“LEZA muuya,” talibonyi mumeso aabantu. (Johane 4:24) Pele Bbaibbele lyaamba kuti munzila imwi, kuli bantu bakamubona Leza. (Bahebrayo 11:27) Ino mbuti mbocikonzyeka eeci? Sena ncobeni mulakonzya kumubona “Leza uutalibonyi”?—Bakolose 1:15.

Atukozyanisye bukkale bwesu abwamuntu uutaboni kuzwa naakazyalwa. Sena kutabona kumupa kutamvwisya zintu zimuzingulukide? Peepe. Muntu uutaboni ulatambula twaambo munzila ziindene-indene zyalo zimugwasya kuzyiba bantu, zintu alimwi azicitika. Mwaalumi umwi uutaboni wakaamba kuti: “Kubona takuzwi mumeso. Kuli mumizeezo.”

Mbubwenya buyo, nokuba kuti inga tiimwabelesya meso aanu kubona Leza, mulakonzya ‘kujalula myoyo yanu’ kutegwa mumubone. (Baefeso 1:18) Amubone nzila zyotatwe mbomukonzya kucita oobo.

“BULALIBONYA CAANTANGALALA KUZWA CIINDI NAAKALENGA NYIKA”

Muntu uutaboni kanji-kanji maano aakwe aakumvwa alimwi aakuzyiba ncaaguma naa camuguma inga alisumpukide kapati, calo cimugwasya kuzyiba zintu nzyatakonzyi kubona. Mbubwenya buyo, mulakonzya kubelesya maano aagwasya kuzyiba zintu zimuzingulukide alimwi akumuzyiba Leza uutalibonyi wakazilenga. “Bube bwakwe butalibonyi bulalibonya caantangalala kuzwa ciindi naakalenga nyika kuya kumbele, nkaambo bulabonwa muzyintu nzyalengede.”—Baloma 1:20.

Mucikozyanyo, amuyeeye buyo kujatikizya munyika motukkala. Nyika yakapangwa munzila iilibedelede kutegwa katukkomana abuumi ikutali kupona kumwi katujisi buyumuyumu bwamali. Ciindi notwamvwa kuunga kwamuwo uutontola, kuyotela zuba, kulya mucelo mubotu, naa kumvwa kulila kwatuyuni kukatalusya, tulakkomana kapati. Sena zipego eezi tazitondezyi kuti Mulengi wesu ulatulanganya, mutete moyo alimwi ngusibuuya?

Ino ncinzi ncomukonzya kwiiya kujatikizya Leza kuzwa kuzintu nzyomubona mububumbo? Masimpe ngakuti, ijulu lilayubununa nguzu zya Leza. Buvwuntauzi bwasayansi bwaino-ino butondezya kuti bubumbo buyaabukomena alimwi bulacita oobo cakufwambaana! Nomulanga kujulu masiku amulibuzye kuti: “Ino nguzu zipa kuti bubumbo kabuyaabukomena cakufwambaana zizwa kuli? Bbaibbele litwaambila kuti Mulengi ulijisi “bupati bwakwe bugambya.” (Isaya 40:26) Zintu nzyaakalenga Leza zitutondezya kuti “Ngusinguzuzyoonse” alimwi akuti ‘ulimaninide munguzu.’—Jobu 37:23.

‘IWAKAMUPANDULULA’

Muzyali mukaintu wabana basankwa bobilo bataboni waamba kuti: “Kwaambaula ncecintu cibagwasya kapati kwiiya. Nkubaambila zyoonse nzyomubona alimwi anzyomumvwa, [alimwi] nkulibambila kuluula zyoonse nzyomwabona. Ndinywe meso aabo.” Mbubwenya buyo, nokuba kuti “kunyina muntu wakamubona kale Leza nociba ciindi comwe,” pele mwana wa Leza, Jesu “uuli acamba ca Usyi ngonguwe wakamupandulula.” (Johane 1:18) Mbwali cilenge ca Leza citaanzi alimwi simuzyalwaalikke, Jesu wakaba “meso” eesu aakutugwasya kubona kujulu. Ngonguwe uukonzya kutupa twaambo twiinda kusyomeka kujatikizya Leza uutalibonyi.

Amubone twaambo tumwi Jesu walo iwakakkala a Usyi kwaciindi cilamfwu kapati ntwaakaamba kujatikizya Leza:

  • Leza ulabeleka lyoonse. “Taata ulabeleka ambuli sunu.”—Johane 5:17.

  • Leza ulizizyi nzyotuyandika. “Uso ulizyi zyintu nzyomuyandika kamutana kumulomba.”—Matayo 6:8.

  • Leza ulatupa zintu camoyo woonse. “Uso uuli kujulu  . . . ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.”—Matayo 5:45.

  • Leza ulabikkila maano umwi aumwi wandiswe. “Sena tutiiti tobilo tatusambalwi kakkobili komwe kajisi mpindu nsyoonto? Nokuba boobo, kunyina nokaba komwe kayoowida ansi Uso katakonzyi kuzyiba. Pele naaba masusu aakumutwe wanu alibalidwe oonse. Aboobo, mutayoowi pe: nywebo mulayandika kwiinda tutiiti tunji.”—Matayo 10:29-31.

MUNTU IWAKATONDEZYA MBWABEDE LEZA UUTALIBONYI

Mbobajata twaambo bantu bataboni, ciliindene kapati abaabo ibajisi meso. Muntu uutaboni ulakonzya kuzyiba kuti eeci ncinzimweemwe ikutali akaambo kakuti abusena aawo kunyina zuba, pele kuba busena butontola bwasinkilwa zuba. Mbubwenya buyo muntu uutaboni naaceya mbwatakonzyi kubona cinzimweemwe naa zuba, andiswe tatukonzyi kumumvwisya Jehova tolikke. Aboobo, Jehova wakatupa muntu walo wakatondezya bube bwakwe munzila iilondokede.

Muntu ooyo wakali Jesu. (Bafilipi 2:7) Jesu tanaakali kwaamba buyo kujatikizya Bausyi pele wakatutondezya mbwabede Leza. Sikwiiya wa Jesu Filipo wakabuzya kuti: “O Mwami, kotutondezya Bauso.” Mukumwiingula Jesu wakati: “Ooyo wandibona wamubona awalo Taata.” (Johane 14:8, 9) Ino ncinzi ncomukonzya “kubona” kujatikizya Taata kwiinda muzintu nzyaakali kucita Jesu?

Jesu wakali kusangalizya, kulicesya alimwi akusikilika. (Matayo 11:28-30) Bube bwakwe bukatalusya bwakali kukwela bantu kulinguwe. Jesu wakali kumvwisya mbobakali kulimvwa bantu alimwi akukkomana antoomwe ambabo. (Luka 10:17, 21; Johane 11:32-35) Nomubala naa kuswiilila zibalo zyamu Bbaibbele zyaamba kujatikizya Jesu, kamweezyeezya kuti mulizibwene zicitika mucibalo. Kuti kamuzinzibala kuyeeya kujatikizya Jesu mbwaakali kweendelezya bantu, muyoobubona kabotu-kabotu bube bubotu bwa Leza alimwi muyooswena kulinguwe.

KUBIKKA TWAAMBO ANTOOMWE

Kujatikizya muntu uutaboni mbwacikonzya kuzyiba zintu zicitika, mulembi umwi wakaamba kuti: “Ulatambula twaambo twiindene indene kuzwa kuzintu ziindene indene (nzyajata, nzyanunkizya, nzyamvwa alimwi azimwi buyo) alimwi munzila imwi ulatubikka antoomwe twaambo ootu kupanga cintu comwe.” Mbubwenya buyo, nomulanga-langa zintu nzyaakalenga Leza, amubale Jesu nzyakaamba kujatikizya Usyi akubona Jesu mbwaakatondezya bube bwa Leza, eeci ciyoomupa kubona mbwali mubotu Jehova. Uyooba mwini-mwini kulindinywe.

Sikale Jobu, wakalibonena eeci. Kumatalikilo wakaambaula “cakutasongwaala.” (Job 42:3) Pele naakalanga-langa mbozyeebeka zintu nzyaakalenga Leza, Jobo wakati: “Ndakalimvwide amatwi buyo anduwe, pele lino meso aangu abona.”—Job 42:5.

‘Naa mwamuyandaula Jehova, muyoomujana’

Andinywe mulakonzya kulimvwa mbubonya. ‘Na mwamuyandaula [Jehova], muyoomujana.’ (1 Makani 28:9) Bakamboni ba Jehova bayookkomana kumugwasya kumuyandaula alimwi akumujana Leza uutalibonyi.