INO ndugwasyo luli buti mulumi ndwayelede kupa mukaintu wakwe? Bantu banji basyoma kuti mulimo mupati wamwaalumi ngwakugwasya mukwasyi wakwe kuba amali manji. Nokuba boobo, bamakaintu bamwi ibajisi zintu zinji zyakumubili tabaliibide mumizeezo—mane bamwi balimvwa kuyoowa. Mucikozyanyo, ba Rosa baku Spain bakaamba boobu kujatikizya balumi babo, “Kubantu bambi bakali kabotu, pele mumukwasyi bakalaalunya.” Ba Joy baku Nigeria baamba kuti, “Ikuti tiindazuminana abalumi bangu, bakali kundaambila kuti, ‘Weelede kucita zyoonse nzyondaamba nkaambo ndili mulumaako.’”

Ino mbuti mulumi mbwanga wazuzikizya mukuli wakwe munzila yaluyando? Ino ncinzi ciyandika kumulumi kutegwa ape lugwasyo luyandika kumukwasyi wakwe, nkokuti “busena bwakulyookezyela” bwamukaintu wakwe?—Rute 1:9, bupanduluzi buyungizidwe.

NCOLYAAMBA BBAIBBELE KUJATIKIZYA BWEENDELEZI BWA MULUMI

Nokuba kuti mulumi amukaintu baleelene mumeso aa Jehova, Ibbaibbele lyaamba kuti umwi aumwi wabo ulijisi mukuli uugaminide mumukwasyi. Lugwalo lwa Baroma 7:2 lwaamba kuti mukaintu uukwetwe ulaangidwe “kumulawo wamulumaakwe.” Mbubwenya mbuli mbunga zinji mbozibikka basikulanganya zintu, awalo Leza wabikka mulumi kuba mutwe wamukaintu wakwe. (1 Bakorinto 11:3) Balumi beelede kusololela mumikwasyi yabo.

Nobalumi, ino mbuti mbomukonzya kuzibelesya nguzu zyabweendelezi nzyaakamupa Leza? Ibbaibbele lyaamba kuti, “amuzumanane kubayanda bakaintu banu, mbubonya awalo Kristo mbwaakayanda mbungano.” (Baefeso 5:25) Nokuba kuti Jesu Kristo tanaakakwete, cikozyanyo cakwe inga camugwasya kuba mulumi uuli kabotu. Atubone mbwaakacita.

BUUMI BWA JESU—NCIKOZYANYO CIBOTU KUBALUMI

Jesu wakali kubakatalusya bamwi alimwi akubagwasya. Jesu wakabasyomezya boonse ibakadyaaminidwe amapenzi aabo kuti: “Amuboole kulindime, . . . eelyo ndilamukatalusya.” (Matayo 11:28, 29) Kanji-kanji wakali kubalemununa kumapenzi aabo aakumubili alimwi akubagwasya kuba aacilongwe aa Leza. Tacigambyi kuti bantu banji bakakwelelezyegwa kuli Jesu, nkaambo bakalisyomede kuti ulabalemununa mikuli yabo.

Balumi mbobakonzya kumwiiya Jesu. Amujane nzila mbomukonzya kubalemununa milimo imwi bakaintu banu. Bamakaintu bamwi balimvwa mbuli mbobakalimvwa ba Rosa balo ibakatongooka kuti: “Ndakali mbuli mubelesi waaŋanda kubalumi bangu.”  Mukwiimpana, mwaalumi wazina lya Kweku, uukkomene mucikwati waamba kuti: “Lyoonse ndilamubuzya mukaintu wangu naa kuli mbondinga ndamugwasya. Akaambo kakuti ndilamuyanda, lyoonse ndilabweza ntaamu yakumugwasya kucita milimo yaaŋanda.”

Jesu wakali kubikkila maano alimwi akweetelela. Mukaintu umwi mucete wakaciswa bulwazi bucisa kapati kwamyaka iili 12. Naakamvwa kujatikizya maleele ngaakali kucita Jesu, “wakali kulyaambauzya kuti: ‘Kuti ndijate buyo cisani cakwe caatala ndilapona.’” Ncaakaamba cakali camasimpe! Wakasika afwaafwi a Jesu akuguma maaya aacisani cakwe, eelyo wakapona mpoonya-mpoonya. Nokuba kuti basikulangilila bamwi ambweni bakayeeya kuti mukaintu ooyu wakacita citeelede, Jesu wakazyiba kuti wakalipengede kapati. * Calubomba wakamwaambila kuti: “Mwanaangu, . . . utakaciswi kabili kubulwazi oobu ibwali kukupenzya.” Mbwaanga wakalibuzyi kabotu bulwazi bwakwe, tanaakayanda kumujazya nsoni naa kumunyemena pe. Aboobo  wakatondezya bwini mbwaakabede—ikuti wakali mwaalumi silweetelelo.—Marko 5:25-34.

Balumi mbobakonzya kumwiiya Jesu. Ciindi mukaintu wanu natalimvwide kabotu, amutondezye kuti mulamubikkila maano kapati alimwi amumukkazikile moyo. Amusoleke kubona zintu mbuli mbwazibona alimwi akumvwisya bukkale bwakwe. Mucikozyanyo ba Ricardo bapandulula kuti, “Ikuti ndabona kuti mukaintu wangu ulicimidwe, ndilasolekesya kutaamba majwi aakonzya kumupa kwiindila kucimwa.”

Jesu wakali kubandika abasikwiiya bakwe. Jesu wakali kubandika kapati abeenzinyina. Wakaamba kuti, “Ndamuzyibya zintu zyoonse nzindakamvwa kuli Taata.” (Johane 15:15) Masimpe kuti zimwi ziindi Jesu wakali kuyanda kuba alikke alimwi akuba aciindi cakupaila. Pele kanji-kanji wakali kubaambila basikwiiya bakwe bwini mbwaakali kulimvwa. Masiku aakuti juunza ulajaigwa mbuli kuti ncigwebenga, wakabaambila caantangalala kuti ‘wakalipengede kapati mumoyo’ akaambo kamapenzi aakali afwaafwi kumucitikila. (Matayo 26:38) Nokuba kuti zimwi ziindi nzyobakali kucita zyakali kumutyompya, Jesu tanaakaleka kubaambauzya beenzinyina.—Mateyo 26:40, 41.

Ikwiiya cikozyanyo ca Jesu kulakonzya kugwasya mwaalumi kuba mulumi alimwi ausyi uuli kabotu

Balumi mbobakonzya kumwiiya Jesu. Amubandike—kuzwa ansi aamoyo—amukaintu wanu. Mukaintu inga watongooka kuti mulumaakwe tajisi penzi kwaambaula abantu mubuleya, pele aŋanda taambauli pe. Kulubazu lumbi, amubone mbobalimvwa ba Ana ciindi balumi babo nobabandika ambabo cakulikwaya, “Ndilazyiba kuti balandiyanda ncobeni alimwi ndilimvwa kuti mbalongwe bangu.”

Amucitantamuke cilengwa cakusubula bakaintu banu kwiinda mukutaambaula ambabo. Mukaintu umwi wakaamba boobu, “Ikuti ndacita cintu cimwi capa kuti balumi bangu banyeme, bakali kuleka kundaambauzya kwamazuba aali mbwaabede. Bakali kundipa kulimvwa kuba amulandu alimwi akusulaikwa.” Pele ba Edwin, balasoleka kwiiya cikozyanyo ca Jesu. Baamba kuti: “Ikuti ndanyema, tandaambauli mpoonya-mpoonya, pele ndilalindila kuti kwiinde ciindi cili mbocibede kutegwa twaabandike makani.”

Ba Joy ibaambwa kumatalikilo aacibalo eeci, babona kucinca kupati mubalumi babo kuzwa nobakatalika kwiiya Bbaibbele a Bakamboni ba Jehova. Ba Joy baamba kuti, “Balumi babo bacinca kapati alimwi balasolekesya kutondezya luyando kwiinda mukwiiya Jesu.” Mamiliyoni aabanabukwetene balagwasyigwa kwiinda mukutobela malailile aaya aamu Bbaibbele. Sena mulayanda kuba mbuli mbabo? Mulakonzya kulomba umwi wa Bakamboni ba Jehova kutegwa mube aaciiyo ca Bbaibbele citabbadelwi.

^ par. 10 Kweelana a Mulawo wa Musa, bulwazi bwamukaintu ooyu bwakamupa kusofwaala, alimwi kufwumbwa ngwaakaguma wakali kubonwa kuti awalo ulisofweede.—Levitiko 15:19, 25.