Ncomukonzya kucita

Amubandike ambabo zyintu nzyomulibilika. Amubaambile bazyali banu mbomuuside naa mbomunyongene. Ambweni balakonzya kumupandulwida cicitika kutegwa mutalibiliki kapati.

Kuti bazyali banu kabatakonzyi kumupa lugwasyo ndomuyandika, mulakonzya kubandika amweenzinyoko uusimide.—Tusimpi 17:17.

Kuyungizya waawo, ulakonzya kumuswiilila Uso wanu wakujulu, ‘sikuswiilila zikombyo.’ (Intembauzyo 65:2) Amumwaambile zili kumoyo wanu nkaambo “ulamubikkila maano.”—1 Petulo 5:7.

Ncomuteelede kucita

Kuluba zyintu zyakamucitikila akaambo kakulekana kwabazyali banu cili mbuli janza lityokede liyaabupona—cilacisa, pele mukuyakwaciindi muyakuluba

Mutababikkilili. Daniel uujisi bazyali ibakalekana kajisi myaka yakuzyalwa iili 7 wakaamba kuti: “Bazyali bangu bakali kuliyanda. Kunyina nobakatuyeeya alimwi ambocakali kuyootujatikizya ncobakacita.””

Ino ncinzi cakali kunoocitikila Daniel kuti naakazumanana kunyema, alimwi akubikkilila?—Kaambo kagwasya: Amubale Tusimpi 29:22.

Nkaambo nzi ncocakali kabotu kuli Daniel ikusola kubalekelela bazyali bakwe akaambo kakumucisya moyo nkobakacita?—Kaambo kagwasya: Amubale Baefeso 4:31, 32.

Amubutantamuke bukkale bukonzya kumunyonyoona. Denny wakaamba kuti: “Tiindakakkomene alimwi ndakalityompedwe kapati ciindi bazyali bangu nobakalekana. Ndakaleka kubikkila maano kucikolo mane ndakafeela mwaka umwi. Mpoonya ... ndakatalika kucita zyintu zisesya basicikoloma mukkilasi akuyanda zyakulwana-lwana.

Ino muyeeya kuti ncinzi ncaakali kuyanda kujana Denny kwiinda mukutalika kucita zyintu zisesya basicikolonyina mukkilasi naa kulwana?

Ino njiisyo iili mulugwalo lwa Bagalatiya 6:7 inga yabagwasya buti bantu bali mbuli Denny kutantamuka bukkale bukonzya kubanyonyoona?

Kunyonganizyigwa mumizeezo citola kaindi kuluba. Nokuba boobo, nomuyaabubeenke mwakkalikila mubuumi bwanu, muyootalika kulimvwa kuti zyintu zimweendela kabotu alimwi.