Ziindi zyobilo munsondo, Bakamboni ba Jehova balaba amiswaangano kumasena aabo aakukombela aaitwa kuti Maanda aa Bwami. Ncinzi cicitika, alimwi mbuti mbomukonzya kugwasyigwa kuti mwajanika?

 Ncinzi cicitika ku Ŋanda ya Bwami?

Ŋanda ya Bwami mbusena bwakuyiiyila njiisyo zyamu Bbaibbele zigwasya. Miswaangano iicitwa kumasena aaya bulakonzya kumugwasya:

  • kwiiya kasimpe kujatikizya Leza.

  • kumvwisya ncozyaamba zintu zicitika munyika.

  • kuba muntu uuli kabotu.

  •  kujana balongwe bainda kubota.

Sena mulizyi? Busena nkobaswaanganina Bakamboni ba Jehova bwiitwa kuti Ŋanda ya Bwami akaambo kakuti makani manji aabandikwa ajatikizya Bwami bwa Leza.​—Matayo 6:​9, 10; 24:14; Luka 4:​43.

 Nkaambo nzi ncomweelede kujanika?

Makani ngomuyakwiiya ayoomugwasya. Njiisyo zyamu Bbaibbele zibandidwa kumiswaangano ya Bakamboni ba Jehova ziyoomugwasya ‘kulijanina busongo.’ (Tusimpi 4:5) Eeci caamba kuti Bbaibbele lilakonzya kumugwasya kusala kabotu mubuumi. Alimwi lilakonzya kumugwasya kujana bwiinguzi kumibuzyo iiyandika kapati mubuumi, mbuli yakuti:

Mitwe yamakani iitobela ili akati kamitwe yamakani aapegwa kumiswaangano yamukati kansondo:

  • Nkaambo nzi Ncotweelede Kusololelwa a Bbaibbele?

  • Nkuli Nkomukonzya Kujana Lugwasyo Muciindi Camapenzi?

  • Bwami bwa Leza Ncobutucitila Lino.

“Sicikoloma wakaboola kumiswaangano. Wakakkala antoomwe amukwasyi wesu, alimwi twakamupa mabbuku eesu. Noyakamana miswaangano, wakandaambila kuti wakabukkomanina kapati bwiinguzi mbobakali kupa bantu ciindi camibandi abaswiilizi. Alimwi wakaamba kuti kuccecci kwabo tabajisi mabbuku manji mbuli ngotujisi swebo.”​—Brenda.

Sena mulizyi? Miswaangano taibbadelelwi pe alimwi kunyina milumbo iibwezyegwa.

Muyookulwaizyigwa akuyanzana kubotu. Bbaibbele lyaamba kuti kaambo kamwi Banakristo ncobeelede kuswaangana antoomwe ‘nkukulwaizyanya umwi amweenzinyina.’ (Bahebrayo 10:24, 25) Kuyanzana kubotu abantu babikka Leza abeenzinyina mubusena bwakusaanguna cilakatalusya munyika eeyi bantu mobaliyanda.

“Kumamanino aabuzuba, inga ndilimvwa kuusa akukatala, pele bantu ku Ŋanda ya Bwami bandipa kulimvwa kabotu. Ciindi nondipiluka kuŋanda kuzwa kumiswaangano, inga ndilikkomene akulimvwa kuti ndililibambilide kutalika mulimo umwi.”​—Elisa.

Sena mulizyi? Kuli mbungano ziinda ku 120,000 zya Bakamboni ba Jehova nyika yoonse, balaswaangana mumasena aainda ku 60,000. Mwaka amwaka, mweelwe waakati-kati wa Maanda aa Bwami aabalilwa ku 1,500 alayakwa nkaambo mweelwe wabasikwaabelesya uyaabutanta. *

^ munc. 27 Kutegwa mujane busena bwakuswaanganina, amuunke aalembedwe kuti “Miswaangano Yambungano ya Bakamboni ba Jehova” akutyanka acibeela cakuti “Amujane Busena Buli Afwaafwi Ankomukkala.”