Sena nkubula maano kuyeeya kuti bantu bafwide bayoobuka alimwi? Mwaapostolo Paulo tanaakali kuyeeya boobo pe. Kwiinda mukusololelwa amuuya, wakalemba kuti: “Ikuti naa ikulangila Kristo kwesu kakuli kwabuumi obuno bulikke, nkokuti tuleetezya kapati kwiinda muntu uuli woonse. Pele mubwini Kristo wakabusyigwa kubafwu, walo uuli ngomicelo mitaanzi yabaabo bakoona mulufwu.” (1 Bakorinto 15:19, 20) Paulo wakalisinizyide kuti bubuke nkobuli ncobeni. Bwakasinizyigwa kwiinda mububuke bwa Jesu. * (Milimo 17:31) Nkakaambo kaako Paulo wakaamba Jesu kuti “ngomicelo mitaanzi”—nkaambo ngomutaanzi kubusyigwa kubuumi butamani. Aboobo, ikuti Jesu ngowakali mutaanzi, cakutadooneka kwakali kuyooba abambi.

Jobu wakaambila Leza kuti: “Yebo uyooyandisya milimo yamaanza aako.”—Jobu 14:14, 15

Nkaaka akambi kaambo kakonzya kumupa kusinizya bulangizi bwabubuke. Jehova ngu Leza wakasimpe. “Leza . . . takonzyi kubeja.” (Tito 1:2) Jehova tanabuzuba wabeja, alimwi kunyina nayakubeja. Sena inga wasyomezya bubuke, alimwi akutondezya kuti ulakonzya kubabusya bantu, mpoonya akutacita ncaasyomezya? Eeci tacikonzyi kucitika pe!

Nkaambo nzi Jehova ncaakapangila bubambe bwabubuke kumbele? Nkaambo kaluyando lwakwe. Jobu wakabuzya kuti: “Ikuti naa muntu wafwa, sena inga wapona alimwi? Uyakwiita, eelyo mebo ndiyookuvwiila. Yebo uyooyandisya milimo yamaanza aako.” (Jobu 14:14, 15) Jobu wakalisinizyide kuti Usyi wakujulu siluyando uyooyandisya kumubusya. Sena Leza wakacinca? Ibbaibbele lyaamba kuti: “Ndime Jehova; tandicinci pe.” (Malaki 3:6) Leza uciyandide kubusya bantu bafwide kuti babe abuumi bubotu alimwi bukkomanisya. Eeci ncecintu ncakonzya kuyanda muzyali uuli woonse siluyando ikuti wafwidwa mwana. Pele kwiimpana nkwakuti, Leza ulijisi nguzu zyakucita ncayanda.—Intembauzyo 135:6.

Lufwu ndipenzi lipati, pele Leza uyoolimana

 Jehova uyoopa Mwanaakwe nguzu zyakuleta lukkomano lutaambiki kuli baabo balila akaambo kakufwidwa bayandwa babo. Ino walo Jesu ulimvwa buti kujatikizya bubuke? Katanabusya Lazaro, Jesu wakabona mbobakapengede mumoyo bacizyi ba Lazaro alimwi abalongwe bakwe, aboobo awalo “yakamweenda misozi.” (Johane 11:35) Aciindi cimwi, Jesu wakaswaanganya mukamufwu waku Naini iwakafwidwa mwanaakwe musankwa. Jesu “wakamufwida luzyalo akumwaambila kuti: ‘Koleka kulila.’” Mpoonya aawo wakamubusya mwana wamukamufwu. (Luka 7:13) Aboobo Jesu ulakatazyigwa kapati mumoyo kujatikizya lufwu. Eelo kaka uyookkomana ciindi aakucinca kuusa kuba lukkomano nyika yoonse!

Sena mwakafwidwa kale? Mulakonzya kulimvwa kuti lufwu ndipenzi litakonzyi kumana. Pele lilakonzya kumana kwiinda mububuke mbwayoocita Leza aakubelesya Mwanaakwe. Kamuyeeya kuti Leza uliyandide kuti mukalibonene mboliyoomana penzi eeli. Uyanda kuti mukajanike kutegwa mukabatambule bayandwa banu. Amuciyeeyele buyo kukkala antoomwe kakunyina kufwa alimwi!

Ba Lionel, ibaambwa kumatalikilo aacibalo bakati: “Mukuya kwaciindi ndakayiya makani aajatikizya bubuke. Kusaanguna, cakali ciyumu kwaasyoma makani aaya, alimwi tiindakamusyoma muntu wakandaambila. Pele ndakabala mu Bbaibbele, aboobo ndakajana kuti ncamasimpe! Ndilayandisisya kuyoobonana abasyaanene alimwi.”

Sena inga mwayanda kuzyiba zinji? Bakamboni ba Jehova bayookkomana kumutondezya mu Bbaibbele lyanu ikaambo ncobasinizyide kuti kuli bubuke. *

^ par. 3 Kutegwa mubone bumboni bwakuti Jesu wakabusyigwa, amubone bbuku lyamu Chingisi lyakuti The Bible—God’s Word or Man’s? mapeeji 78-86, ilyakamwaigwa a Bakamboni ba Jehova.

^ par. 9 Amubone cibalo 7 cabbuku lyakuti Ino Ncinzi cini Bbaibbele Ncoliyiisya? ilyakamwaigwa a Bakamboni ba Jehova.