Ibbaibbele likulwaizya ‘kutaciindizya muzilengwa.’ (1 Timoteyo 3:2) Eeci cibikkilizya mbomulya. Aboobo, amusole nzila eezyi zitobela.

Kuti naa mwakkuta mweelede kuzyiba. Julia uujisi myaka yakuzyalwa iili 19 wakaaamba kuti: “Ndakali kubalila ma calories aali mucakulya, pele lino muciindi cakucita boobo kufwumbwa ndalimvwa kuti ndakkuta ndilaleka kulya.

Mutanoolyi zyakulya zitajisi busani bubotu. Peter uujisi myaka yakuzyalwa iili 21 wakaamba kuti: “Akaambo kakutanywa zyakunywa zili carbonated, ndakaluza makkilo osanwe mumwezi omwe buyo!

Amucince mbomulya. Erin uujisi myaka yakuzyalwa iili 19 wakaamba kuti: “Ndanoolya ndilasola kutabweza cakulya alimwi.

Mbomunga Mwazwidilila: Mutanoosotaukili kulya. Kuti kamucita oobo, munoofwa nzala mpoonya akuciindizya kulya mwapegwa coolwe.

Masimpe, bamwi bantu ibaamba kuti “Ndeelede kucesya mubili” mubwini tabeelede kucita oobo. Bali buyo kabotu mbubwenya oobo mbobabede. Nokuba boobo, mbuti kuti kamuyanda kucesya mubili asyoonto? Nceeci cakagwasya musimbi wiitwa kuti Catherine.

“Ndakali mukubusi uuneneede kapati, cintu ncondatakali kuyanda. Tiindakakkomene ambondakali kulibonya!

“Ciindi aciindi, ndakali kusola kucesya mubili kwiinda mukusala zyakulya, pele ndakali kuneneya alimwi. Aboobo nondakali amyaka iili 15 yakuzyalwa, ndakabona kuti ndakeelede kubikkila maano. Ndakayanda kucesya mubili munzila yeelede—nzila njendikonzya kutobela mubuumi bwangu boonse.

“Ndakaula bbuku lyaamba zyakulya zijisi busani bubotu alimwi azisobano zyakunyanyaasya mubili, mpoonya ndakazitobela nzyondakabala mubbuku eeli. Ndakalikanzide cakuti nokuba kuti ndakali kwaalilwa naa kutyompwa zimwi ziindi, pele tiindakacileka pe.

“Sena mulizyi cakacitika? Ndakacikonzya! Nikwakainda mwaka omwe buyo ndakaluza makkilo aali 27. Lino kwainda myaka yobilo kandicili mbubwenya oobu. Eelo kaka tiindakalizyi kuti inga cacitika!

“Ndiyeeya kuti cakandipa kuzwidilila nkaambo kakuti tiindakali kusala buyo zyakulya—pele ndakacinca bukkale bwangu boonse.”—Catherine, 18