunyina kaambo kaya koomoonga kabapa kulimvwa boobo!

Tuli Bakamboni ba Jehova, alimwi bantu mbotuswaangana limwi mumbungano batugwasya kapati. Bakombima balatweetelela alimwi balatumvwisya, alimwi kunyina uupa bataata kulimvwa kuti tabajisi mulimo mumbungano. Kubona bataata mbobaliyumya musunko eeli cindipa kubayanda kapati kwiinda lyoonse.

Ndilabayeeya bataata bakaindi, balo ibatakali kulibilika, batakali kupenga, pele bakakkomene. Ndilimvwa bubi kuti buzuba abuzuba balalwana mumizeezo asinkondo ngobataboni.

Nokuba boobo, bataata balasolekesya kuzibona kabotu zintu. Aciindi cimwi nobakatyompedwe kapati, bataata bakali kusoleka canguzu kulibala Bbaibbele abuzuba, nokuba kuti twakali tupango buyo tusyoonto. Eeci cakabayumya kapati. Pulogilamu eeyi nsyoonto njobakajisi yakabafwutula. Aciindi eeci cakali kuusisya kapati, ndakabayanda kapati bataata.

Ndilaluyanda lugwalo lwa Nehemiya 8:​10, ilwaamba kuti: “Lukkomano lwa Jehova ndolumuyumya.” Aaya masimpe. Ciindi nondili kumiswaangano, akutola lubazu cabusungu, ndilakkomana kapati muciindi cakuusa. Ilukkomano oolu lupa kuti buzuba boonse kandilimvwa kabotu. Cikozyanyo cabataata candiyiisya kuti kufwumbwa buyo mapenzi ngondikonzya kujana, Jehova unoondigwasya lyoonse.

Ncomweelede kuyeeya: Ino Emily wakabagwasya buti bausyi ciindi nobakali kuciswa? Ino inga mwamugwasya buti muntu uujisi bulwazi bwakutyompwa?