“Amusyome mulinguwe ziindi zyoonse, nywebo nobantu.”—INT. 62:8.

1-3. Mbuti lusyomo lwa Paulo muli Jehova mbolwakayumizyigwa? (Amubone cifwanikiso icili kumatalikilo aacibalo.)

CAKALI kukatazya ncobeni kuba Munakristo mu Roma. Akaambo kakutamikizyigwa kuumpa dolopo mu 64 C.E. alimwi akutamikizyigwa kuti tiibakali kubayanda bantu, basikutobela Kristo bakali kupenzyegwa kapati. Ikuti nomwakali umwi wa Banakristo kuciindi eeco, buzuba abuzuba mwakali kulangilwa kwaangwa alimwi akupenzyegwa. Bamwi akati ka Banakristonyoko bakali kukonzya kujaigwa abanyama naa kugagailwa azisamu zyakupenzyezya alimwi akuumpwa bulanga kutegwa kube mumuni masiku.

2 Mwakali mubukkale buli boobu bukatazya mwaapostolo Paulo naakaangwa lwabili mu Roma. Sena Banakristo bamwi bakali kuyakumugwasya? Kuboneka kuti Paulo wakali kulibilika ikuti naa wakali kuyakugwasyigwa, inga twaamba boobu akaambo kamajwi ngaakalembela Timoteyo kuti: “Nindakali kulikwabilila mumulawo ciindi cakusaanguna kunyina wakandiiminina pe, pele boonse bakandilekelezya—lino Leza atabapi mulandu pe.” Nokuba boobo, Paulo wakalizyi kuti kunyina naakali kukonzya kubula lugwasyo cakumaninina. Wakalemba kuti: “Pele Mwami wakalaandime lyoonse alimwi wakandipa nguzu.” Inzya, Mwami Jesu wakapa Paulo nguzu nzyaakali kuyandika. Ino wakagwasyigwa buti alugwasyo  oolu lwa Leza? Amumvwe cakatobela, wakaamba kuti: “Ndakavwunwa kumulomo wasyuumbwa.”—2Tim. 4:16, 17. *

3 Kweelede kuti Paulo wakayumizyigwa kapati mukuyeeya cintu eeci cakamucitikila, cakamugwasya kusyoma kuti Jehova wakali kuyakumugwasya kutegwa aliyumye mumasunko aakwe alimwi amubuyumuyumu buli boonse mbwaakali kukonzya kuyaanya kumbele. Alimwi buya, wakazumanana kwaamba kuti: “Mwami wangu uyoondivwuna kumulimo mubi uuli woonse.” (2Tim. 4:18) Inzya, Paulo wakazyiba kuti ciindi bantu nobakonzya kwaalilwa kugwasya, Jehova alimwi a Mwanaakwe balakonzya kupa lugwasyo luyandika ncobeni!

ZYOOLWE ‘ZYAKUSYOMA JEHOVA’

4, 5. (a) Ino nguni lyoonse uukonzya kumupa lugwasyo ndomuyandika? (b) Mbuti mbomukonzya kuyumya cilongwe canu a Jehova?

4 Sena kuli ciindi cimwi nomwakalimvwa kulekelezyegwa nomwakali mubukkale bukatazya? Ambweni cilakonzya kuba ciindi nomwakali kulangaula mulimo, kulwana buyumuyumu kucikolo, buyumuyumu bwakuciswa-ciswa, naa bukkale buli boonse bukatazya. Ambweni mwakalomba kugwasyigwa pele mwakatyompwa nkaambo kunyina naba omwe iwakamugwasya. Masimpe, mumapenzi amwi bantu tabakonzyi kugwasya. Mubukkale buli boobu, sena lulayo lwamu Bbaibbele lwakuti “kosyoma Jehova” inga lwaba lwabuyo? (Tus. 3:5, 6) Sena talukonzyi kugwasya? Peepe! Ncobeni Leza ulagwasya, kweelana azibalo zinji zyamu Bbaibbele mbozitondezya.

5 Aboobo, muciindi cakunyema akaambo kakuti bantu tiibamugwasya, amubone bukkale oobo mbuli mbwaakali kububona Paulo—kububona kuba coolwe cakusyoma Jehova cakumaninina alimwi akubona mbwagwasya caluyando. Eeci ciyoopa kuti lusyomo lwanu mulinguwe luyume alimwi akupa kuti cilongwe canu anguwe ciyume ncobeni.

LUSYOMO LULAYANDIKA MUCILONGWE CESU A LEZA

6. Nkaambo nzi ncocikonzya kumuyumina kusyoma Jehova ciindi nomuli mubukkale bukatazya?

6 Sena mulakonzya kumwaambila Jehova penzi lyanu mumupailo alimwi akulimvwa kukatalukwa mukuzyiba kuti mwacita ncomukonzya kucita mubukkale buli boobo akusiya zyoonse mumaanza aakwe? Inzya, mulakonzya kucita oobo! (Amubale Intembauzyo 62:8; 1 Petro 5:7.) Kwiiya kucita boobo ncintu ciyandika kapati kutegwa mube acilongwe a Jehova. Nokuba boobo, cilakonzya kumuyumina kusyoma kuti Jehova uyoomupa lugwasyo ndomuyandika. Ino nkaambo nzi? Kaambo kamwi kalakonzya kuba kakuti zimwi ziindi Jehova tainguli mpoonya-mpoonya.—Int. 13:1, 2; 74:10; 89:46; 90:13; Hab. 1:2.

7. Nkaambo nzi zimwi ziindi Jehova ncatainguli mipailo yesu mpoonya-mpoonya?

7 Nkaambo nzi Jehova ncatainguli kulomba kwesu kuli koonse mpoonya-mpoonya? Amuyeeye kuti ukozyanisya cilongwe cesu anguwe kucilongwe camwana abausyi. (Int. 103:13) Mwana takonzyi kulangila kuti kufwumbwa ncaalomba bazyali bakwe balamucitila mpoonya-mpoonya. Zintu zimwi mwana nzyakonzya kulomba inga taziyi akoomoonga. Zintu zimwi ziyandika kulindila kusikila aciindi ceelede. Alimwi zintu zimwi nzyalomba zilakonzya kumunyonganya mwana naa kunyonganya bantu bamwi bajatikizyidwe. Kuyungizya waawo, kwiile kuzumina cili coonse mwana ncaalomba kulakonzya kunyonganya cilongwe causyi amwana nkaambo cilakonzya kuba mbuli cilongwe casimalelo amuzike, mwana kali simalelo. Mbubwenya buyo, kutegwa tugwasyigwe, Jehova zimwi ziindi ulakonzya kulekela ciindi cili mbocibede kuti ciinde katanaingula mipailo yesu. Ulijisi nguzu zyakucita boobo nkaambo ngo Mulengi wesu musongo, Simalelo uujisi luyando, alimwi Taateesu wakujulu. Kutupa nzyotumulomba mpoonya-mpoonya kulakonzya kupa  kuti cilongwe cesu anguwe cinyongane munzila imwi.—Amweezyanisye a Isaya 29:16; 45:9.

8. Ino Jehova utusyomezya nzi kujatikizya kulezya kwesu?

8 Kaambo kamwi nkakuti Jehova ulikuzyi kabotu kulezya kwesu. (Int. 103:14) Aboobo, talangili kuti katuliyumya munguzu zyesu tobeni pele ulatupa lugwasyo mbwali Taata. Masimpe, zimwi ziindi tulakonzya kulimvwa kuti tatukonzyi kuzumanana kuliyumya. Pele Jehova utusyomezya kuti taakwe nayoolekela babelesi bakwe kupenga kwiinda nguzu zyabo. Inzya, ‘uyoopa nzila yamatijilo.’ (Amubale 1 Bakorinto 10:13.) Aboobo, tulijisi kaambo kalimvwisya keelede kutupa kusyoma kuti Jehova uliluzi ciindi nabona kuti tulakonzya kuliyumya mubuyumuyumu mbotujisi.

9. Ncinzi ncotweelede kucita ciindi mipailo yesu noyataingulwa mpoonya-mpoonya?

9 Ciindi notwatatambula lugwasyo ndotwalomba mumupailo mpoonya-mpoonya, tweelede kuzumanana kulindila kuli yooyo uuzyi ciindi cibotu cakutwiingula. Amuyeeye kuti awalo ulalindila cakukkazika moyo, nkaambo lyoonse uliyandide kutugwasya. “Jehova ulalindila kakkazikide moyo kuti amufwide luzyalo, eelyo ulanyamuka kuti amufwide luse. Nkaambo Jehova ngu Leza uubeteka kabotu. Balikkomene boonse aabo bamulangila.”—Is. 30:18.

“MULOMO WASYUUMBWA”

10-12. (a) Mbuti Munakristo uulwazya munamukwasyi umwi uuciswa bulwazi butasilikiki mbobukonzya kumuyumina bukkale? (b) Mbuti kusyoma Jehova ciindi notuli mubukkale bukatazya mbokukonzya kucijatikizya cilongwe cesu anguwe? Amupe cikozyanyo.

10 Ciindi nomujisi buyumuyumu, mulakonzya kulimvwa mbuli mbwaakalimvwa Paulo—kulimvwa mbuli kuti muli afwaafwi amulomo naa muli ‘mumulomo wasyuumbwa.’ Eezyi nzyeziindi nocikatazya kusyoma Jehova alimwi nzyeziindi kusyoma Jehova nokuyandika kapati. Mucikozyanyo, atwaambe kuti mulwazya munamukwasyi umwi uuciswa bulwazi butasilikiki. Ambweni mwali kupaila kulomba busongo alimwi anguzu. * Nomwamana kucita zyoonse nzyomukonzya mumakani aaya, sena inga tiimwaba aluumuno lwamumizeezo mukuzyiba kuti meso aa Jehova ali alindinywe alimwi akuti uyoomupa lugwasyo luyandika kutegwa muliyumye cakusyomeka?—Int. 32:8.

11 Bukkale bulakonzya kupa kuti zintu muzibone munzila yiindene. Inga kwajanika kuti mizeezo njobaamba bamadokota ilakazyanya. Alimwi banamukwasyi mbomwali kuyeeyela kuti inga bamuumbulizya inga balibonya kuti bapa kuti penzi ndyomujisi liindile. Amuzumanane kulanga kuli Jehova kutegwa amupe nguzu. Amuzumanane kuba aacilongwe anguwe. (Amubale 1 Samuele 30:3, 6.) Lyaakumana penzi ndyomujisi, cilongwe canu anguwe ciyakuyuma kapati.

12 Ba Linda * mbobakalimvwa oobu nokwakainda myaka iili mbwiibede yakulwazya bazyali babo mumyaka yamamanino yakupona. Bakaamba kuti: “Ciindi notwakali mubukkale oobu, mebo, balumi bangu alimwi amusyoonto wangu musankwa, twakali kubula cakucita. Twakali kulimvwa kulekelezyegwa zimwi ziindi. Nokuba boobo, notuyeeya kujatikizya buyumuyumu mbotwakajisi, twabona ncobeni kuti Jehova wakali andiswe. Wakatuyumya nkaambo ncecintu ncotwakali kuyandika, noliba leelyo notwatakazyi ncotwakeelede kucita.”

13. Mbuti kusyoma Jehova mbokwakamugwasya mucizyi umwi kuliyumya mumapenzi aakamucitikila cakutobelana?

13 Kusyoma Jehova cakumaninina alimwi kulakonzya kugwasya ciindi notwajana buyumuyumu bumwi. Ciindi balumi baba Rhonda ibatakali Bakamboni nobakayanda kuti cikwati cimanizyigwe, nceciindi musyoonto waba Rhonda musankwa naakajanwa abulwazi  bubi kapati butegwa lupus. Kwiinde buyo myezi misyoonto bakafwidwa mulamwe. Ciindi buumba bwaba Rhonda nobwakali kuyaabumana, bakatalika bupainiya bwaciindi coonse. Kwiinde buyo ciindi cisyoonto, bakafwidwa banyina. Ncinzi cakabagwasya ba Rhonda kutegwa baliyumye? Bakaamba kuti: “Ndakali kupaila kuli Jehova buzuba abuzuba, nokuba kujatikizya zintu ziniini-niini nzyondakali kuyanda kucita. Eeci cakapa kuti Jehova abe mwini-mwini kulindime. Cakandigwasya kwiiya kusyoma nguwe muciindi cakulisyoma ndemwini naa kusyoma bantu bambi. Alimwi wakandigwasya ncobeni—wakandipa zyoonse nzyondakali kuyandika. Eeci capa kuti ndimvwe mbocibede kubeleka a Jehova.”

Nomuba mumukwasyi, tulakonzya kusikilwa masunko aakonzya kunyonganya cilongwe cesu a Jehova (Amubone mincali 14-16)

14. Ndusyomo nzi ndwayelede kuba aandulo Munakristo uujisi munamukwasyi uugwisyidwe mumbungano?

14 Amubone bukkale abumwi. Atwaambe kuti munamukwasyi umwi wagwisyigwa mumbungano. Mulizyi ncolyaamba Bbaibbele kujatikizya mbwayelede kubonwa muntu uugwisyidwe mumbungano. (1Kor. 5:11; 2Joh. 10) Nokuba boobo, kutobela bubambe bujatikizya muntu uugwisyidwe cilakonzya kuba cintu ciyumu zimwi ziindi, ambweni akulibonya kuti tacikonzyeki buya kubutobela. * Sena inga mwamusyoma Taateesu wakujulu kuti uyakumupa nguzu nzyomuyandika kutegwa mucikonzye kutobela malailile aamu Bbaibbele mumakani aaya? Sena mwacibona kuti eeci ncoolwe cakuti muyumye cilongwe canu a Jehova?

15. Nkaambo nzi Adamu ncaakausotoka mulawo wa Jehova mumuunda wa Edeni?

15 Kujatikizya makani aaya, amuyeeye kwakaindi kasyoonto kujatikizya mwaalumi wakusaanguna, Adamu. Sena ncobeni wakali kuyeeya kuti wakali kukonzya kusotoka mulawo wa Jehova akuzumanana kupona ? Peepe,  nkaambo Magwalo aamba kuti Adamu “kunyina naakeenwa pe.” (1Tim. 2:14) Pele nkaambo nzi ncaakausotoka mulawo? Adamu wakalya mucelo ngwaakamupa Eva ambweni akaambo kakuyandisya kapati mukaintu wakwe. Wakaswiilila jwi lyamukaintu wakwe muciindi cakuswiilila jwi lya Leza wakwe, Jehova.—Matl. 3:6, 17.

16. Nguni ngotweelede kuyandisya kapati kwiinda boonse, alimwi nkaambo nzi?

16 Sena eeci caamba kuti tatweelede kubayanda kapati banamukwasyi? Peepe, tacaambi boobo. Pele tweelede kuyandisya Jehova kwiinda boonse. (Amubale Matayo 22:37, 38.) Eeci cigwasya banamukwasyi, tacikwe makani naa babelekela Jehova lino naa pe. Aboobo, amuzumanane kuyumya luyando lwanu kuli Jehova alimwi acilongwe canu anguwe. Alimwi ikuti naa mulakatazyigwa kapati kujatikizya munamukwasyi uugwisyidwe mumbungano, amumwaambile Jehova mbomulimvwa kwiinda mukupaila kuzwa ansi aamoyo. * (Rom. 12:12; Flp. 4:6, 7) Amubelesye bukkale oobu bukatazya kuyumya cilongwe canu a Jehova. Kucita boobu kuyoomupa kuti mulange kuli Jehova kutegwa amugwasye munzila yiinda kubota.

CIINDI NOTULINDILA

Amutondezye kuti musyoma Jehova kwiinda mukujata bubi mumulimo wakwe (Amubone muncali 17)

17 Nkaambo nzi Paulo ‘ncaakavwunwa kumulomo wasyuumbwa’? Wakaamba kuti: “Kutegwa kwiinda mulindime mulimo wakukambauka uzuzikizyigwe cakumaninina akuti bamasi boonse baumvwe.” (2Tim. 4:17) Mbubwenya mbotujisi bubi mumulimo wakukambauka mbuli ibwakali Paulo, tusyoma Jehova kuti uyoosinizya ncobeni kuti ‘twayungizyilwa’ zintu zyoonse nzyotuyandika. (Mt. 6:33) Mbotuli basikumwaya ba Bwami, ‘twapegwa mulimo wakukambauka,’ alimwi Jehova utubona kuti tuli “basimilimonyina.” (1Tes. 2:4; 1Kor. 3:9) Kwiinda mukuba basungu mumulimo wa Leza, ciyootuubaubila kulindila kugwasyigwa anguwe.

18. Muunzila nzi zimwi motukonzya kuyumya lusyomo lwesu muli Jehova alimwi akuyumya cilongwe cesu anguwe?

18 Aboobo, atubelesye ciindi ecino kuyumya cilongwe cesu a Leza. Ikuti naa kuli bukkale buli boonse ibutupa kulibilika, atububelesye kuyumya cilongwe cesu a Jehova. Inzya, kwiinda mukwiiya Jwi lya Leza, kupaila lyoonse, alimwi akuzumanana kutola lubazu muzintu zyakumuuya, atusyome Jehova kuti ulakonzya kutugwasya alimwi uyoosinizya ncobeni kuti twazwidilila kulwana buyumuyumu mbotujisi lino alimwi abuyumuyumu buli boonse mbotukonzya kuyaanya kumbele.

^ par. 2 “Mulomo wasyuumbwa” nkwaakavwunwa Paulo ulakonzya kuti wakali syuumbwa wini naa akali buyo maambila mbali.

^ par. 10 Zibalo zyakamwaigwa mukusola kugwasya Banakristo ibalwana penzi lyakuciswa-ciswa alimwi abasikulwazya. Amubone mamagazini aa Sinsimuka! aamu Chingisi aaya aatobela: February 8, 1994; February 8, 1997; May 22, 2000; alimwi a January 22, 2001.

^ par. 12 Mazina acincwa.

^ par. 14 Amubone mumagazini eeyi cibalo cakuti “Ikaambo Kugwisyigwa Mumbungano Ncobuli Bubambe Bwaluyando.”

^ par. 16 Zibalo zyakamwaigwa kugwasya banamukwasyi ibajisi munamukwasyi iwakasiya mbunga ya Jehova. Amubone mamagazini aamu Chingisi aa Ngazi Yamulindizi aaya aatobela: September 1, 2006 mapeeji 17-21 alimwi a January 15, 2007 mapeeji 17-20.