“Ndakali kuyeeya kuti kuli masena otatwe muntu nkwanga waunka ikuti naa wafwa: kujulu, kuhelo, naa kubusena bwamyuuya. Ndakalizyi kuti tandili muntu uuli kabotu uukonzya kuunka kujulu alimwi tandili mubi cakuti inga ndaunka kuhelo. Tiindakali masimpe naa busena bwamyuuya buli buti. Makani aaya taakwe mpondakaabala kale mu Bbaibbele pe. Pesi ndakali kumvwa buyo bantu kabaamba oobo.”—Ba Lionel.

“Ndakayiisyigwa kuti bantu boonse baunka kujulu ikuti bafwa, pele tiindakali kwaasyoma makani aaya pe. Ndakali kuyeeya kuti lufwu ngamamanino aazintu zyoonse, nkokuti kunyina bulangizi bwabantu bafwide.”—Ba Fernando.

Sena kuli nomwakalibuzyide kale kuti: ‘Ino ncinzi cini cicitika muntu afwa? Sena bayandwa besu bafwide balapenga kubusena bumwi? Sena kuli notuyoobabona alimwi? Ino inga twaasinizya buti makani aaya?’ Amubone cini Magwalo ncaamba. Cakusaanguna, atulange-lange ncolyaamba Bbaibbele kujatikizya lufwu. Mpoonya tulabandika bulangizi mbolipa Jwi lya Leza, Bbaibbele.

 Ino bafwide bali muciimo cili buti?

BWIINGUZI BWAMU BBAIBBELE: “Baumi balizyi kuti bayoofwa, pele bafwide tabazyi cintu nociba comwe, alimwi tabacijisi bulumbu, nkaambo tabaciyeeyegwi limbi pe. Kufwumbwa mulimo maanza aako ngaajana, koubeleka anguzu zyako zyoonse, nkaambo kunyina mulimo naa kuyeeya noluba luzyibo naa busongo mu Cuumbwe, oomo moya.” *Mukambausi 9:5, 10.

Cuumbwe, mbusena nkobaunka bantu bafwide; mbusena naa ciimo ooko nkobatakonzyi kucita cintu cili coonse. Mbuti mwaalumi uusyomeka Jobu mbwaakali kucibona Cuumbwe? Wakasweekelwa zintu zyakwe zyoonse alimwi abana bakwe mubuzuba bomwe buyo, kumane wakaba azilonda mubili woonse. Wakamulomba boobu Leza: ‘Eelo kaka inga cainda kubota kuti wandisisa mu Cuumbwe, [“muhelo,” busanduluzi bwa Bbaibbele lya Catholic Douay] ikuti wandibamba.’ (Jobu 1:13-19; 2:7; 14:13) Cakutadooneka, Jobu tanaakali kuyeeya kuti Cuumbwe bwakali busena bwamulilo wahelo, ooko nkwaakali kuyoopenga kwiinda amapenzi ngaakajisi kale. Muciindi caboobo, Cuumbwe wakali kucibona kuti mbusena bwakulyookezyela.

Kuli nzila aimwi iikonzya kutugwasya kuzyiba ciimo cabantu bafwide. Tulakonzya kulanga-langa zibalo zyamu Magwalo izili lusele zyabantu ibakabusyigwa kuzwa kubafwu.—Amubone kabbokes “ i kakuti “Zibalo Izyaamba Bubuke Zili Lusele Zijanika mu Bbaibbele.”

Kunyina naba omwe akati kabantu aaba bali lusele iwakaamba zyabusena bubotu kapati naa bwakupenzyelwa. Ikuti naa bantu ibakabusyigwa bakaluunkide ncobeni kumasena aayo ciindi nobakafwa, sena nobakaumuna buyo kakunyina kwaambila bantu? Alimwi sena makani aaya naatakalembwa mu Bbaibbele kutegwa bantu boonse baazyibe? Kunyina makani aali boobo aalembedwe mu Magwalo. Cakutadooneka, bantu aabo bali lusele tiibakajisi cakwaamba kujatikizya makani aayo. Ino nkaambo nzi? Nkaambo tiibakazyi cintu nociba comwe, mbubwenya mbuli muntu uuli muŋonzi zyalufwu. Mane buya zimwi ziindi Ibbaibbele libelesya bbala lyakoona kuba cikozyanyo cakupandulula lufwu. Mucikozyanyo, Davida uusyomeka alimwi a Stefani baambwa kuti ‘bakoona mulufwu.’—Milimo 7:60; 13:36.

Aboobo, ino mbulangizi nzi buliko kujatikizya bantu bafwide? Sena inga babuka kuzwa kuŋonzi zili boobu?

^ par. 7 Mu Bbaibbele lya Busanduluzi Bwanyika Mpya, ibbala lyakuti “Cuumbwe” mu Chihebrayo lyaambwa kuti “Sheol” mpoonya mu Chigiriki lyaambwa kuti “Hades.” Ma Bbaibbele aamwi abelesya bbala lyakuti “helo,” pele imuzeezo wakuti mbusena bwamulilo nkobapenzyelwa bantu tauli wamu Magwalo pe.