• MWAKA WAKUZYALWA: 1958

  • KUCISI NKWAZWA: ITALY

  • MBWAAKABEDE KAINDI: WAMUKABUNGA KAZIGWEBENGA MUKALI

MBONDAKABEDE KAINDI:

Ndakazyalwa akukomenena mumakomponi aamu dolopo lya Roma, mubusena mukkala bantu batavwoli mali manji. Buumi bwakali kukatazya. Tiindakabazyi bamaama bakandizyala alimwi tiitwakali kumvwana abataata. Ndakakomenena mubusena mwalo buumi mobwakali kukatazya.

Ciindi nondakajisi myaka iili 10 yakuzyalwa, ndakalitalikide kale kubba. Kandili amyaka iili 12, ndakatija aŋanda kwaciindi cakusaanguna. Ziindi zili mbozibede bataata bakali kundigwisya kuzwa kumaofesi mapati aabamapulisa akunditola kuŋanda. Ndakali kuzwangana abantu lyoonse alimwi ndakali mukali alimwi ndakali kubanyemena bantu boonse. Nondakajisi myaka iili 14, ndakazwa aŋanda kakunyina kujokela alimwi. Ndakatalika kunywa misamu iikola alimwi akukkala mumigwagwa. Mbwaanga tiindakajisi kwakoona ndakali kunjila mumootokala uutali wangu akoona mumo kusikila kubucedo. Mpoonya ndakali kulanga-langa kwakali kujanika maanzi kutegwa ndisambe.

Mukuya kwaciindi ndakaba muntu uucibwene kubba mbuli kusompola bantu zintu, kubba masiku mumaanda aindene-indene. Mpuwo yangu yakazoobija alimwi kalitanalampa ndakatambwa kuti ndibe mukabunga kazigwebenga calo cakandipa kuti nditalike kubba mumabbanki. Akaambo kakuti ndakali mukali, ndakatalika kulemekwa mukabunga kazigwebenga aaka. Lyoonse ndakali kweenda antobolo alimwi buya ndakali koona anjiyo ansi aapilo yangu. Ndakazooba abuumi bwakulwana, kunywa misamu iikola, kubba, kutukila alimwi akucita bwaamu. Bapulisa lyoonse bakali kundiyandaula. Ndakaangwa ziindi zinji alimwi kwamyaaka minji ndakali kunjila alimwi akuzwa muntolongo.

BBAIBBELE MBOLYACINCA BUUMI BWANGU:

Aciindi cimwi nondakazwa muntolongo, ndakaunka kuyooswaya bamaama basyoonto. Kakunyina kuzyiba, bamaama basyoonto, alimwi abanabokwesu bobilo bakaba Bakamboni ba Jehova. Bakanditamba kumiswaangano ya Bakamboni. Akaambo kakuyanda  kuzyiba zintu zimwi, ndakabasangana. Notwakasika ku Ŋanda ya Bwami, ndakasala kukkala acuuno cakali afwaafwi amulyango kutegwa kandibabona bantu boonse bakali kunjila alimwi akuzwa. Mbuli cilengwa, ndakalijisi ntobolo.

Muswaangano ooyu wakacinca buumi bwangu. Ndakalimvwa mbuli kuti ndakali buyo kubusena bumbi ikutali anyika. Bantu bakandaanzya cakusangalizya alimwi calumwemwe. Ndiciyeeya Bakamboni mbobakali kundilanga caluzyalo alimwi acakundibikkila maano. Eeci cakaliindene kapati abantu mbondakali kupona aambabo!

Ndakatalika kwiiya Bbaibbele a Bakamboni. Mbondakali kuyaabuzumanana kwiiya ndakabona kuti ndakeelede kucinca buumi bwangu cakumaninina. Ndakalutobela lulayo lulembedwe mulugwalo lwa Tusimpi 13:20: “Uuenda abasongo ulasongwaala, pele muzwalani wabafubafuba ulabisizigwa.” Ndakabona kuti ndakeelede kuzwa mukabunga kazigwebenga. Eeci tiicakali cuubauba, pele kwiinda mukugwasyigwa a Jehova, ndakazwidilila.

Kwaciindi cakusaanguna mubuumi bwangu, ndakatalika kulikasya kucita zintu zitali kabotu

Alimwi ndakatalika kuba mulondo. Kwiinda mukubeleka canguzu ndakacileka kufweba alimwi akunywa misamu iikola. Ndakaagela masusu angu malamfwu, kugwisya masikkiyo alimwi akucileka kutukila. Kwaciindi cakusaanguna mubuumi bwangu, ndakatalika kulikasya kucita zintu zitali kabotu.

Kubala alimwi akwiiya ncintu ncondatakali kukkomanina, aboobo tiicakali cuubauba kubikkila maano kubala akwiiya Bbaibbele. Nokuba boobo, nondakazumanana kubeleka canguzu, asyoonto-syoonto ndakatalika kumuyanda Jehova alimwi ndakatalika kucinca mumoyo wangu, manjezyeezya akatalika kundikatazya. Kanji-kanji ndakali kulimvwa kutyompwa, kumwi kanditasyomi kuti Jehova wakali kukonzya kundilekelela zibi zyoonse nzyondakacita. Muciindi ciliboobu ndakakulwaizyigwa kwiinda mukubala makani aamba zya Jehova mbwaakamulekelela Mwami Davida zibi zipati nzyaakacita.—2 Samuele 11: 1–12:13.

Buyumuyumu bumbi mbondakajisi bwakali kujatikizya kwaambila bamwi nzyondakali kusyoma mumulimo wakuŋanda aŋanda. (Matayo 28:19, 20) Ndakali kuyoowa kuti inga ndajana muntu ngondakabisizya kaindi. Pele asyoonto-syoonto ndakacikonzya kuzunda bukandu mbondakajisi. Ndakatalika kujana lukkomano lwini-lwini kwiinda mukugwasya bantu kwiiya kujatikizya Taateesu wakujulu mubotu walo uulekelela cakumaninina.

MBONDAGWASYIGWA:

Kwiiya kujatikizya Jehova kwakafwutula buumi bwangu! Bunji bwabeenzuma bakafwa naa kwaangwa muntolongo, pele mebo ndijisi buumi bukkomanisya alimwi ndilijisi bulangizi bwakumbele. Ndaiya kuba muntu uulicesya alimwi uumvwida alimwi akulikasya kuba mukali kapati. Akaambo kaceeci, ndilayanzana kabotu abantu. Ndakakwata mukaintu wakeebelwa nzoka mubwina Carmen, alimwi tulikkomene. Antoomwe, tulakkomana kugwasya bantu kwiiya Bbaibbele.

Ndalilubide, lino ndicita mulimo uusyomeka—zimwi ziindi uubikkilizya kubelekela mumabbanki, pele muciindi cakubba, ndibeleka mulimo wakusalazya mumabbanki!