“Amupakamane! Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.”—1PET. 5:8.

1. Amupandulule mungelo umwi mbwaakaba Saatani.

KUMATALIKILO, wakali kukkomaninwa a Jehova. Nokuba boobo, mungelo ooyu wakatalika kulombozya kuti bantu kabamukomba. Muciindi cakuleka kulombozya ooku kubyaabi, wakazumanana kusikila limwi kwakakomena akuzyala cibi. (Jak. 1:14, 15) Mungelo ooyu ngu Saatani, ‘iwatakakakatila mukasimpe.’ Wakazangila Jehova akuba “usyi wabubeji.”—Joh. 8:44.

2, 3. Ino mazina aakuti “Saatani,” “Diabolosi,” “muzoka” alimwi a “simwaaba” ayubununa nzi kujatikizya sinkondo mupati wa Jehova?

2 Kuzwa ciindi naakazanga, Saatani watondezya kuti ngosinkondo mupati wa Jehova alimwi awabantu. Mazina aakwe Saatani alayubununa mbocili cipati cibi ncaakacita. Izina lyakuti Saatani lyaamba “Sikukazya,” kutondezya kuti mungelo ooyu ukazya bweendelezi bwa Leza, ulibusulide alimwi ulabulwana kapati. Kwiinda zyoonse, Saatani uyanda kuti bweendelezi bwa Jehova bumane.

3 Mbubwenya mbokulembedwe mulugwalo lwa Ciyubunuzyo 12:9, Saatani waambwa kuti Diabolosi, izina lyaamba “Sikubejekezya.” Eeci cituyeezya kuti Saatani usampaula Jehova kwiinda mukumwaamba kuti ulabeja. Majwi aakuti “imuzoka ooyo wakaindi” atuyeezya cakacitika mu Edeni ibuzuba Saatani naakabelesya  nzoka kweena Eva. Majwi aakuti “simwaaba ooyo mupati” atuyeezya cinyama cipati ciyoosya alimwi alamweelela Saatani akaambo kabukali bwakwe mukuyandisya kunyonganya makanze aa Jehova alimwi akunyonyoona bantu ba Leza.

4. Ncinzi ncotutiilange-lange mucibalo eeci?

4 Masimpe cilalibonya kuti Saatani ulayandisisya kunyonganya lusyomo lwesu. Nkakaambo kaako Bbaibbele litucenjezya kuti: “Amulibatamike, amupakamane! Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.” (1Pet. 5:8) Akaambo kakucenjezya ooku, cibalo eeci cilalanga-langa bube bwa Saatani botatwe ibutondezya kuti tweelede kupakamana kutegwa tulikwabilile kuli sinkondo mupati wa Jehova alimwi awabantu ba Leza.

SAATANI ULAANGUZU

5, 6. (a) Amupe zikozyanyo izitondezya kuti bangelo ‘mbaasinguzu.’ (b) Muunzila nzi motukonzya kwaamba kuti Saatani ulijisi “nguzu zyakuleta lufwu”?

5 Bangelo nzilenge zyamuuya izijisi “nguzu” kapati. (Int. 103:20) Balisumpukide kwiinda bantu, balicenjede alimwi mbayumu. Pele bangelo basyomeka bazibelesya kabotu nguzu zyabo. Mucikozyanyo, ciindi cimwi mungelo wa Jehova wakajaya basikalumamba bana Asuri ibali 185,000—cintu muntu uulya maila ncaatakali kukonzya kucita alimwi icakali cintu ciyumu kumpi yabasikalumamba bana Israyeli. (2Bam. 19:35) Alimwi aciindi cimwi, mungelo wakabelesya nguzu zyakwe iziinda nguzu zyabantu kutegwa aangunune baapostolo ba Jesu muntolongo. Mungelo ooyu wakabavwuna kwiinda mukukkiinuna zijazyo alimwi akubagwisya kumane akuzikkiya alimwi nobakazwa—zyoonse eezyi zyakacitika balindizi kabaliko!—Mil. 5:18-23.

6 Bangelo basyomeka babelesya nguzu zyabo munzila iigwasya, pele Saatani ubelesya nguzu zyakwe kucita zintu zibi. Kwaamba masimpe, ulijisi nguzu kapati alimwi ngusilweeno. Magwalo amwaamba kuti “mweendelezi wanyika eeyi” alimwi akuti ‘nguleza wabweende bwazintu obuno.’ (Joh. 12:31; 2Kor. 4:4) Saatani Diabolosi alimwi ulijisi “nguzu zyakuleta lufwu.” (Heb. 2:14) Eeci tacaambi kuti ulabajaya bantu cacigaminina. Nokuba boobo, muuya wakwe wabujayi wabajatikizya kapati bantu munyika eeyi. Kuyungizya waawo, akaambo kakuti Eva wakasyoma Saatani alimwi akuti Adamu wakalubizyila Leza, cibi alimwi alufwu zyakabasikila bantu boonse. (Rom. 5:12) Munzila eeyi, Diabolosi ulijisi “nguzu zyakuleta lufwu.” Masimpe “mujayi”—kweelana a Jesu mbwaakaamba. (Joh. 8:44) Masimpe, Saatani ngusinkondoma uujisi nguzu kapati!

7. Mbuti madaimona mbwaatondezya kuti alijisi nguzu kapati?

7 Ciindi notumukazya Saatani, tulalyaandaanya kulinguwe alimwi akuli baabo ibali kulubazu lwakwe mukukazya bweendelezi bwakoonse-koonse. Ibali kulubazu lwakwe balabikkilizya amweelwe musyoonto wabangelo ibakazanga, naa madaimona. (Ciy. 12:3, 4) Ziindi zinji, madaimona atondezya kuti alijisi nguzu kapati kwiinda mukupenzya bantu. (Mt. 8:28-32; Mk. 5:1-5) Tamweelede kuzyuubya-ubya nguzu nzyobajisi bangelo babyaabi aaba naa nguzu nzyajisi “mweendelezi wamadaimona.” (Mt. 9:34) Kakunyina kugwasyigwa a Jehova, tatukonzyi kumuzunda pe Saatani.

SAATANI MUKALI KAPATI

8. (a) Ino Saatani ujisi makanze nzi? (Amubone cifwanikiso icili kumatalikilo aacibalo.) (b) Kweelana azintu nzyomubona nywebo kumugama, ino nyika itondezya buti kuti Saatani mukali kapati?

8 Mwaapostolo Petro wakakozyanisya Saatani kuli “syuumbwa wabutambo uuvwuluma.” Kweelana abuvwuntauzyi bumwi,  ibbala lya Chigiliki lisanduludwe kuti “uuvwuluma” litondezya “kulila kupati kwamunyama mukali uufwide nzala kapati.” Masimpe, majwi aaya alamweelela Saatani akaambo kabukali bwakwe! Nokuba kuti nyika yoonse ili kale mumaanza aakwe, Saatani ucifwide nzala yabantu abamwi banji. (1Joh. 5:19). Nkakaambo kaako Saatani lino ncalwana kapati ciinga cabananike, antoomwe abeenzinyina ‘ibambelele zimbi.’ (Joh. 10:16; Ciy. 12:17) Saatani ukanzide kunyonyoona bantu ba Jehova. Mapenzi ngaali kuletela basikutobela Jesu kuzwa mumwaanda wamyaka wakusaanguna kusikila sunu asinizya ncobeni kuti mukali kapati.

9, 10. (a) Mbuti Saatani mbwaakasola kusinkila makanze aa Leza kujatikizya cisi cabana Israyeli? (Amupe zikozyanyo.) (b) Nkaambo nzi Saatani ncaakali kubalwana kapati bana Israyeli? (c) Ino muyeeya kuti Diabolosi ulimvwa buti ikuti mubelesi wa Jehova mazuba aano wacita cibi cipati?

9 Mukusola kusinkila makanze aa Leza, Saatani ulabutondezya bukali bwakwe munzila aimwi. Syuumbwa uufwide nzala kapati taakwe nacifwida luse cintu ncayanda kuluma. Syuumbwa taakwe natondezya luzyalo ciindi nayanda kujaya alimwi tausi amana kujaya cintu eeco. Mbubwenya buyo, Saatani takwe luse kuli baabo mbayanda kumena buumbulu. Mucikozyanyo, amuyeeye buyo Saatani Diabolosi mbwaakali kulangaula nzila yakujazya bana Israyeli kwiinda mukubapa kucita zibi mbuli bwaamu alimwi abulyato. Ciindi nomubala makani aajatikizya icakacitikila Zimuri akaambo kakutalilemeka alimwi acakacitikila Gehazi akaambo kabulyato, sena “mwabona” syuumbwa uuvwuluma mbwaakazwidilila?—My. 25:6-8, 14, 15; 2Bam. 5:20-27.

Saatani ulakkomana ciindi mubelesi wa Jehova naacita cibi (Amubone muncali 10)

10 Kuli kaambo kapati ikakali kupa kuti Saatani kalwana bana Israyeli. Kayi, ncecisi imwakali kuyoozwa Mesiya—muntu iwakali kuyoopwayaula mutwe wa Saatani akupa kuti bweendelezi bwa Jehova busumpulwe. (Matl. 3:15) Saatani tanaakali kuyanda kuti bana Israyeli bazwidilile, alimwi wakali mukali kapati mukusola kuti balubizye. Mutayeeyi kuti Saatani wakausa ciindi Davida naakacita bumambe naa ciindi musinsimi Musa naatakeelela kunjila mu Nyika Yakasyomezyedwe. Muciindi cakuusa, Saatani ulakkomana kapati ciindi mubelesi wa Jehova naacita cibi cipati. Alimwi buya, kuzunda kwakwe ooku nkonkuko  Diabolosi nkwabelesya mukusampaula Jehova.—Tus. 27:11.

11. Makanze nzi ngaakajisi Saatani mukulwana Sara?

11 Saatani wakali kuusulaika kapati mukwasyi imwakali kuyoozwa Mesiya. Mucikozyanyo, amubone icakacitika ciindi Abrahamu naakaambilwa kuti wakali kuyooba “cisi cipati.” (Matl. 12:1-3) Ciindi Abrahamu a Sara nobakali mu Egepita, Farao wakabweza Sara kutegwa abe mukaintu wakwe. Nokuba boobo, Jehova wakavwuna Sara kukutalilemeka ikwakali kulangilwa kucitika. (Amubale Matalikilo 12:14-20.) Kakuceede buyo ciindi cisyoonto kuti Izaka azyalwe, cintu cikozyenye aceeci cakacitika ku Gerari. (Matl. 20:1-7) Sena Saatani wakalijatikizyidwe muzintu eezyi izyakali kucitika? Sena Saatani wakali kulangila kuti Sara, walo iwakasiya munzi wa Uri iwakavwubide kapati akukkala mumatente, wakali kukonzya kukwelelezyegwa abuvwubi bwa Farao alimwi abwa Abimeleki? Sena Saatani wakali kuyeeya kuti Sara wakali kukonzya kucileka kusyomeka kumulumi wakwe alimwi akuli Jehova akucita bumambe kwiinda mukukwatwa? Bbaibbele talyaambi pe, pele tulijisi twaambo tulimvwisya itutupa kusyoma kuti Diabolosi wakali kuyookkomana kapati ikuti Sara naakalubizya mpoonya akunyangwa coolwe cakuzyala lunyungu ilwakasyomezyedwe. Saatani naatakausa akaambo kakuti cikwati camukaintu ooyu mubotu, mpuwo yakwe mbotu alimwi acilongwe cakwe a Jehova zyanyongana. Masimpe, Saatani ulijisi bukali bupati ncobeni!

12, 13. (a) Mbuti Saatani mbwaakatondezya bukali bwakwe bupati ciindi naakazyalwa Jesu? (b) Ino muyeeya kuti Saatani ulimvwa buti kujatikizya bakubusi mazuba aano ibayanda Jehova alimwi ibasolekesya kubelekela Leza?

12 Jesu wakazyalwa nokwakainda myaanda yamyaka kuzwa ciindi ca Abrahamu. Mutayeeyi kuti Saatani wakali kuyeeya kuti mwana muvwanda ooyu wakali kweebeka kapati. Saatani wakalizyi kuti mwana muvwanda ooyu wakali kuyookomena akuba Mesiya iwakasyomezyedwe. Masimpe, Jesu wakali cibeela cakusaanguna calunyungu lwa Abrahamu, walo iwakali ‘kuyoonyonyoona milimo ya Diabolosi.’ (1Joh. 3:8) Sena Saatani wakali kukonzya kuyeeya kuti kujaya mwana ooyu lwakali lunya? Saatani tabikkili maano kuzintu ziluzi naa zitaluzi. Alimwi buya, kujatikizya mwana Jesu, Saatani wakatalika kumulwana kakunyina akusowa ciindi. Munzila nzi?

13 Mwami Heroda wakanyema kapati ciindi basikupandulula bweende bwanyenyeezi nobakabuzya kujatikizya “ooyo wakazyalwa kali mwami waba Juda,” alimwi wakalikanzide kumujaya. (Mt. 2:1-3, 13) Kutegwa asinizye ncobeni kuti mwana ooyo wajaigwa, wakalailila kuti bana basankwa bamu Betelehemu alimwi abamuzyooko zyamunzi boonse ibakajisi myaka yakuzyalwa iisika ali yobilo kuya ansi, bajaigwe. (Amubale Matayo 2:13-18.) Jesu wakafwutuka kukujaigwa ooku kwalunya, pele ino eeci citondezya nzi kujatikizya sinkondoma Saatani? Eeci cisinizya ncobeni kuti Diabolosi tabulemeki buumi bwabantu. Tabeengeleli bana. Saatani ncobeni ‘ngusyuumbwa wabutambo uuvwuluma.’ Tamweelede kubuubyaubya bukali bwakwe bupati!

SAATANI NGUSILWEENO

14, 15. Mbuti Saatani ‘mbwaaofwaazya mizeezo yabantu batasyomi’?

14 Lweeno nenzila ilikke Saatani njabelesya kweena bantu kuti bacileke kubelekela Leza siluyando, Jehova. (1Joh. 4:8) Kwiinda mukubelesya lweeno, Saatani wapa kuti bantu batazyibi kuti “bayandika kusololelwa a Leza.” (Mt. 5:3) Aboobo, ‘waofwaazya mizeezo yabantu batasyomi, ikutegwa utabamunikili mumuni wabulemu bwamakani mabotu aajatikizya Kristo, uuli ncinkozya ca Leza.’—2Kor. 4:4.

 15 Nzila imwi yalweeno njabelesya kapati Saatani mbukombi bwakubeja. Ulakkomana kapati kubona bantu kabakomba basikale, zilengwaleza, naa banyama—nociba cintu naa muntu uuli woonse muciindi cakukomba Jehova, walo ‘uuyanda kuti bantu kabakomba buyo nguwe alikke!’ (Kul. 20:5) Nobaba baabo ibayeeya kuti bakomba Leza munzila iiluzi balaofwaazyigwa anjiisyo zyakubeja alimwi azilengwa zitakwe mpindu. Baleetezya, bali mbuli baabo Jehova mbaakaambila kuti: “Ino nkaambo nzi ncomuzumanana kubbadela mali kuula cakulya citali cakulya cini-cini, alimwi nkaambo nzi ncomusowa mali ngomubelekela kuula zintu zitamupi kukkutila? Amundiswiililisye, eelyo mulalya cakulya cibotu, alimwi mulakkomana kapati akaambo kazyakulya zyamafwuta.”—Is. 55:2.

16, 17. (a) Nkaambo nzi Jesu ncaakaambila Petro kuti: “Koya kusyule lyangu, Saatani”? (b) Mbuti Saatani mbwakonzya kutweena kutegwa tuleke kupakamana?

16 Saatani ulakonzya kubeena nobaba babelesi ba Jehova basungu. Mucikozyanyo, amubone cakacitika ciindi Jesu naakaambila basikwiiya bakwe kuti wakali kuyoojaigwa. Cakutadooneka, Petro wakajisi makanze mabotu ciindi naakamutola ambali akumwaambila kuti: “Kolyeengelela Mwami; eeci tacikakucitikili pe.” Jesu wakaingula Petro cakusinizya kuti: “Koya kusyule lyangu, Saatani!” (Mt. 16:22, 23) Nkaambo nzi Jesu ncaakaambila kuti Petro ngu “Saatani”? Nkaambo Jesu wakalizyi icakali kuyanda kucitika. Ciindi cakali afwaafwi kuti ajaigwe akuba cituuzyo cacinunuzyo alimwi akutondezya kuti Diabolosi mubeji. Ciindi eeci cakali kuyandika kapati mubuumi bwabantu boonse, tiicakali ciindi Jesu naakali kuyandika ‘kulyeengelela.’ Ikuti naatakapakamana, Saatani naakakkomana nkaambo ncencico ncaakali kuyanda.

17 Mbotuyaabuswena afwaafwi amamanino aabweende bwazintu oobu, andiswe tupona muziindi zikatazya. Saatani uyanda kuti tutapakamani, ‘tulyeengelele’ kwiinda mukulabila zintu zyamunyika, calo cikonzya kupa kuti tucileke kupakamana. Mutalekeli kuti eeci cimucitikile! Muciindi caboobo, “amulangile.” (Mt. 24:42) Muteenwi pe abucenjezu bwa Saatani mukuyeeya kuti mamanino acili kulamfwu—naa kuyeeya kuti taakwe naayoosika.

18, 19. (a) Mbuti Saatani mbwakonzya kutweena kujatikizya mbotulibona lwesu tobeni? (b) Mbuti Jehova mbwatugwasya kutegwa tuzumanane kupakamana alimwi akulangila?

18 Saatani alimwi ulasola kutweena kwiinda mukubelesya nzila aimwi. Ulakonzya kutupa kulimvwa kuti tatuyandiki kuli Leza alimwi akulimvwa kuti zibi zyesu kunyina nozikonzya kulekelelwa. Oolu alwalo ndweeno lwa Saatani. Alimwi buya, nguni ncobeni ngwatayandi Jehova? Ngu Saatani. Nguni ncobeni uutakonzyi kulekelelwa? Alimwi, ngu Saatani. Pele Bbaibbele litwaambila kuti: “Leza tali Leza uutaluleme pe uunga waluba milimo yanu alimwi aluyando ndomwakatondezya kuzina lyakwe.” (Heb. 6:10) Jehova ulalumba kapati ciindi notusola kumukkomanisya, alimwi mulimo wesu tauli wabuyo. (Amubale 1 Bakorinto 15:58.) Aboobo, tuteenwi pe alweeno lwa Saatani.

19 Mbuli mbotwabona, Saatani ulaanguzu, mukali kapati, alimwi ngusilweeno. Pele mbuti mbotukonzya kuzwidilila mukulwana sinkondo ooyu uuyoosya? Jehova tanaatulekelezya. Ijwi lyakwe lilatwaambila kujatikizya nzila zya Saatani, alimwi “tulizizyi nzila zyakwe zyabucenjezu.” (2Kor. 2:11) Ikuti twazizyiba nzila zya Saatani, cilakonzya kutugwasya kupakamana alimwi akulangila. Pele kuzyiba buyo nzila zya Saatani takuzulide pe. Bbaibbele lyaamba kuti: “Amumukazye Diabolosi eelyo ulamutija.” (Jak. 4:7) Cibalo citobela ciyoolanga-langa nzila zyotatwe mbotukonzya kulwana Saatani akuzwidilila.