“Busungu bwakuŋanda yako buyoondilya cakumaninina.”—JOH. 2:17.

NYIMBO: 127, 118

1, 2. (a) Masena nzi aakukombela ngobakali kubelesya babelesi ba Jehova kaindi? (b) Ino Jesu wakali kulimvwa buti kujatikizya tempele lya Leza ilyakali mu Jerusalemu? (c) Ino cibalo eeci cakabambilwa nzi?

KUZWA kaindi, babelesi ba Leza balikuba amasena aabo aabukombi busalala. Abelo weelede kuti ambweni wakabelesya cipaililo ciindi naakapa cituuzyo cakwe kuli Leza. (Matl. 4:3, 4) Nowa, Abrahamu, Izaka, Jakobo, alimwi a Musa, boonse bakapanga zipaililo. (Matl. 8:20; 12:7; 26:25; 35:1; Kul. 17:15) Kwiinda mukulaililwa a Jehova, bana Israyeli bakayaka tente lyakukombela. (Kul. 25:8) Mukuya kwaciindi bakazyikuyaka tempele lyakukombela Jehova. (1Bam. 8:27, 29) Nobakazwa mubuzike ku Babuloni, ba Juda bakali kubungana lyoonse muzikombelo. (Mk. 6:2; Joh. 18:20; Mil. 15:21) Banakristo bakusaanguna bakali kuswaanganina mumaanda aabasimbungano. (Mil. 12:12; 1Kor. 16:19) Mazuba aano bantu ba Jehova balaswaangana kutegwa baiye akukomba mu Maanda aa Bwami manji kapati nyika yoonse mbwiizulwa.

2 Jesu wakali kuliyanda kapati tempele lya Jehova ilyakali mu Jerusalemu cakuti sikulemba Makani Mabotu wakatondezya kuti majwi aaya aabusinsimi akazuzikizyigwa muli Jesu, aakuti: “Busungu bwaŋanda yako bwandilya cakumaninina.” (Int. 69:9; Joh. 2: 17) Taakwe Ŋanda ya Bwami iikonzya kweelela kwiitwa kuti “ŋanda ya Jehova” kweelana amajwi aaya mbwaakali kupandulula tempele lyamu Jerusalemu. (2Mak. 5:13; 33:4) Nokuba kuti cili boobo, Bbaibbele lilijisi njiisyo izitondezya mbotweelede kwaabelesya alimwi akwaalemeka masena eesu aakukombela mazuba aano. Cibalo eeci cakabambilwa kulanga-langa njiisyo eezyo alimwi akubona mbozibeleka caboola kumakani aajatikizya mbotweelede kwaalanga Maanda aa Bwami, mali aakuyasya mbwaayelede kujanwa alimwi ambwayelede kubambwa maanda aaya. *

IKULEMEKA BUKOMBI BUSALALA

3-5. Ino Ŋanda ya Bwami ibeleka mulimo nzi, alimwi ino eeci ceelede kukujatikizya buti mbotwiibona miswaangano yesu iicitilwa mumo?

3 Ŋanda ya Bwami mbobusena bwabukombi busalala mubusena motukkala. Akati kazintu zyakumuuya Jehova nzyatupa kuti zitugwasye kuli miswaangano yansondo ansondo njotucita ku Ŋanda ya Bwami. Ku Ŋanda ya Bwami nkonkuko nkotukatalusyigwa kumuuya alimwi akutambula malailile aazwa kumbunga yakwe. Boonse ibajanika balagwasyigwa munzila eeyi, ciindi nobatambwa a Jehova alimwi a Mwanaakwe. Nokuba kuti lyoonse tulajanika kutegwa tulide “atebulu lya Jehova” tatweelede kuyuubya-ubya miswaangano yesu.—1Kor. 10:21.

4 Ziindi izili boobu izyakukomba alimwi akuyumizyigwa kumuuya Jehova uzibona kuti zilayandika kapati, nkakaambo kaako ncaakasololela mwaapostolo Paulo amuuya kulemba kuti tatweelede kuleka kuswaangana antoomwe. (Amubale Bahebrayo 10:24, 25.) Sena inga twaamba kuti tulamulemeka Jehova ikuti tiitwajanika kumiswaangano ya Bunakristo kakunyina akaambo kaya koomoonga? Tulakonzya kutondezya kuti tulamulumba kapati Jehova azintu nzyatupa kumuuya kwiinda mukulibambila miswaangano alimwi akutola lubazu camoyo woonse.—Int. 22:22.

5 Mbotwiibona Ŋanda ya Bwami—ŋanda iini kwiigama alimwi azintu zyakumuuya izicitwa abusena oobu—kweelede kutondezya kuti tulailemeka. Tuyanda kuti katulilemeka munzila iipa kuti izina lya Leza litembaulwe, lyalo ililembedwe acikwankwani ca Ŋanda ya Bwami.—Amweezyanisye a 1 Bami 8:17.

6. Ino bantu bamwi baamba nzi kujatikizya Maanda aa Bwami eesu alimwi abaabo baswaanganina mumo? (Amubone cifwanikiso icili kumatalikilo aacibalo.)

6 Bantu ibatali Bakamboni balakonzya kubona mbotwaalemeka masena eesu aakukombela. Mucikozyanyo, mwaalumi umwi ku Turkey wakaamba kuti: “Bulondo alimwi akucita zintu kweelana abubambe bubikkidwe nkondakabona ku Ŋanda ya Bwami zyakandikkomanisya kapati. Bantu bakalisamide kabotu, bakali kwiile kumweta-mweta, alimwi bakandaanzya munzila yabulongwe. Eeci cakandikkomanisya kapati.” Mwaalumi ooyu wakatalika kujanika kumiswaangano lyoonse, alimwi mukuya kwaciindi wakabbapatizyigwa. Mudolopo limwi mucisi ca Indonesia, mbungano yakatamba bapati-pati bamfwulumende bakubusena oobo alimwi abasimukobonyina kuti babone Ŋanda ya Bwami mpya. Mupati wadolopo eeyo wakajanika. Wakakkomana kapati mboyakayakidwe ŋanda eeyi, mboyakali kuboneka, alimwi akubona lubuwa lwanjiyo lubotu kapati. Wakaamba kuti: “Bulondo bwaŋanda eeyi butondezya lusyomo lwanu lwini-lwini.”

Zintu nzyotucita zilakonzya kutondezya kuti tatumulemeki Leza (Amubone muncali 7 a 8)

7, 8. Ntwaambo nzi tuyandika kapati ntobeelede kubikkila maano aabo ibajanika kumiswaangano ya Bunakristo?

7 Bulemu mbotutondezya kuli Leza uututamba kumiswaangano ya Bunakristo bweelede kulibonya mukulilemeka kwesu, munsamino, alimwi ambotulibamba. Kulemeka miswaangano yesu alimwi kuyanda kuti katutaciindizyi muzintu nzyotucita. Kwajanika kuti bamwi balaciindizya mumakani aambobeelede kulilemeka  ciindi nobali kumiswaangano yambungano, kakuli bamwi balaciindizya kutasama kabotu nobali ku Ŋanda ya Bwami. Masimpe, Jehova uyanda kuti babelesi bakwe alimwi abeenzu ibasika kabalimvwa kabotu nobali kumiswaangano. Alimwi aabo ibajanika inga tiibayanda kunyonganya bamwi kwiinda mukutasama kabotu, kulemba tugwalo twaafooni naa kubandika ciindi muswaangano noucitika, kulya akunywa, naa kucita zintu zimwi zikonzya kunyonganya bamwi. Bazyali beelede kuyiisya bana babo kutegwa bamvwisye kuti Ŋanda ya Bwami tabuli busena bwakusobanina naa bwakwiile kubali-balika alubuwa.—Muk. 3:1.

8 Kanyemede kapati, Jesu wakabatanda mutempele lya Leza bantu ibakali kucita makwebo. (Joh. 2:13-17) Maanda aa Bwami eesu aalo masena aabukombi busalala alimwi nkonkuko nkotuyiisyigwa kumuuya. Aboobo, zintu izili zyoonse zijatikizya makwebo izitajatikizyi zintu zyakumuuya zyeelede kucitilwa kumbi.—Amweezyanisye a Nehemiya 13:7, 8.

KUYAKA ALIMWI AMBWAAJANWA MALI AAKUYASYA MAANDA AA BWAMI

9, 10. (a) Ino Maanda aa Bwami ayakwa buti alimwi ino mali aakuyasya ajanwa buti, alimwi ino mbubotu nzi bwajanika kwiinda mububambe oobu? (b) Ino mbubambe nzi bwaluyando ibwagwasya kapati mbungano izyatakajisi mali aakubelesya kuyasya Ŋanda ya Bwami?

9 Mbunga ya Jehova yacita zyoonse nzyoikonzya kutegwa kube Maanda aa Bwami alimwi akubikka bubambe bwakujana mali aakuyasya maanda aaya. Mulimo wakubamba mapulani aamaanda, wakuyaka, alimwi awakubambulula ulabelekwa abasikulisungula ibatabbadelwi. Ino kwaba kuzwidilila kuli buti? Kutalikila mu November 1, 1999, masena mabotu aakubelesya mubukombi busalala aainda ku 28,000 ayakilwa mbungano nyika yoonse mbwiizulwa. Kweelana mweelwe waakati-kati, eeci caamba kuti Maanda aa Bwami osanwe alikuyakwa buzuba abuzuba mumwaka.

10 Mbunga ilabikkila maano kugwasyilizya kutegwa Maanda aa Bwami ayakwe kufwumbwa kubusena nkwaayandika kuyakwa. Bubambe oobu bwaluyando buyeeme anjiisyo yamu Magwalo yakuti aabo bajisi zintu ziindilide bape baabo babulizyide, kutegwa “kube kweelana.” (Amubale 2 Bakorinto 8:13-15.) Akaambo kabubambe oobu, mbungano izyatakali kukonzya kuliyakila Maanda aa Bwami zyayakilwa maanda mabotu aakubelesya mubukombi busalala.

11. Ino bakwesu bamwi bakaamba nzi kujatikizya Ŋanda ya Bwami mpya, alimwi ino eeci cimupa kulimvwa buti?

11 Mbungano imwi yamucisi ca Costa Rica iyakagwasyigwa abubambe oobu yakalemba kuti: “Ciindi notwiima kumbele lya Ŋanda ya Bwami, cili mbuli kuti nciloto! Tatukonzyi kusyoma pe. Ŋanda yesu mbotu kapati yakamana kuyakwa yoonse mumazuba buyo aali lusele! Eeci cakakonzyeka akaambo kakulongezyegwa a Jehova, bubambe bubikkidwe ambunga yakwe, alimwi alugwasyo kuzwa kubakwesu bayandwa. Masimpe busena  oobu bwakukombela ncipego citaliboteli, cintu cibotu kapati Jehova ncaatupa. Tulikkomene kapati akaambo kaŋanda eeyi.” Sena tamukkomani kumvwa majwi aali boobu aakulumba Ŋanda ya Bwami mpya alimwi akuzyiba kuti bakwesu banji kapati mumasena manji nyika yoonse mbwiizulwa balikkomene? Ooyu mulimo wa Jehova, nkaambo mboyamanina buyo kuyakwa Ŋanda ya Bwami, ilazula abantu babombe myoyo ibayanda kuzyiba zinji kujatikizya Mulengi wesu siluyando.—Int. 127:1.

12. Mbuti mbomukonzya kutola lubazu mumulimo wakuyaka Maanda aa Bwami?

12 Bakwesu abacizyi banji bajana lukkomano lunji kwiinda mukutola lubazu mumulimo wakuyaka Maanda aa Bwami. Tacikwe makani naa tulakonzya kugwasya mukuyaka kwini naa pe, toonse tulijisi coolwe cakugwasyilizya mumilimo iili boobu kwiinda mukusanga. Ciindi Bbaibbele nolyakali kulembwa, kusungwaalila bukombi busalala kwakagwasya kapati mumakani aakuyaka maanda aakukombela kutegwa Jehova alemekwe, alimwi mbocibede oobo amazuba aano.—Kul. 25:2; 2Kor. 9:7.

KUSALAZYA MAANDA AA BWAMI

13, 14. Ninjiisyo nzi zyamu Magwalo zibeleka mukubamba Maanda aa Bwami eesu kuti kaasalala alimwi kaajisi bulondo?

13 Yamana kuyakwa Ŋanda ya Bwami, iyandika kuti kaisalala lyoonse alimwi kakuli bulondo kutegwa itondezye bube bwa Leza ngotukomba—Leza uucita zintu kweelana abubambe. (Amubale 1 Bakorinto 14:33, 40.) Bbaibbele litondezya kuti busalali tabujatikizyi buyo kusalala kumuuya amumizeezo pele alimwi bulajatikizya akusalala kumubili. (Ciy. 19:8) Aboobo, ikuti bantu kabayanda kutambulwa a Jehova, beelede kuba balondo.

14 Kweelana anjiisyo eezyi, lyoonse tweelede kulimvwa kwaanguluka kutamba bantu bajisi luyandisisyo kumiswaangano yesu, katujisi lusyomo  lwakuti mboiboneka ŋanda iyoopa kuti baukkomanine mulumbe mubotu ngotubakambaukila. Bayoobona kuti tukomba Leza uusalala alimwi lino-lino uyoocinca nyika kuba paradaiso.—Is. 6:1-3; Ciy. 11:18.

15, 16. (a) Nkaambo nzi ncocikonzya kukatazya kubamba Ŋanda ya Bwami kuti kaisalala lyoonse, pele nkaambo nzi eeci ncociyandika? (b) Mbubambe nzi buliko mumbungano ibwakusalazya, alimwi ino umwi aumwi ujisi coolwe nzi?

15 Bantu bamwi balakonzya kubikkila maano kapati kukusalazya kwiinda bamwi. Zintu izili mbuli mbobakakomezyegwa, mankandya, lusuko, mboibede migwagwa, maanzi alimwi azibelesyo zyakubelesya kusalazya, zilakonzya kubajatikizya bamwi mbobaubona mulimo wakusalazya. Kufwumbwa bukkale mbobubede kubusena bwanu, Ŋanda ya Bwami yeelede kuba citondezyo mumakani aabulondo, akaambo kakuti ijisi zina lya Jehova alimwi akuti mbusena bwabukombi busalala.—Dt. 23:14.

16 Kusalazya Ŋanda ya Bwami taceelede kuba cintu cacibukilambuta pe. Kabunga kabaalu kamwi akamwi keelede kubamba mulongo wakusalazya alimwi akubona kuti kuli zibelesyo zyakubelesya kusalazya busena bwakukombela bwambungano kutegwa kabuli kabotu. Akaambo kakuti milimo imwi yakusalazya iyandika kubikkila maano kapati kwiinda milimo imwi mbowamanina muswaangano umwi aumwi, cilayandika kubelekela antoomwe alimwi akweendelezya milimo eeyi kutegwa kubule mbazu iitabikkilwi maano. Basimbungano boonse balijisi coolwe cakutobela bubambe bubikkidwe mumakani aaya.

KUBAMBULULA MASENA EESU AAKUKOMBELA

17, 18. (a) Mbubambe nzi bwamu Magwalo ibwakaliko ibwakubambulula masena aabukombi busalala? (b) Nkaambo nzi Maanda aa Bwami ncaayandika kulanganizyigwa kabotu?

17 Babelesi ba Jehova alimwi balabikkila maano kapati kubambulula masena aabo aakukombela kutegwa lyoonse kaaboneka kabotu. Mwami wa Juda Jehoasi wakaambila bapaizi kuti babelesye zyakusanga bantu nzyobakasangila ŋanda ya Jehova kutegwa ‘babambulule ŋanda kufwumbwa mpoyakali kuyandika.’ (2Bam. 12:4, 5) Nokwakainda myaka yiinda ku 200, Mwami Josiya alimwi wakabelesya zyakusanga zyatempele kutegwa abambulule mpolyakali kuyandika kubambulula.—Amubale 2 Makani 34:9-11.

18 Malipooti aazwa kumaofesi aamitabi atondezya kuti muzisi zimwi, bantu banji tabaabikkili maano makani aakubambulula maanda aabo. Ambweni mumasena aali boobo mbasyoonto buyo ibajisi luzyibo lwakubambulula naa ibajisi zyakubelesya mumulimo wakubambulula. Aboobo, ikuti mbungano kaitabikkili maano kubambulula Ŋanda ya Bwami, ilakonzya kunyonyooka mumyaka buyo misyoonto alimwi taikonzyi kupa bumboni bubotu kubantu bakkala mubusena oobo. Kulubazu lumwi, ciindi basimbungano nobacita zyoonse nzyobakonzya kutegwa Ŋanda ya Bwami kailibonya kabotu, zina lya Jehova lilatembaulwa alimwi cipa kuti mali ngobasanga basyomima kaabelesyegwa kabotu.

Tatweelede kuleka kubikkila maano kusalazya alimwi akubambulula Ŋanda ya Bwami (Amubone mincali 16 a 18)

19. Ino mukanzide kucita nzi mumakani aajatikizya maanda ngotubelesya mubukombi busalala?

19 Ŋanda ya Bwami niŋanda iyakaabwa kuli Jehova. Aboobo, inga tiitwaamba kuti njamuntu umwi naa kuti njambungano pe, tacikwe makani kufwumbwa makani aajatikizya milawo yacisi mbwaatondezya. Njiisyo zya Bunakristo zyaamba kuti tweelede kukamantana kapati mukubona kuti ŋanda eeyi yazumanana kuboneka kabotu kweelana ancoyakayakilwa. Boonse mumbungano balakonzya kutola lubazu kwiinda mukutondezya bulemu bweelede kumasena eesu aakukombela, kwiinda mukusanga, alimwi akwaaba ciindi anguzu mukubamba Maanda aa Bwami kuti kaasalala alimwi akubona kuti abambululwa mpaayelede kubambululwa. Kwiinda mukugwasyilizya bubambe oobu, tutondezya busungu bwesu kumasena aabukombi busalala bwa Jehova, mbubwenya Jesu mbwaakacita.—Joh. 2:17.

^ par. 2 Nokuba kuti cibalo eeci cibandika makani aajatikizya Maanda aa Bwami, njiisyo izili mumo zilakonzya kubeleka aku Maanda Aakucitila Miswaangano Mipati alimwi amasena aambi aabelesyegwa mubukombi busalala.