Buzuba bumwi masiku mu 1984, ndakacinca kuzwa kukuba mukubusi-kubusi buyo akuba muntu uulaampuwo kapati. Ndakasalwa kuba Miss Hong Kong. Cifwoto cangu cakali kubikkwa acivwumbyo camamagazini alimwi amiteende. Ndakali kwiimba, kuzyana, kukanana kumbele lyabantu banji, kuba amapulogilamu aacipekupeku, kusama zisani zibotu, alimwi akuba antoomwe abantu balemekwa kapati mbuli mweendelezi waku Hong Kong.

Mwaka wakatobela, ndakatalika kutola lubazu mumafilimu alimwi bunji bwaziindi ndime ndakali mukamwini filimu. Basimubweza twaambo bakali kuyanda kuzyiba makani aajatikizya ndime, basikufwotola bakali kuyanda cifwoto cangu, abalo bantu bakali kuyanda kuti kandijanika kujalula zisobano zyabo, kutenda malibboni aakujalula cintu cipya, kutambwa kucakulya casyikati, alimwi acakumazuba. Lyoonse ndime ndakali kubikkilwa kapati maano.

Kandisobana mufilimu

Pele mukuya kwaciindi, ndakabona kuti zyoonse eezyi tiizyakali kundikkomanisya kapati mbuli mbondakali kuziyeeyela. Kanji-kanji ndakali kutola lubazu mumafilimu aabikka buumi muntenda. Basikusobana mumafilimu baku Hong Kong tiibakali kuvwula kubelesya bantu bambi kuti kababasobanina tubeela tunoneezya pele tubikka buumi muntenda mbuli mbobakali kucita basikusobana bamufilimu ya Hollywood, aboobo mebo ndakali kulicitila tubeela ootu, mbuli kusotosya honda atala aamootokala. Bunji bwamafilimu ngondakali kusobana akali kutondezya bukkale bwakutalilemeka alimwi ankondo. Amwi akali kutondezya mizimo.

Mu 1995, ndakakwatwa kuli sikupanga mafilimu. Nokuba kuti ndakali kuboneka mbuli kuti ndakalijisi zintu zyoonse izyakali kukonzya kundipa kukkomana mbuli kuba abuumi bwaatala, buvwubi, alimwi amulumi wakali kundiyanda kapati—tiindakakkomene pe. Aboobo ndakacileka kusobana mumafilimu.

KUYEEYA ZINTU NZYONDAKALI KUSYOMA KUBWANA

Ndakatalika kuziyeeya kapati zintu nzyondakali kusyoma kandicili mwana. Kuciindi eeco, mubuzuba bwamu Mujibelo bumwi abumwi, mebo amupati wangu musimbi twakali kuunka kuyooswaya mukwasyi umwi wa Bakamboni ba Jehova. Mbuli muzyali ba Joe McGrath, bakali kutuyiisya Bbaibbele antoomwe abana babo basimbi botatwe. Mukwasyi wabo wakalikkomene alimwi bakali kumvwana, alimwi “ba Joe” bakali kubalemeka bakaintu babo abana babo. Alimwi ndakali kukkomana kuunka ambabo kumiswaangano ya Bunakristo. Zimwi ziindi twakali kuunka kumiswaangano mipati. Eezyo zyakali ziindi zikkomanisya kapati. Ndakali kulimvwa kukwabililwa kuba akati ka Bakamboni.

Mukwiimpana, zintu zibi zyakali kundicitikila mumukwasyi wesu. Buumi mbobakali kupona bataata bwakabaletela mapenzi baama, aboobo bakalityompedwe kapati. Nondakali aamyaka yakuzyalwa iili 10, Baama bakaleka kuyanzana a Bakamboni ba Jehova. Mebo ndakazumanana nokuba kuti tiindakali kucita oobo amoyo woonse, pesi ndakabbapatizyigwa kandijisi myaka iili 17. Pele nokwakainda buyo kaindi kasyoonto, ndakanjila mubukkale buteelede ku Banakristo, aboobo tiindakacili kuyanzana ambungano.

NDAKAYEEYA KUPILUKA

Nowakainda buyo mucado wangu, baalu bobilo bamumbungano iyakali aafwaafwi ya Bakamboni ba Jehova bakandiswaya. Bakandipandulwida mbondakali kukonzya kupiluka kuli Jehova Leza, mpoonya bakapanga bubambe bwakuti mucizyi umwi misyinali uutegwa Cindy kandigwasyilizya. Aciindi eeci, ndakajisi buyo lusyomo lusyoonto, aboobo ndakamulomba kuti andigwasye kusinizya kuti Bbaibbele ndi Jwi lya Leza ncobeni. Wakanditondezya zikozyanyo zyabusinsimi bwamu Bbaibbele ibwakazuzikizyigwa. Mukuya kwaciindi, twakaba balongwe beni-beni, mpoonya wakandilomba kuti kandiiya Bbaibbele anguwe. Ndakazumina. Eeci ncecakali ciindi cakusaanguna kuzyiba kuti Jehova ngu Leza siluyando, walo uuyanda kuti kandikkomene.

Ciindi nondakatalika alimwi kuunka kumiswaangano ya Bunakristo, ndakajana kuti ndakali kukkomana kapati kuba a Bakamboni kwiinda mbondakali kukkomana kuba abantu mbotwakali kusobana limwi mumafilimu. Pele zintu izyakandicitikila kubwana zyakandipa kulimvwa kuti kunyina muntu ngondikonzya kusyoma, alimwi ndakali kulimvwa kubula mpindu. Umwi wamumbungano wakandigwasya ciindi naakanditondezya mu Bbaibbele mbondikonzya kulwana penzi lyakulimvwa boobu, alimwi ndakaba abalongwe beni-beni.

CINTU CIBOTU KAPATI KWIINDA BUUMI BWAATALA

Mu 1997, mebo abalumi bangu twakalongela ku Hollywood, ku California, U.S.A. Kandili ookuya, ndakaba musungu kapati kugwasya bantu kuzyiba busongo bujanika mu Jwi lya Leza. Kuyiisya bantu Bbaibbele kwandipa kukkutila kapati kwiinda buumi bwaatala mbondakali kupona kaindi. Mucikozyanyo, mu 2002, twakaswaangana a Cheri, imweenzuma ngotwakali kumvwana limwi kaindi waku Hong Kong. Bunji bwazintu izyakatucitikila mubuumi zyakalikozyenye. Awalo wakali Miss Hong Kong kakwiindide mwaka omwe kanditanaba mebo. Mane buya ciindi nondakawina coolwe eeci, nguwakandisamika musini. Alimwi wakazootalika kutola lubazu kusobana mumafilimu mpoonya mukuya kwaciindi wakazooba sikupanga mafilimu akubeleka abapati-pati ibakazyibidwe kapati. Awalo wakalongelede ku Hollywood.

Cheri wakandeetezya kapati ciindi nondakazyiba kuti wakafwidwa musankwa iwakali kuyanda kumukwata akaambo kabulwazi bwamoyo. Kunyina luumbulizyo ndwaakajana kucikombelo cakwe caci Buddha. Mbubwenya mbuli ndime, wakali kupona buumi bwaatala kapati mbobakali kunyomenena bamwi, pele kunyina naakakkomene alimwi kunyina muntu ngwaakali kusyoma. Ndakatalika kumwaambila nzyondakaiya mu Bbaibbele, pele cakamukatazya kuzisyoma akaambo kazintu nzyaakaiya kucikombelo caci Buddha.

Mweenzuma Cheri kalibambilide kusobana mufilimu

Bumwi buzuba mu 2003, Cheri wakanditumina fooni kali ku Vancouver, Canada, nkwaakali kupangila filimu. Kakkomene kapati, wakandaambila kuti wakali kuyabweendeenda amootokala wakwe kubona busena mpoonya akutalika kupaila cakupozya kati: “Kondaambila, Ino nguni Leza wakasimpe? Ino nduwe ni zina lyako?” Aciindi eeco, wakaunka aŋanda ya Bwami akubona zina lyakuti Jehova. Wakalimvwa kuti oobu mbwiinguzi kuzwa ku Leza, aboobo wakayanda kuti abonane a Bakamboni ba Jehova cakufwambaana. Ndakapanga bubambe, mpoonya nokwakainda buyo mazuba masyoonto, wakaunka kuyooswaangana ambungano yamwaambo waci Chinese ku Vancouver.

Mpoonya nokwakainda ciindi wakandaambila kuti: “Aaba bantu balandibikkila maano ncobeni. Ndilakonzya kubaambila mbondilimvwa.” Ndakakkomana kapati nondakamvwa boobu, nkaambo ciindi Cheri naakali mumakwebo aakupanga mafilimu, kunyina naakali kuyanda kuba abalongwe. Cheri wakazumanana kujanika kumiswaangano. Pele mu 2005, wakazumina mulimo wakupanga mafilimu malamfwu obilo ku China, calo cakapa kuti ayandike kujokela ku Hong Kong. Cikkomanisya ncakuti mu 2006, Cheri wakaaba buumi bwakwe kuli Jehova akubbapatizyigwa amuswaangano wa Bakamboni ku Hong Kong. Nokuba kuti wakali kuyanda kumubelekela kapati Jehova, mulimo ngwaakali kucita wakupanga mafilimu wakapa kuti cimuyumine kapati kucita boobo alimwi eeci cakamupa kubula lukkomano.

LUKKOMANO LUBOOLA AKAAMBO KAKUGWASYA BANTU

Mu 2009, buumi bwa Cheri bwakacinca cakumaninina. Wakasala kuleka kubeleka mulimo wakupanga mafilimu kutegwa acikonzye kumubelekela kabotu Jehova. Wakaba abalongwe banji mumbungano ya Bunakristo. Wakaba mukambausi waciindi coonse wamakani mabotu aa Bwami alimwi wakali kukkomana kapati kugwasya bantu kujana nzila mbotu yabuumi.Matayo 24:14.

Mpoonya Cheri wakasala kwiiya mwaambo waci Nepalese kutegwa agwasyilizye kakamu ikakali kuyaabukomena kamwaambo waci Nepalese ku Hong Kong. Bunji bwabantu baambaula mwaambo waci Nepalese tababikkilwi maano mu Hong Kong alimwi balasampaulwa akaambo kakuti tabacizyi kabotu kwaambaula Chingisi naa mwaambo waci Chinese alimwi akaambo kakuti bajisi zilengwa ziindene. Cheri wakandaambila mbwaakali kukkomana akaambo kukugwasya bantu aaba kumvwisya Bbaibbele. Mucikozyanyo, bumwi buzuba naakali kukambauka kuŋanda aŋanda, wakaswaanganya mukaintu umwi waambaula mwaambo waci Nepalese iwakazyi buyo makani masyoonto kujatikizya Jesu, pele kunyina ncaakazyi kujatikizya Leza wakasimpe, Jehova. Cheri wakabelesya Bbaibbele kutondezya mukaintu ooyu kuti Jesu wakali kupaila kuli Usyi wakujulu. Ciindi mukaintu ooyu naakazyiba kuti wakali kukonzya kupaila kuli Leza wakasimpe, wazina lyakuti Jehova, wakajalula moyo wakwe akuzumina makani mabotu. Tiilyakalampa, mulumaakwe antoomwe amwanaakwe musimbi abalo bakatalika kwiiya Bbaibbele.Intembauzyo 83:18; Luka 22:41, 42.

Cheri mazuba aano

Nondakabona Cheri mbwaakali kukkomana akaambo kakukambauka ciindi coonse, ndakalibuzya kuti, ‘Ino mebo ncinzi cindilesya kucita ncacita?’ Aciindi eeci, andime ndakali kukkala mu Hong Kong alimwi. Ndakayeeya kubambulula bukkale bwangu kutegwa ndicikonzye kutola lubazu mukuyiisya kabotu kasimpe kamu Bbaibbele. Ndajana kuti kubaswiilila bantu alimwi akubagwasya kumvwisya Jwi lya Leza cindipa lukkomano lwini-lwini.

Ndajana kuti kugwasya bantu kumvwisya Jwi lya Leza cindipa lukkomano lwini-lwini

Mucikozyanyo, ndakacikonzya kwiiya Bbaibbele amukaintu umwi waku Vietnam walo iwakaluuside ciindi coonse alimwi kanji-kanji wakali kulila. Lino zintu uzilanga munzila yeelede alimwi ulakkomana kapati kuyanzana abantu bamumbungano.

Toonse tobilo, mebo a Cheri twakajana cintu cibotu kapati kwiinda buumi bwaatala. Nokuba kuti kubeleka mulimo wakupanga mafilimu wakali kukkomanisya alimwi wakatupa kuba ampuwo, ikuyiisya bantu kujatikizya Jehova Leza cilakkomanisya kwiinda, nkaambo cipa kuti alemekwe. Twaabona ncobeni mbwaali aamasimpe majwi aa Jesu aakuti: “Kupa kulakkomanisya kapati kwiinda kupegwa.”—Milimo 20:35.