Ino lufwu lwa Jesu lutugwasya buti?

Leza naakalenga bantu, wakali kuyanda kuti kabapona kukabe kutamani anyika kakunyina kuciswa naa kufwa. Pele, muntu wakusaanguna Adamu wakazangila mulengi, aboobo wakasweekelwa coolwe cakupona kukabe kutamani. Mbwaanga tuli lunyungu lwa Adamu, twakakona lufwu kuzwa kulinguwe. (Baloma 5:8, 12; 6:23) Leza mwini-mwini Jehova, wakatuma mwanaakwe Jesu anyika kuzoofwa kutegwa anunune ceeco ncaakasweekelwa Adamu.—Amubale Johane 3:16.

Jesu wakafwa kutegwa bantu bacikonzye kupona kukabe kutamani. Ino muyeeya kuti buumi butamani anyika buyooba buti?

Lufwu lwa Jesu lupa kuti zibi zyesu zilekelelwe alimwi akuti cikonzyeke kuba abuumi butamani. Bbaibbele lilatugwasya kuzyiba buumi mbobuyooba anyika ciindi nokutakabi kucembaala, malwazi, alimwi alufwu.—Amubale Isaya 25:8; 33:24; Ciyubunuzyo 21: 4, 5.

Ino mbuti mbotweelede kuluyeeya lufwu lwa Jesu?

Mangolezya katanafwa, Jesu wakaambila basikumutobela kuti kabayeeya lufwu lwakwe kwiinda mukucita ciibalusyo. Kwiibaluka lufwu lwa Jesu munzila eeyi mwaka amwaka citupa kuyeeyesya mbwabayanda bantu Jesu alimwi a Jehova.—Amubale Luka 22:19, 20, 20; 1 Johane 4:9, 10.

Mwaka uuno Ciibalusyo calufwu lwa Jesu ciyoocitwa lyaakubbila zuba mu Muhulo, April 14. Mwatambwa kuti mukabasangane Bakamboni ba Jehova kubusena nkomukkala.—Amubale Baloma 1:11, 12.