Mubandi uutobela utondezya Bakamboni ba Jehova mbobakonzya kubandika abasimukobonyina. Atweezyeezye kuti Kamboni uutegwa Mariya waunka kuŋanda yamukaintu wazina lya Mutinta.

“KAMUCITA OOBU LYOONSE KUTEGWA KAMUNDIYEEYA”

Mariya: Mwabonwa ba Mutinta. Twakakkomana kumubona kumuswaangano wa Kwiibaluka lufwu lwa Jesu nsondo yainda. * Ino mwakalimvwa buti kujatikizya muswaangano ooyu?

Mutinta: Ndakakkomana kujanika kumuswaangano ooyu, lino kwaamba masimpe tiindakazimvwisya zyoonse izyakali kwaambwa. Inga ndilamvwa bantu nobasekelela kuzyalwa kwa Jesu mubuzuba bwa Kkilisimasi alimwi akubuka kwakwe mubuzuba bwa Isita, pele tandinamvwide muntu wiibaluka lufwu lwakwe.

Mariya: Masimpe kuti Kkilisimasi alimwi a Isita mapobwe aadumide kapati munyika yoonse. Pele Bakamboni ba Jehova balimvwa kuti cilayandika kapati kwiibaluka lufwu lwa Jesu. Ikuti kamujisi ciindi, inga ndakkomana kuti tubandike kaambo ncobacitila boobo.

Mutinta: Cili buyo kabotu, inga twabandika.

Mariya: Bakamboni ba Jehova balaibaluka lufwu lwa Jesu nkaambo wakalailila basikumutobela kuti kabacita oobo. Atulange-lange cakacitika masiku katanafwa Jesu. Sena mulayeeya kuti wakabamba cakulya caalubazu ncaakalya antoomwe abasikumutobela basyomeka?

Mutinta: Sena mwaamba Mulalilo wa Mwami?

Mariya: Inzya, ngondaamba. Aciindi ca Mulalilo wa Mwami, Jesu wakapa basikumutobela malailile aasalede. Ndamulomba kuti mubale majwi aali mulugwalo lwa Luka 22:19.

Mutinta: Oowo. Lwaamba kuti “Alimwi wakabweza mukamu, wakalumba, wakaukomauna akubapa, ulaamba: ‘Eeci ciiminina mubili wangu uupegwa akaambo kandinywe. Kamucita oobu lyoonse kutegwa kamundiyeeya.’”

Mariya: Ndalumba. Amubone malailile aa Jesu kumamanino aakapango aaka: “Kamucita oobu lyoonse kutegwa kamundiyeeya.” Katanapa malailile aakumuyeeya kuli basikumutobela, Jesu wakacisalazya ncobakeelede kuyeeya kujatikizya nguwe. Wakaamba kuti buumi bwakwe bwakali kuyakwaabwa akaambo kabasikumutobela. Jesu wakawaamba muzeezo uukozyene ayooyu uulembedwe mulugwalo lwa Matayo 20:28. Lugwalo oolu lwaamba kuti: “Mbubonya Mwanaamuntu mbwaakaboola, ikutali kuzoobelekelwa, pele kuzoobeleka akupa buumi bwakwe kuti bube cinunuzyo cakununuzya banji.” Mubufwaafwi, aaka nkakaambo Bakamboni ba Jehova ncobabunganina mwaka amwaka mubuzuba mbwaakafwa Jesu—ikuyeeya cipaizyo cacinunuzyo ncaakapa Jesu. Lufwu lwakwe inga lwabafwutula boonse bamumvwida.

NKAAMBO NZI CINUNUZYO NCOCAKALI KUYANDIKA?

Mutinta: Inga ndilamvwa bantu nobaamba kuti Jesu wakafwa kutegwa tube abuumi. Pele kwaamba masimpe, cilandikatazya kucimvwisya eeci.

Mariya: Tamuli nyolikke nomulimvwa boobo ba Mutinta. Makani aamba zyacinunuzyo ca Jesu  ajatikizya zinji. Pele ali akati kamakani mabotu aakasimpe aali mu Jwi lya Leza. Ndalilubide, sena mucijisi ciindi cakuti tuzumanane kubandika?

Mutinta: Inzya, nkocicili asyoonto.

Mariya: Cabota. Caino-ino ndakali kubala makani aamba zyacinunuzyo, ndilasola kwaapandulula munzila nguba-uba.

Mutinta: Oowo, amuzumanane.

Mariya: Kutegwa tucimvwisye cinunuzyo, cakusaanguna tweelede kuzyiba bukkale mbobwakazooba ciindi ba Adamu a Eva nobakabisya mumuunda wa Edeni. Lino kutegwa tutumvwisye twaambo tujatikizyidwe, atubale lugwalo lwa Baroma 6:23. Ndalomba kuti mulubale.

Mutinta: Oowo. Lwaamba kuti: “Cakuvwola cacibi ndufwu, pele cipego ncapa Leza mbuumi butamani kwiinda muli Kristo Jesu Mwami wesu.”

Mariya: Ndalumba. Atwaalange-lange majwi aaya. Cakusaanguna, amubone kapango mbokatalika: “cakuvwola cacibi ndufwu.” Ooyu mulawo uutakatazyi, Leza ngwakaambila muntu kuzwa kumatalikilo, nkokuti cakuvwola, naa cisubulo cacibi ndufwu. Bwini mbwakuti, kumatalikilo taakwe muntu wakali sizibi. Ba Adamu a Eva bakalengwa kabalondokede, alimwi abalo bana babo nokunga bakazyalwa kabalondokede. Aboobo nokwali kunga kunyina kaambo muntu ncayelede kufwida. Ba Adamu a Eva antoomwe abana babo boonse bakajisi bulangizi bwakupona kukabe kutamani kabakkomene. Pele mbubwenya mbotuzyi, zintu tiizyakacitika boobo pe.

Mutinta: Inzya. Ba Adamu a Eva bakalya mucelo wakakasyidwe.

Mariya: Mbombubo. Aboobo nobakacita oobo—nkokuti ciindi nobakasala kutamvwida Leza—bakabisya. Munzila imwi inga twaamba kuti, bakasala kutalondoka, kuba basizibi. Kusala ooko kwakali kuyooleta mapenzi aataambiki, kutali buyo kuli ba Adamu a Eva balikke, pele akubana babo boonse.

Mutinta: Oowo, ino muubuti?

Mariya: Andiza amuleke ndibelesye cikozyanyo. Sena mulacikkomanina kupanga zinkwa?

Mutinta: Inzya! Ndilacikkomanina kapati.

Mariya: Atwaambe kuti mwakaula mpani mbotu yakupangila zinkwa. Kamutanaibelesya nociba ciindi comwe, mpani eeyo kwajanika kuti yaloka ansi kumane yapoonkana kapati. Ino muyeeya kuti ncinzi cikonzya kucitika kuzinkwa nzyomwapangila mumpani eeyo? Sena azyalo zinkwa eezyo tazikonzyi kubbookela naa?

Mutinta: Inga zyabbookela.

Mariya: Mbubwenya buyo, ciindi ba Adamu a Eva nobakasala kutamvwida Leza, “bakabbookela” naa kuba akampenda kacibi alimwi akutalondoka. Alimwi akaambo kakuti bakaba basizibi kabatanazyalwa bana babo, nkokuti bana babo boonse abalo bakali kuyoozyalwa “kababbookede.” Boonse bakali kuyoozyalwa kabali mucibi. Mu Bbaibbele, ibbala lyakuti “cibi” talyaambi buyo mucito, pele alimwi lyaamba kuba muciimo ncotwakakona. Aboobo cakacitika ncakuti nokuba kuti nywebo andime taakwe cibi cili coonse ncotwakacita—alimwi tiitwakaningazyalwa ciindi ba Adamu a Eva nobakabisya—bakatusowela mumapenzi kubikkilizya alunyungu lwabo loonse alimwi alunyungu lwesu kubuumi bwakutalondoka alimwi acibi calo cisololela kulufwu. Mbubwenya mbotubala mulugwalo lwa Baroma 6:23, cakuvwola cacibi ndufwu.

Mutinta: Kuboneka kuti eeci taciluleme pe. Ino nkaambo nzi bantu boonse ncobeelede kupenga kukabe kutamani akaambo kacibi caba Adamu a Eva?

Mariya: Mwaamba kabotu—masimpe taciboneki kululama pe. Pele kuli twaambo atumbi kunze lyakaaka. Mubululami bwakwe bulondokede, Leza wakasala kuti ba Adamu a Eva bafwe akaambo kazibi zyabo, pele swebo tobana babo twakapegwa bulangizi. Leza wakatupa nzila yakuti tunununwe kubukkale oobu bukatazya. Lino aawa mpampawo cinunuzyo ca Jesu mpociboolela. Amubone alimwi lugwalo lwa Baroma 6:23 ncolwaamba. Nolwamana kwaamba kuti “cakuvwola cacibi ndufwu,” kapango kalazumanana kwaamba kuti: “Pele cipego ncapa Leza mbuumi butamani kwiinda muli Kristo  Jesu Mwami wesu.” Aboobo lufwu lwa Jesu ndolujalula nzila yakuti twaangununwe kucibi alufwu. *

CINUNUZYO—CIPEGO CA LEZA CIPATI KWIINDA ZYOONSE

Mariya: Kuli kaambo akamwi mukapango aaka nkondiyanda kumutondezya.

Mutinta: Oowo, ino nkaakali?

Mariya: Amubone kuti kapango kaamba kuti: “Cipego ncapa Leza mbuumi butamani kwiinda muli Kristo Jesu Mwami wesu.” Ikuti naa Jesu nguwakapenga akutufwida, ikwaaba buumi bwakwe kutegwa tufwutulwe, nkaambo nzi kapango ncokaamba kuti cinunuzyo ‘ncipego ncapa Leza.’? Nkaambo nzi ncokataambi kuti “cipego ncapa Jesu”? *

Mutinta: Mm. Aawo tandizyi.

Mariya: Oowo, ncotweelede kuyeeya ncakuti, Leza wakalenga Adamu a Eva, alimwi ngu Leza ngobakabisyila ciindi nobatakamvwida mumuunda wa Edeni. Kweelede kuti cakamucisa kapati ciindi bana bakwe bobilo bakusaanguna nobakamuzangila. Pele cakutasowa ciindi Jehova wakaamba nzila yakali kuyoogwasya. * Wakasyomezya kuti cimwi akati kazilenge zyakwe zyamuuya, cizoopona anyika mbuli muntu uulondekede mpoonya akwaaba buumi bwakwe kacili cinunuzyo. Aboobo inga twaamba kuti bubambe bwacinunuzyo ncipego cizwa kuli Leza. Kuli nzila aimwi iitondezya kuti cinunuzyo ncipego ca Leza. Sena kuli nomwakayeeyede kale Leza mbwaakalimvwa ciindi Jesu naakajaigwa?

Mutinta: Peepe, tandinayeeyede oobo pe.

Mariya: Kuli tudooli ntondabona mulubuwa lwanu. Kweelede kuti mulijisi bana.

Mutinta: Inzya, ndilijisi bobilo—musankwa amusimbi.

Mariya: Mbomuli bazyali, amuciyeeyele buyo Bausyi Jesu bakujulu, nkokuti Jehova Leza mbwaakalimvwa buzuba Jesu mbwaakafwa. Ino muyeeya kuti Leza wakalimvwa buti naakali kulangilila kuzwa kujulu mwanaakwe ngwayandisya naakaangwa, kufwubaazyigwa, alimwi akuumwa? Alimwi ino Bausyi bakalimvwa buti ciindi Mwanaabo naakagagailwa kucisamu akusiigwa kuti afwe lufwu lucisa kapati?

Mutinta: Tandinayeeyede oobo pe! Kweelede kuti cakamucisa kapati.

Mariya: Bwini mbwakuti, tatukonzyi kwaamba bwini mbwaakalimvwa Leza buzuba obuya. Pele tulizyi kuti kuli mbwalimvwa, alimwi tulizyi kaambo ncaakazumizya kuti zyoonse eezyi zicitike. Kaambo kalapandululwa cakusalazya mulugwalo luzyibidwe kapati lwa Johane 3:16. Sena inga mwalubala lugwalo oolu?

Mutinta: Inzya. Lwaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”

Cinunuzyo ncecipego caluyando ciinda zyoonse

Mariya: Ndalumba. Amulange alimwi majwi aali kumatalikilo aakapango. Aamba kuti: “Leza wakaiyanda nyika.” Aaka nkakaambo kapati—luyando. Luyando lwakapa kuti Leza atume mwanaakwe anyika kuti azootufwide. Masimpe, cinunuzyo ncecipego caluyando ciinda zyoonse. Aboobo eeco ncencico Bakamboni ba Jehova ncobaswaanganina mwaka amwaka mubuzuba oobo kwiibaluka lufwu lwa Jesu. Sena mubandi ooyu kuli mbowamugwasya?

Mutinta: Inzya, mubandi wandigwasya. Ndalumba kuti twabandika makani aaya antoomwe.

Sena kuli mubuzyo wamu Bbaibbele ngomwakalibuzya kale? Sena mulayandisisya kuzyiba njiisyo zimwi nzyobasyoma naa mbobakomba Bakamboni ba Jehova? Ikuti kacili boobo, mutakawayiwayi kubabuzya Bakamboni ba Jehova ciindi mwaakubabona. Bayookkomana kubandika andinywe kujatikizya makani aaya

^ par. 5 Ciindi comwe amwaka, Bakamboni ba Jehova balaswaangana buzuba mbwaakafwa Jesu kutegwa baibaluke cinunuzyo ncaakapa. Mwaka uno, buzuba oobo bwakali mu, April 3.

^ par. 32 Cibalo iciyooboola kumbele cazibalo eezyi zitobelene ciyoolanga-langa cinunuzyo ca Jesu mbocitwaangulula kucibi, alimwi ancotukonzya kucita kutegwa tukagwasyigwe acinunuzyo.

^ par. 36 Kweelana ambolyaamba Bbaibbele, Leza alimwi a Jesu baliindene. Kutegwa mujane twaambo atumwi, amubone cibalo 4 cabbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova.