Kweelana ambolibelesyedwe mu Bbaibbele, ino bbala lyakuti “muzibe” lyaamba nzi?

Cifwanikiso cabana Asuri camuzibe

Zimwi ziindi bbala eeli lilakonzya kwaamba muntu wakazibwa. Lyansiku, baalumi bamwi bakali kuzibwa kacili cisubulo alimwi ikuti naa batolwa mubuzike. Baalumi bazibidwe ibakali kusyomwa bakali kupegwa mulimo wakulanganya maanda aabamakaintu ibakali kukkala mumaanda aabami. Mucikozyanyo, bazibe bobilo ba Hegai alimwi Syasyagazi bakali kulanganya bamakaintu alimwi abamwanakasuwa ba Mwami wabana Persia, uuyeeyelwa kuti ngu Zekisesi Wakusaanguna.—Esita 2:3, 14.

Nokuba boobo, eeci tacaambi kuti boonse aabo Bbaibbele mbolyaamba kuti bazibe, bakalizibidwe ncobeni. Basyaazibwene bamwi baamba kuti ibbala eeli lyakali kubelesyegwa munzila aimbi ikwaamba basilutwe ibakapedwe milimo munkuta yamwami. Kuboneka kuti ooyu ngomuzeezo wabbala eeli nolyaamba Ebedi-meleki, mweenzinyina wa Jeremiya alimwi amuna Etiopiya uutaambidwe zina ooyo mukambausi Filipo ngwaakakambaukila. Kuboneka kuti Ebedi-meleki wakali silutwe wakajisi cuuno caatala, nkaambo wakali kwaambaula a Mwami Zedekiya mulomompande. (Jeremiya 38:7, 8) Alimwi muna Etiopiya waambwa kuti ngowakali kulanganya lubono lwamwami, walo “wakaunkide ku Jerusalemu kuyookomba.”—Milimo 8:27.

Ino nkaambo nzi beembezi mumazuba aansiku ncobakali kwaandaanya mbelele ampongo?

Jesu naakali kwaamba zyaciindi calubeta luboola kumbele wakaamba kuti: “Mwanaamuntu aakuboola mubulemu bwakwe, . . . uyoobaandaanya bantu mbubonya mweembezi mbwaandaanya mbelele ampongo.” (Matayo 25:31, 32) Nkaambo nzi beembezi ncobakali kubaandaanya banyama aaba?

Kanji-kanji, mbelele ampongo zyakali kweembelelwa antoomwe. Masiku zyakali kujalilwa muzyaanda kutegwa zitalumwi banyama bamusyokwe, kubbigwa alimwi akuzikwabilila kumpeyo. (Matalikilo 30:32, 33; 31:38-40) Misyobo yobilo yabanyama aaba yakali kujalilwa muzyaanda ziindene ikukwabilila mbelele, kwaambisya mbelele zinyonsya alimwi abana banzizyo. Bakali kucita oobo kuzikwabilila kumpongo izyakali kuyandisya kudinka beenzinyina. Kuyungizya waawo, bbuku lyakuti All Things in the Bible lyaamba kuti, mweembezi wakali kwaandaanya mbelele ampongo ciindi “nozitantana, ciindi cakukama alimwi aciindi cakugela boya.” Nkakaambo kaako zikozyanyo nzyaakali kubelesya Jesu zyakayeeme azilengwa nzyobakazyi kabotu aabo ibakali kumuswiilila alimwi ibakali kukkala mu Israyeli yansiku ooko bantu nkobakaizyi kabotu milimo yabweembezi.