Betaniya wakali munzi musyoonto iwakali makkilomita otatwe kuzwa ku Jerusalemu. (Johane 11:18) Kakuceede nsondo zisyoonto kuti Jesu afwe, kwakacitika cintu cimwi ku Betaniya. Lazaro, umwi wabalongwe ba Jesu, cakutayeeyela wakaciswa kapati, mpoonya wakafwa.

Mbwaakaamvwida buyo makani aaya, Jesu wakaambila basikwiiya bakwe kuti Lazaro uloona alimwi wakali kuyanda kuyoomubusya. (Johane 11:11) Pele basikwiiya ba Jesu tiibakacimvwisya ncaakali kupandulula, aboobo Jesu wakabaambila cakutainda mumbali kuti: “Lazaro wafwa.”—Johane 11:14.

Nikwakainda mazuba one Lazaro kali mucuumbwe, Jesu wakasika ku Betaniya kajisi makanze aakuumbulizya Marta, imucizyi wa Lazaro. Marta wakaamba kuti: “Ikuti nowakaliko kuno, mukwesu naatakafwa.” (Johane 11:17, 21) Mpoonya Jesu wakaingula kuti: “Mebo ndendime bubuke alimwi abuumi. Ooyo uundisyoma, nokuba kuti wafwa uyooba muumi alimwi.”—Johane 11:25.

“Lazalo, kozwa oomo!”

Kutegwa Jesu atondezye kuti majwi ngaakaamba ngamasimpe, wakaunka kucuumbwe akoompolola kuti: “Lazalo, kozwa oomo!” (Johane 11:43) Mpoonya aabo ibakali kulangilila bakagambwa kubona kuti mwaalumi wakafwide wabuka.

Jesu wakalibusyide kale bantu bobilo. Aciindi cimwi wakabusya mwana musimbi wa Jairo iwakafwide. Alimwi Jesu katanamubusya musimbi ooyu, wakaambide kuti uloona.—Luka 8:52.

Amubone kuti kujatikizya lufwu lwa Lazaro alimwi alwamwana musimbi wa Jairo, Jesu wakakozyanisya lufwu kukoona. Eelo kaka kukozyanisya ooku kuleelela! Ino nkaambo nzi? Muntu woona tazyi zyintu zicitika, aboobo eeci ncikozyanyo cibotu cipandulula ciimo cakutamvwa kucisa akupenga. (Mukambausi 9:5; amubone kabbokesi kakuti,  “Lufwu Luli Mbuli Ŋonzi Zitaambiki.”) Basikwiiya ba Jesu bakusaanguna  bakacimvwisya ciimo cabantu bafwide. Ibbuku limwi lyaamba kuti: “Kuli basikwiiya ba Jesu, lufwu lwakali mbuli koona, mpoonya cuumbwe cakali mbuli busena bwakulyookezezya . . . kuli baabo bakafwa kabasyomeka.” *

Eelo kaka cilaumbulizya kuzyiba kuti bafwide baloona mucuumbwe alimwi tabapengi pe! Aboobo tatweelede kuyoowa nkaambo tulizyi cicitika muntu afwa.

“IKUTI NAA MUNTU WAFWA, SENA UYOOPONA ALIMWI?”

Pele nokuba kuti tulakkomana koona kabotu masiku, sena kuli uuyanda koonenena mane kukabe kutamani? Ino mbulangizi nzi mbotujisi bwakuti bantu bafwide iboona mucuumbwe bayoopona alimwi mbubwenya mbuli Lazaro amwana musimbi wa Jairo?

Sikale Jobu wakabuzya mubuzyo uukozyenye ayooyu ciindi naakalimvwa kuti uli afwaafwi kufwa. Wakabuzya kuti: “Kuti naa muntu wafwa, sena uyoopona alimwi?”—Jobo 14:14, BT.

Kaambila Leza Singuzuzyoonse, Jobu wakaliingula kwiinda mukwaamba kuti: “Noyoondiita njoovuwa, kuti koyandisisya buumi mbowakalengede.” (Jobu 14:15) Jobu wakalisinizyide kuti Jehova wakali kuyandisya kuyoomubusya mubelesi wakwe uusyomeka. Sena cintu Jobu ncaakali kulombozya cakali cakuyeeyela buyo? Peepe.

Kubusya bantu nkwaakacita Jesu cakali citondezyo cisalede cakuti Leza wakamupa nguzu zyakuzunda lufwu. Mubwini, Bbaibbele lyaamba kuti Jesu lino ulijisi “makkii aalufwu.” (Ciyubunuzyo 1:18) Mbubwenya mbwaakajisi nguzu zyakubusya Lazaro, Jesu ulijisi nguzu zyakuyoobusya bantu bafwide kumbele.

Cakwiinduluka-induluka Bbaibbele lilaamba kujatikizya cisyomezyo cabubuke. Mungelo wakasyomezya musinsimi Daniele kuti: ‘Uyoolyookezya, elyo uyooima kubusena mbobambilidwe kumamanino aaciindi.’ (Daniele 12:13) Jesu wakaambila basololi baba Juda, ba Saduki ibatakali kusyoma mububuke kuti: “Mulisweekede nkaambo tamuzyi Magwalo naa nguzu zya Leza.” (Matayo 22:23, 29) Mwaapostolo Paulo wakaamba kuti: “Ndilijisi bulangizi kuli Leza . . . kuti kuyooba bubuke bwabantu baluleme abataluleme.”—Milimo 24:15.

INO NDILILI BANTU BAFWIDE NOBAYOOBUSYIGWA?

Ino ndilili bantu baluleme abataluleme nobayoobusyigwa? Mungelo wakaambila mubelesi uusyomeka Daniele kuti uyoobuka “kumamanino aaciindi.” Marta awalo wakali kusyoma kuti mwanookwabo Lazaro wakali ‘kuyoobuka mububuke mubuzuba bwamamanino.’—Johane 11:24.

Bbaibbele liswaanganya “buzuba bwamamanino” kubweendelezi bwa Bwami bwa Kristo. Paulo wakalemba kuti: “Nkaambo [Kristo] weelede kuba mwami uulela kusikila Leza akabikke basinkondonyina boonse kunsi aamaulu aakwe. Sinkondo wamamanino uuyoonyonyoonwa, ndufwu.” (1 Bakolinto 15:25, 26) Aaka nkaambo kapati ncotweelede kupailila kuti Bwami bwa Leza buboole alimwi akuti kuyanda kwa Leza kucitwe ansi aano. *

Jobu wakalizyi kabotu kuti makanze aa Leza ngakubusya bantu bafwide. Bwaakusika buzuba oobu, lufwu luyoogwisyigwa. Alimwi kunyina muntu uuyoolibuzya kuti, ‘Sena lufwu ngamamanino aazyintu zyoonse?’

^ par. 8 Ibbala lyamu Cingisi lyakasandululwa kuti “kunamaumbwe” lizwa kubbala lyamu Cigiliki lipandulula “busena bwakoona.”

^ par. 18 Kutegwa muzyibe zinji kujatikizya Bwami bwa Leza, amubone cibalo 8 cabbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova. Alimwi nkoili a Web site ya www.jw.org.