Ino inga mwawiingula buti mubuzyo ooyu? Bantu banji bayeeya kuti Leza ulaiyanda nkondo. Baamba kuti kaindi Leza wakalailila bakombi bakwe bamwi kuti batole lubazu munkondo; mubwini Bbaibbele lilaamba kuti wakacita oobo. Nokuba boobo, bamwi baamba kuti Mwana wa Leza, Jesu, wakayiisya basikumutobela kuyanda basinkondonyina. (Matayo 5:43, 44) Aboobo bayeeya kuti aciindi cimwi Leza wakacinca mbwalimvwa kujatikizya nkondo alimwi akuti mazuba aano taiyandi nkondo.

Ino nywebo muyeeya buti? Sena Leza ulaiyanda nkondo? Ikuti naa ulaiyanda, ino inga uba kulubazu lwani mumazwanga aacitika mazuba aano? Ikuzyiba bwiinguzi kumibuzyo eeyi kulakonzya kumugwasya kuyeeyesya mbomulimvwa kujatikizya nkondo. Mucikozyanyo, ikuti mwazyiba kuti Leza ulaiyanda nkondo alimwi akuti uli kulubazu nkomubede, cakutadooneka mulakonzya kukkomana kujatikizya makani aaya, kamusyomede kuti mulazunda kulubazu nkomubede. Kulubazu lumwi, ino inga mwalimvwa buti ikuti mwazyiba kuti Leza uli kulubazu lwabasinkondonyoko? Cakutadooneka mulakonzya kucinca mbomuyeeya kujatikizya makani aaya.

Kuli cintu ciyandika kapati ncotweelede kuyeeya mumakani aaya. Ikuzyiba mbwalimvwa Leza kujatikizya nkondo kulakonzya kumupa kucinca mbomumubona Leza. Ikuti naa muli akati kamamiliyoni aabantu ibajatikizyidwe kapati akaambo kankondo nzyobalwana bantu, cakutadooneka inga mwayanda kuzyiba bwiinguzi kumubuzyo wakuti, Kweelana ambobasyoma bamwi, sena Leza nguukulwaizya bantu kulwana naa kuti tabikkili maano kumapenzi aboola akaambo kankondo, naa taakwe mbwalimvwa kujatikizya baabo ibapenga akaambo kankondo?

Mulakonzya kugambwa kuzyiba kuti ncolyaamba Bbaibbele ciliindene kapati amizeezo eeyi. Kuyungizya waawo, kuzwa kaindi kusikila sunu, Leza tanacinca mbwalimvwa kujatikizya nkondo. Atulange-lange ncolyaamba Bbaibbele kujatikizya mbwaakali kulimvwa Leza mumakani aankondo kaindi alimwi amumwaanda wamyaka wakusaanguna ciindi Jesu naakali anyika. Eeci cilatugwasya kubona mbwalimvwa Leza kujatikizya nkondo mazuba aano alimwi akuti naa nkondo zinooliko lyoonse kumbele.