Mubandi uutobela utondezya Bakamboni ba Jehova mbobakonzya kubandika abasimukobonyina. Atweezeezye kuti Kamboni uutegwa Mutinta wasika kuŋanda yamukaintu uutegwa Miyanda.

INO LEZA ULIMVWA BUTI KUJATIKIZYA MAPENZI AATUCITIKILA?

Mutinta: Kamwaamba ba Miyanda? Ndakkomana kumujana aŋanda.

Miyanda: Ndalumba.

Mutinta: Lweendo lwainda, twakabandika Leza mbwalimvwa kujatikizya mapenzi aatucitikila. * Mwakandaambila kuti makani aaya ali kumupenzya mumizeezo kwaciindi cilamfwu, kwaambisya banyoko nobakalicisa muntenda yamumugwagwa. Ino banyoko balimvwa buti mazuba aano?

Miyanda: Zimwi ziindi tabalimvwi kabotu. Pesi sunu bali kabotu.

Mutinta: Ndakkomana kumvwa kuti sunu bali kabotu. Kweelede kuti cilakatazya kuliyumya mubukkale buli boobu.

Miyanda: Inzya. Zimwi ziindi inga ndilayeeya naa balapenga ciindi cilamfwu buti.

Mutinta: Tacilubide kuyeeya boobo. Muliyeeyede kuti mulweendo lwainda ndakasiya mubuzyo uujatikizya kaambo Leza ncalekelede kupenga kuti kuzumanane nokuba kuti ulijisi nguzu zyakumana mapenzi.

Miyanda: Inzya, ndiliyeeyede.

Mutinta: Katutanalanga-langa bwiinguzi bwamu Bbaibbele, atubone twaambo tusyoonto ntotwakabandika mulweendo lwainda.

Miyanda: Cili kabotu.

Mutinta: Twakaiya kujatikizya muntu umwi uusyomeka wakaindi awalo iwakali kuyanda kuzyiba kaambo Leza ncalekelede kupenga. Nokuba boobo, Leza kunyina naakamunyemena akaambo kakubuzya makani aayo, naa kumwaambila kuti wakali kuyandika kuba buyo alusyomo lunji.

Miyanda: Aaka kakali kaambo kapya kulindime.

Mutinta: Alimwi twakaiya kuti Jehova Leza ulausa ciindi notupenga. Mucikozyanyo, Bbaibbele lyaamba kuti ciindi bantu bakwe nobakali kupenga, “wakapenga alakwe.” * Sena tacuumbulizyi kuzyiba kuti Leza ulatweetelela?

Miyanda: Inzya, cilaumbulizya.

Mutinta: Kumamanino, twakabandika kuti, akaambo kanguzu zinji Mulengi wesu nzyajisi, tulakonzya kusyoma kuti kufwumbwa ciindi ulakonzya kubweza ntaamu akugwisya kupenga.

Miyanda: Aako nkakaambo nkonditamvwisyi. Nkaambo nzi Leza ncalekela zyintu zyoonse eezyi zibyaabi kucitika kakuli ulijisi nguzu zyakuzilesya?

NGUNI WAKALI KWAAMBA MASIMPE?

Mutinta: Cakusaanguna atujalule bbuku lyakusaanguna mu Bbaibbele lya Matalikilo, kutegwa tujane bwiinguzi. Sena mulaazyi makani aajatikizya Adamu a Eva alimwi amucelo wakakasyidwe?

Miyanda: Inzya, ndakaciiya caano eeco ku Sunday school. Leza wakabaambila kuti batalyi micelo yacisamu cimwi, pele balo bakalya.

Mutinta: Aayo masimpe. Lino, atulange-lange  zyintu zyakapa kuti ba Adamu a Eva babisye. Zyintu eezyo ziliswaangene kapati amubuzyo waamba kaambo ncotupenga. Sena inga tiimwabala Matalikilo caandaano 3, kapango 1 kusikila ku 5?

Miyanda: Inzya inga ndabala. “Lino inzoka kiijisi maanu kwiinda banyama boonse bamusokwe Jehova Leza mbaakalenga. Nkabela yakaambila mwanakazi kuti, Sa ncobeni Leza wakaamba kuti, Tamweelede kulya misamu yoonse yamumuunda? Elyo mwanakazi wakaambila inzoka kuti, Micelo yamisamu yamumuunda tulailya, pele micelo yamusamu oyo uuli mukati kamuunda, Leza waamba kuti, Tamweelede kulya njiyo pe, alimwi tamweelede kwiiguma, kuti mutafwi.”’ Mpawo inzoka yakaambila mwanakazi kuti, ‘Ne! Tamukonzyi kufwa pe. Nkaambo Leza ulizi kuti mubuzuba obo mbubonya mbomuyooulya, meso aanu ayoojuka, lino muyooba mbuli Leza, muyooziba bubotu abubi mbobubede.’”

Mutinta: Ndalumba. Lino atulange-lange tupango ootu kwaciindi cisyoonto. Cakusaanguna, twabona kuti nzoka yakaambaula amwanakazi, nkokuti Eva. Cibeela cimwi camu Bbaibbele citondezya kuti mubwini iwakali kwaambaula kwiinda munzoka ngu Saatani Diabolosi. * Saatani wakabuzya Eva mulawo wa Leza waamba kujatikizya cisamu cimwi. Sena mwacibona ncaakaamba Leza kuti cakali kuyoobacitikila ba Adamu a Eva kuti baulya mucelo?

Miyanda: Bakali kuyoofwa.

Mutinta: Mwaamba kabotu. Kumane Saatani wakaamba majwi aakutamikizya Leza. Amubone ncaakaamba: “Ne! Tamukonzyi kufwa pe.” Aawa Saatani wakali kwaamba kuti Leza ulabeja!

Miyanda: Tandinaamvwide makani aayo.

Mutinta: Alimwi ciindi Saatani naakaamba kuti Leza mubeji, wakatalisya makani aakali kuyandika ciindi cili mbocibede kutegwa abambwe. Sena mwakabona kaambo?

Miyanda: Peepe.

Mutinta: Ambweni, ndimupe cikozyanyo. Atwaambe kuti bumwi buzuba ndaboola akumwaambila kuti ndilamwiinda nguzu. Ino inga mwasinizya buti kuti makani ngondaamba ngamasimpe naa pe?

Miyanda: Ndisyoma kuti nkwiinda mukumusunka.

Mutinta: Inzya, mbombubo. Ambweni inga twayandaula cintu cilema akubona naa nguni uukonzya kucinyamuna. Masimpe, kusola kubona wiinda mweenzinyina nguzu nenzila nguba-uba.

Miyanda: Ndakabona kaambo.

Mutinta: Pele ino kuti muciindi cakumwaambila kuti ndilamwiinda nguzu, ndamwaambila kuti ndilasyomeka kwiinda ndinywe? Eeci inga camuyumina, tee kayi?

Miyanda: Inzya, mbondiyeeya oobo.

Mutinta: Kayi, kusyomeka takuli mbuli nguzu, zyalo zikonzya kutondezyegwa kwiinda mukusunkwa.

Miyanda: Mbombubo.

Mutinta: Nkokuti, nzila ilikke iikonzya kubeleka njakutupa ciindi cili mbocibede kutegwa bantu babone uusyomeka kwiinda mweenzinyina.

Miyanda: Masimpe ngomwaamba.

Mutinta: Lino, amulange alimwi cibalo eeci cijanika mubbuku lya Matalikilo. Sena Saatani wakalitaminina kuti ulamwiinda nguzu Leza?

Miyanda: Peepe.

Mutinta: Leza naakafwambaana kutondezya kuti Saatani ulabeja. Muciindi caboobo, Saatani wakalitaminina kuti ulasyomeka kapati kwiinda Leza. Mubwini, Saatani wakaambila Eva kuti, ‘Leza ulamweena, pele mebo ndimwaambila masimpe.’

Miyanda: Mm. Tiindalizyi.

Mutinta: Aboobo, mubusongo bwakwe, Leza wakazyiba kuti nzila mbotu yakubamba makani aaya nkwiinda mukumupa ciindi cili mbocibede. Mukuya kwaciindi, wakali kuyoolibonya wakali kwaamba masimpe alimwi awakali kubeja.

KAAMBO KAPATI

Miyanda: Pele mbwaakafwida buyo Eva, sena tiicakalibonya kuti Leza wakali kwaamba masimpe?

Mutinta: Inzya, cakalibonya. Pele kwakali twaambo atumwi twakajatikizyidwe mukukazya kwa Saatani. Amubone kapango 5 alimwi. Sena mwacibona acimwi Saatani ncaakaambila Eva?

 Miyanda: Inzya, wakamwaambila kuti meso aakwe alakonzya kujaluka ikuti naa walya mucelo.

Mutinta: Inzya, alimwi akuti wakali kuyooba ‘mbuli Leza, akuziba bubotu abubi mbububede.’ Aboobo Saatani wakali kwaamba kuti Leza kuli cintu cibotu ncaakali kusisa kubantu.

Miyanda: Ndakabona kaambo.

Mutinta: Akwalo ooku kwakali kukazya kupati.

Miyanda: Ino mupandulula nzi?

Mutinta: Kwiinda mumajwi ngaakaamba, munzila imwi Saatani wakali kwaambila Eva kuti bantu boonse bakali kukonzya kupona kabotu kakunyina kweendelezyegwa a Leza. Amwalo mukaambo aaka, Jehova wakazyiba kuti nzila mbotu yakumanizya makani nkwiinda mukuzumizya Saatani kusola nzila yakwe. Aboobo Leza wamuzumizya Saatani kweendelezya bantu kwaciindi cili mbocibede. Ndisyoma kuti mwakabona kaambo ncokuli mapenzi manji munyika, nkaambo Saatani ngomweendelezi mwini-mwini wanyika eeyi, ikutali Leza. * Pele kuli makani mabotu.

Miyanda: Ino makani nzi?

Mutinta: Bbaibbele lilayiisya twaambo tobilo tupati-pati twamasimpe kujatikizya Leza. Kakusaanguna, Jehova lyoonse ulatubikkila maano notupenga. Mucikozyanyo, amulange-lange majwi aa Mwami Davida, aalembedwe mulugwalo lwa Intembauzyo 31:7. Davida wakainda mumapenzi manji mubuumi bwakwe, pele amubone majwi ngaakaamba mumupailo kuli Leza. Sena inga mwakabala kapango aako?

Miyanda: Inzya. Kaamba kuti: “Ndabotelwa akukondwa muluse lwako, nkaambo ulibwene mapenzi aangu, ulizi kupenga kwamoyo wangu.”

Mutinta: Aboobo, nekuba kuti Davida wakapenga kapati mubuumi bwakwe, wakajana luumbulizyo kwiinda mukuzyiba kuti Jehova wakalizizyi zyintu izyakali kumucitikila. Sena andinywe mulaumbulizyigwa kuzyiba kuti Jehova ulizizyi zyintu zyoonse zitucitikila, noziba zyintu zityompya alimwi azimwi buyo nzyobatakonzyi kumvwisya bantu?

Miyanda: Inzya, ndilaumbulizyigwa.

Mutinta: Kaambo kabili kamasimpe nkakuti, Leza kunyina nayoozumizya kupenga kuti kuzumanane kukabe kutamani. Ibbaibbele liyiisya kuti ino-ino Leza uyoobugwisya bweendelezi bwa Saatani bubyaabi. Alimwi uyoozigwisya zyintu zyoonse zibyaabi izicitika kubikkilizya azyintu izimupenzya nywebo alimwi abanyoko. Sena inga ndaakuboola nsondo iiboola kutegwa ndikamutondezye kaambo ncotuli masimpe kuti ino-ino Leza uyookugwisya kupenga koonse? *

Miyanda: Cili buyo kabotu.

Sena kuli makani aamu Bbaibbele ngomutazyi kabotu? Sena mulayanda kuzyiba njiisyo alimwi azyintu nzyobasyoma Bakamboni ba Jehova? Ikuti kacili boobo, mutawayiwayi kubabuzya Bakamboni ba Jehova. Bayookkomana kubandika andinywe makani aali boobu.

^ par. 7 Amubone “Mubandi Amukamwini Ŋanda—Sena Leza Ulakubikkila Maano Kupenga Kwesu?” mu Ngazi Yamulindizi ya July 1, 2013. Alimwi nkoili a Web site ya www.jw.org.

^ par. 61 Kutegwa muzyibe zinji, amubone cibalo 9 mubbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova. Alimwi nkoili a Web site ya www.jw.org.