Kana kasimbi kakabona busi kabuzwa muzipaipi zizwida busi izyakali atala aafakitoli alimwi bwakali kuyabwiindila kuvwula cakuti bwakatalika kulibonya mbuli kuti makumbi. Kakayeeya kuti mulimo wafakitoli wakali wakupanga makumbi. Kwiimpya kusyoonto kuli boobu mukumvwisya kwakana aaka kulasesya. Nokuba boobo, kwiimpya kupati mukumvwisya kulakonzya kubujatikizya buumi bwesu. Mucikozyanyo, kutaamvwisya kabotu malailile aali akabbodela kamusamu kulakonzya kuleta ntenda mpati.

Kwiimpya mukumvwisya zintu zyakumuuya kulakonzya kuleta ntenda mpati kwiinda. Mucikozyanyo, bantu bamwi tiibakazimvwisya njiisyo zya Jesu. (Johane 6:48-68) Muciindi cakwiiya zinji, bakazikaka zyoonse nzyaakali kuyiisya Jesu. Eelo kaka ooku kwakali kwiindwa kupati!

Sena mulalibala Bbaibbele kutegwa limusololele? Eeco cili kabotu. Pele sena kuli ntenda yakuti ambweni mulakonzya kwiimpya mukumvwisya kujatikizya cintu cimwi ncomwabala? Eeci cilacitika kubantu banji. Amulange-lange twaambo totatwe tudumide tobaimpya mukumvwisya.

  • Bantu bamwi balaimpya kumvwisya mulawo wamu Bbaibbele wakuti, “koyoowa Leza mwini-mwini.” Bayeeya kuti beelede kumuyoowa Leza akaambo kakuti mukali. (Mukambausi 12:13) Pele Leza tayandi kuti aabo bamukomba kabalimvwa boobo kujatikizya nguwe. Waamba kuti: “Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya.” (Isaya 41:10) Kuyoowa Leza caamba kumupa bulemu kapati.

  • Sena nyika eeyi iyoopya amulilo?

    Bantu bamwi balaimpya kumvwisya majwi aakasololelwa amuuya aakuti: “Zintu zyoonse zilijisi ciindi canzizyo, . . . ciindi cakuzyalwa aciindi cakufwa.” Baamba kuti Leza wakabikkila limwi ciindi cini muntu umwi aumwi nayoofwa. (Mukambausi 3:1, 2) Nokuba boobo, cibalo eeci caamba mbobubede buumi alimwi akuti lufwu ncecintu citucitikila toonse. Alimwi Jwi lya Leza liyiisya kuti zintu nzyotusala zilakonzya kubujatikizya buumi bwesu. Mucikozyanyo, tubala kuti: “Kuyoowa Jehova kupa kupona ciindi cilamfwu.” (Tusimpi 10:27; Intembauzyo 90:10; Isaya 55:3) Munzila nzi? Mucikozyanyo, kulemeka Jwi lya Leza kuyootugwasya kutantamuka micito mibyaabi mbuli bucakolwa alimwi akutalilemeka.—1 Bakorinto 6:9, 10.

  • Bamwi Bbaibbele balimvwa kuti ciindi nolyaamba kuti majulu alimwi anyika “zyabambilwa mulilo,” bayeeya kuti Leza uyakwiinyonyoona nyika eeyi. (2 Petro 3:7) Pele Leza usyomezya kuti kunyina nayakuzumizya kuti nyika eeyi inyonyoonwe. Leza “wakkazikizya nyika antalisyo zyanjiyo ziyumu; kunyina noiyoogwisyigwa abusena bwanjiyo lyoonse alyoonse, mane kukabe kutamani.” (Intembauzyo 104:5; Isaya 45:18) Mbweende bwazintu bupilingene bwanyika eeyi, ibuyakunyonyoonwa cakumaninina mbuli kuti bwanyonyoonwa amulilo, ikutali nyika iini. Pele kujatikizya majulu, ciindi bbala nolibelesyegwa cacigaminina, lilakonzya kwaamba mumulengalenga, kujulu ikuli nyenyezi, naa kubusena nkwakkala Leza. Kunyina busena ibuyakunyonyoonwa akati kamasena aaya.

NKAAMBO NZI BANTU NCOBAIMPYA KUMVWISYA BBAIBBELE ZIINDI ZIMWI?

Mbubwenya mbomwabona muzikozyanyo eezyi, kanji-kanji bantu balaimpya mukumvwisya zibalo nzyobabala mu Bbaibbele. Pele ino nkaambo nzi Leza ncanga wazumizya kuti kacicitika boobo? Bamwi balakonzya kuyeeya kuti: ‘Ikuti naa Leza musongo kwiinda alimwi ulizyi zintu zyoonse, naakatupa bbuku ililembedwe munzila iitakatazyi kumvwa cakuti boonse kabakonzya kulimvwisya. Nkaambo nzi ncaatakacitila boobo?’ Amulange-lange twaambo totatwe tupa kuti kanji-kanji Bbaibbele kabaliimpya mukulimvwisya.

  1. Bbaibbele lyakalembwa munzila yakuti aabo balicesya alimwi ibayanda kwiiya kabakonzya  kulimvwisya. Jesu wakati kuli Bausyi: “Ndakutembaula caantangalala Taata, O Mwami wakujulu aanyika, nkaambo wazisisa cakulomya zintu eezyi kubasongo abacenjede, pele waziyubunwida bana basyoonto.” (Luka 10:21) Ibbaibbele lyakalembwa munzila yakuti aabo balikke bajisi makanze mabotu mbobakonzya kuumvwisya mulumbe wandilyo. Bantu ibalisumpula—bube budumide kubantu ‘basongo abacenjede’—mbobaimpya mukumvwisya Bbaibbele. Pele bantu ibabala Bbaibbele kabajisi bube mbuli ‘bwabana basyoonto’—bwakulicesya alimwi akuyanda kwiiya—mbobalongezyegwa kuumvwisya kabotu mulumbe wa Leza. Eelo kaka Leza wakalibamba kabotu Bbaibbele!

  2. Bbaibbele ndyabantu bayanda camoyo woonse kuti Leza abagwasye kulimvwisya. Jesu wakatondezya kuti bantu bakali kuyandika lugwasyo kutegwa bamvwisye nzyaakali kuyiisya. Ino bakali kuyoolutambula buti lugwasyo oolo? Jesu wakapandulula kuti: “Mugwasyi, nkokuti muuya uusalala, ooyo ngwayootuma Taata muzina lyangu, uyoomuyiisya zintu zyoonse.” (Johane 14:26) Aboobo Leza ulapa muuya wakwe uusalala—nguzu nzyabelesya—kutegwa agwasye bantu kumvwisya ncobabala mu Bbaibbele. Nokuba boobo, Leza tabapi muuya wakwe bantu batamusyomi kuti abagwasye, aboobo kanji-kanji Bbaibbele balibona kuti lilakatazya kumvwisya. Alimwi muuya uusalala ulabakulwaizya Banakristo aabo bajisi luzyibo lunji kutegwa bagwasye baabo bayanda kulimvwisya kapati.—Milimo 8:26-35.

  3. Zibalo zimwi zyamu Bbaibbele zilakonzya kulimvwisya kubantu aciindi buyo ceelede. Mucikozyanyo, musinsimi Daniele wakaambilwa kulemba mulumbe wakumbele. Mungelo wakamwaambila kuti: “Daniele, koabamba majwi aaya abe aamaseseke alimwi kojala bbuku mane kusikila kuciindi cakumamanino.” Kwamyaanda yamyaka yainda, bantu banji bali kulibala bbuku lyamu Bbaibbele lya Daniele pele tiibali kulimvwisya. Mubwini, naba Daniele lwakwe kunyina naakazimvwisya zintu zimwi nzyaakalemba. Cakulicesya wakaamba kuti: “Ndakamvwa, pele tiindakamvwisya pe.” Mukuya kwaciindi, bantu bakali kuyoobumvwisya kabotu businsimi bwa Leza ibwakalembwa a Daniele, pele aciindi buyo ceelede Leza ncaakasalide. Mungelo wakapandulula kuti: “Koya buyo, Daniele, nkaambo majwi aaya ayelede kuba aamaseseke alimwi akujalwa mane kusikila kuciindi cakumamanino.” Ino nguni wakali kuyoomvwisya mulumbe wa Leza? “Kunyina muntu mubi naba omwe uuyoomvwisya; pele aabo basongo bayoomvwisya.” (Daniele 12:4, 8-10) Aboobo Leza kunyina nayubununa bupanduluzi bwazibalo zimwi zyamu Bbaibbele kacitanasika ciindi ceelede.

Sena kutamvwisya ciindi kuli nokwakapede kuti Bakamboni ba Jehova baipye mukumvwasya Bbaibbele? Inzya. Pele ciindi ca Leza nocakasika cakusalazya kaambo, Bakamboni bakacinca kumvwisya kwabo kakunyina kuwayawaya. Aboobo basyoma kuti baiya baapostolo ba Kristo, balo cakulicesya bakacinca kuyeeya kwabo ciindi Jesu naakabalulamika.—Milimo 1:6, 7.

Mizeezo iitaluzi yakana kasimbi kujatikizya nkwaazwa makumbi inga kakuli kwiimpya kusyoonto buyo mukumvwisya. Nokuba boobo, ncoliyiisya Bbaibbele cilayandika kapati kulindinywe. Mulumbe wamu Bbaibbele ncintu ciyandika kapati cakuti tacili cuuba-uba kuumvwisya kwiinda mukulibalila buyo Bbaibbele nobeni. Aboobo amulombe lugwasyo kutegwa mucimvwisye ncomubala. Amubayandaule aabo baiya Bbaibbele kabajisi bube bwakulicesya, ibantu basyoma muuya uusalala wa Leza kutegwa balimvwisye Bbaibbele, ibantu ibasinizyide kuti tupona kuciindi Leza ncayanda kuti tulimvwisye Bbaibbele kwiinda kaindi. Mutawayiwayi kubandika a Bakamboni ba Jehova naa kubala makani aabo aakavwuntauzyigwa kabotu-kabotu aajanika awebbusaiti ya jw.org. Ibbaibbele lisyomezya kuti: “Ikuti woompolole kutegwa ube amaano . . . , ulajana luzyibo lwa Leza.”—Tusimpi 2:3-5.