Sena kuli bumboni buliko bwazintu zyakuvwukkula izyakajanwa izyeendelana amakani aamu Bbaibbele? Mu 2014 magazini iitegwa Biblical Archaeology Review yakajisi mubuzyo wakuti: “Ino bali bongaye bantu mu Bbaibbele lya Chihebrayo ibakasinizyigwa abasikuvwukkula zyakaindi kuti bakaliko ncobeni?” Bwiinguzi bwakapegwa mbwakuti: “Mbantu babalilwa ku 50!” Mwaalumi umwi iwatakajanika mumulongo wacibalo eeco wakali Tatenai. Ino Tatenai wakali ni? Atulange-lange mulimo ngwaakali kubeleka mumakani aamu Bbaibbele.

Aciindi cimwi Jerusalemu wakali kweendelezyegwa abulelo bwabana Persia. Munzi ooyu wakali mubusena bana Persia mbobakali kwiita kuti Kutala aa Mulonga, nkokuti, kumbo lyamulonga wa Firate. Nobakamana kuzunda Babuloni, bana Persia bakabaangulula ba Juda mubuzike akubazumizya kuti bakayakulule tempele lya Jehova mu Jerusalemu. (Ezara 1:1-4) Nokuba boobo, basinkondonyina aba Juda, bakali kukukazya kuyakulula tempele alimwi akutamikizya ba Juda kuti kwiinda mukucita mulimo ooyu bakali kuzangila bana Persia. (Ezara 4:4-16) Mubulelo bwa Dariyo I (522-486 B.C.E.), mupati-pati umwi muna Persia wazina lya Tatenai wakaalanga-langa makani. Bbaibbele limwiita kuti “mweendelezi wa Mutala aa Mulonga.”—Ezara 5:3-7.

Mabwe aali mbwaabede aa cuneiform aajisi zina lya Tatenai akafwutuka kaali cibeela cazintu ziyobolwa mumukwasyi. Bbwe limwi iliswaanganya muntu umwi wamumukwasyi ooyu kubantu baambidwe mu Bbaibbele, ndibbwe lyakalembedwe cisyomezyo cakubbadela mali mumwaka wanamba 20 wabulelo bwa Dariyo I, mu 502 B.C.E. Lilaamba kujatikizya kamboni kucisyomezyo eeci cakubbadela mali kuti mubelesi wa “Tattannu, mweendelezi wa Kutala aa Mulonga” nkokuti nguwenya Tatenai, walo iwaambidwe mubbuku lyamu Bbaibbele lya Ezara.

Ino mwaalumi ooyu wakali kubeleka mulimo nzi? Mu 535 B.C.E., Koresi Mupati wakaapaula masena ngaakali kweendelezya akwaabikka muzyooko, cooko cimwi cakali kwiitwa kuti “Babuloni alimwi Akutala aa Mulonga.” Mukuya kwaciindi, cooko cakaandaanizyigwa muzibeela zyobilo, cimwi cibeela cakali kwiitwa kuti Kutala aa Mulonga. Cakali kubikkilizya a Coele-Syria, Fonike, a Juda alimwi kulangilwa kuti wakali kweendelezya kuzwa mu Damasiko. Tatenai nguwakali kweendelezya cooko eeci kuzwa mu 520 kusika mu 502 B.C.E.

Naakapiluka kuzwa ku Jerusalemu kuyakuvwuntauzya kujatikizya kutamikizyigwa kwakuzangila bweendelezi, Tatenai wakaambila Dariyo kuti ba Juda baamba kuti bakazumizyigwa a Koresi kuti bayakulule tempele lya Jehova. Buvwuntauzi ibwakacitwa muzintu zyakayobodwe muŋanda yamwami bwakakasinizya kaambo aaka. (Ezara 5:6, 7, 11-13; 6:1-3) Aboobo, Tatenai wakalaililwa kuti atabanyonganyi, aboobo wakamvwida.—Ezara 6:6, 7, 13.

Kwaamba masimpe muzintu zyakacitika kaindi, “Tatenai mweendelezi wa Mutala aa Mulonga” kunyina cintu cipati ncaakacita. Nokuba boobo, amubone kuti, Magwalo alamwaamba ikubelesya izina lyeelela lyabulemu. Kaambo aaka kamasimpe katupa kuba abumboni bwakuti cakwiinduluka-induluka zintu zyakuvwukkula zileendelana akululama kwamakani aakaindi aamba zyamu Bbaibbele.