“Tandikonzyi kujana muntu wakukwatana limwi mumbungano, alimwi ndilayoowa kuti ndiyoocembala kandili ndelikke.”

“Baalumi bamwi bakunyika mbaasilubomba, mbaasiluyando, alimwi balabikkila maano. Tabakazyi pe nzyondisyoma, alimwi balasangalizya kwiinda bakwesu bamwi.”

Babelesi ba Jehova bamwi abalo bakaamba kale majwi aali boobu kujatikizya kujana muntu wakukwatana limwi. Nokuba boobo, baliluzyi lulayo ndwaakaamba mwaapostolo Paulo kujatikizya kukwata naa kukwatwa “buyo mu Mwami”—lulayo ilweelede kubeendelezya Banakristo boonse. (1Kor. 7:39) Pele ino nkaambo nzi ncobaambila boobu?

IKAAMBO BAMWI NCOBADOONEKA

Aabo ibaamba boobu inga balimvwa kuti mweelwe wabakwesu beelela kukwata awabacizyi beelela kukwatwa taweelene pe. Masimpe, muzisi zinji oobu mbocibede. Amubone buyo zikozyanyo zyobilo: Mucisi ca Korea, akati ka Bakamboni bali 100, ibali 57 mbacizyi alimwi ibali 43 mbakwesu. Cisi ca Colombia cakapa lipooti iitondezya kuti 66 pesenti ya Bakamboni mbacizyi alimwi 34 pesenti mbakwesu.

Muzisi zimwi, kaambo kamwi ikapa kuti kukwata naa kukwatwa cibe cintu cikatazya kapati nkakuti bazyali batasyomi inga bayanda kupegwa lubono lunji kapati, calo icileta buyumuyumu kubakwesu batajisi mali manji. Kuyeeya zisinkilizyo zili boobu, mucizyi inga walimvwa kuti bulangizi bwakujana mukwesu wakukwatana limwi “mu Mwami” mbusyoonto. Aboobo, mucizyi inga walibuzya kuti, “Sena kuli bulangizi bwakuti ndilakonzya kujana wakukwatana limwi weelela akati ka Banakristoma?” *

KUSYOMA JEHOVA KULAYANDIKA

Kuti naa kuli nomwakayeeyede boobu, amusyome kuti Jehova ulibuzyi bukkale bwanu. Inzya ulizyi mbomulimvwa kujatikizya makani aaya.—2Mak. 6:29, 30.

Nokuba boobo, Jehova wakapa kuti malailile aajatikizya kukwata naa kukwatwa buyo mu Mwami alembwe mu Jwi lyakwe. Ino nkaambo nzi? Nkaambo ulizizyi zintu zikonzya kubagwasya bantu bakwe. Tayandi buyo kuti babelesi bakwe bakwabililwe kumapenzi aaboola akaambo kakucita zintu cabufwubafwuba, pele alimwi uyanda kuti kabakkomene. Mumazuba aa Nehemiya, ciindi bama Juda nobakali kukwatana abamuzwakule ibatakali kukomba Jehova, Nehemiya wakaamba kujatikizya cikozyanyo cibi ca Solomoni. Nokuba kuti Solomoni “wakali kuyandwa kuli Leza wakwe, . . . bamakaintu beenzu bakamupa kubisya.” (Neh. 13:23-26) Aboobo, kutegwa babelesi bakwe bagwasyigwe, Leza ulailila kuti katukwatana buyo abakombi bakasimpe. (Int. 19:7-10; Is. 48:17, 18) Banakristo bakasimpe balalumba akaambo kakubabikkila maano caluyando alimwi basyoma busolozi bwakwe. Aboobo, kwiinda mukulibombya kulinguwe mbwali Muleli, balazumina kuti ngo Mweendelezi Wakoonse-koonse.—Tus. 1:5.

Mubwini muliyandide kweeleba ‘kunjila mujoko lyomwe’ amuntu uukonzya kupa kuti mumutantamuke Leza. (2Kor. 6:14) Banakristo banji mazuba aano baatobela malailile aa Leza aaya aagwasya lyoonse alimwi bajana kuti bacita cabusongo. Pele bamwi basala kucita ziimpene.

MALAILILE AAYA ACIBELEKA ASUNU

Ba Maggy, * mucizyi waku Australia, bakaamba kujatikizya zyakacitika ciindi nobakatalika kweebana amuntu uutasyomi, bakati: “Tiindakali kujanika kumiswaangano minji kutegwa ndibe buyo anguwe. Ndakayaansi kumuuya.” Ba Ratana baku India bakatalika kuyandana amuntu ngobakali kwiiya limwi kucikolo iwakatalika kwiiya Bbaibbele. Nokuba boobo, mukuya kwaciindi wakalitondezya kuti makanze aakwe aakali aakuti basyabane amucizyi. Mukuya kwaciindi, wakakasiya kasimpe akutalika kukomba kucikombelo cimbi kutegwa akwatwe.

Cikozyanyo cimwi ncikozyanyo caba Ndenguè baku Cameroon. Bakajisi myaka yakuzyalwa iili 19 ciindi nobakakwatwa. Musankwa iwakali kuyanda kubakwata wakabasyomezya kuti bayakwaanguluka kukomba kucikombelo cabo. Pele nokwakainda nsondo zyobilo kuzwa nobwakainda bwiinga bwabo, mulumi wabo wakabakasya kujanika kumiswaangano ya Bunakristo. Ba Ndenguè bakaamba kuti: “Ndakalendelelwa alimwi ndakalila. Ndakazyiba kuti lino tiindakajisi lwaanguluko lwakucita ncondiyanda mubuumi bwangu. Lyoonse ndakali kulipa mulandu.”

Bwini mbwakuti tabali bantu boonse batasyomi ibakonzya kuba basilunya alimwi batabikkili maano. Nokuba kuti inga tiimwapenga munzila eeyi akaambo kakukwatana amuntu uutasyomi, ino cilongwe canu a Uso wakujulu inga cajatikizyigwa buti? Ino inga mwalimvwa buti kuzyiba kuti tiimwakalutobela lulayo Leza ndwaakamupa kutegwa mugwasyigwe andulo? Alimwi kwiinda zyoonse, ino inga walimvwa buti kujatikizya kusala kwanu?—Tus. 1:33.

Bakwesu abacizyi nyika yoonse mbwiizulwa balazumina kuti kukwata naa kukwatwa “buyo mu Mwami” mulawo mubotu kapati. Aabo batakwete naa batakwekwe balikanzide kukkomanisya Leza kwiinda mukuyanda kuti bakwatane buyo amuntu weelela akati kabakombi ba Leza. Ba Michiko baku Japan, mucizyi uutakwetwe, babbululu bakwe bakasoleka kumusungilizya kuti akwatwe kumuntu uutasyomi. Kuyungizya aabuyumuyumu bwakukaka kuyungwa, wakabona beenzyinyina kabakwatwa mumbungano. Wakaamba kuti: “Lyoonse ndakali kuliyeezya kuti mbwaanga Jehova ngu “Leza uukkomene,” lukkomano lwesu taluyeeme aakukwatwa naa pe. Alimwi ndisyoma kuti ulatupa nzyotulombozya mumoyo. Aboobo, nokuba kuti tatukonzyi kujana wakutwatana limwi nokuba kuti tulayanda kukwatwa, cilayandika kapati kuzumanana katutakwetwe kwaciindi cino.” (1Tim. 1:11) Mukuya kwaciindi, ba Michiko bakakwatwa kumukwesu uuli kabotu, alimwi balikkomene kuti bakalindila.

Bakwesu bamwi abalo balindila kutegwa bajane wakukwatana limwi uuli kabotu. Ba Bill ku Australia mbamwi babaabo. Bakaamba kuti zimwi ziindi bakali kulimvwa kuti bamakaintu bakunyika bali buyo kabotu. Nokuba boobo bakali kweeleba kumvwana kapati ambabo. Ino nkaambo nzi? Tiibakali kuyanda kubweza ntaamu yakusaanguna iyakali kuyoobasololela ‘kukunjila mujoko lyomwe’ abantu batasyomi. Mumyaka yainda, bakajisi luyandisisyo mubacizyi bamwi, pele tiibakali kweendelana. Ba Bill bakalindila myaka iili 30 kabatanajana mucizyi ngobakali kweendelana. Ba Bill bakati: “Tandilipi mulandu pe kuti ndakalindila. Ndilimvwa kuti ndililelekedwe nkaambo  tulaunka mubukambausi antoomwe, tulaiya antoomwe, alimwi tulakomba antoomwe. Ndilakkomana kuswaangana akuyanzana abalongwe babakaintu bangu nkaambo boonse mbakombi ba Jehova. Tuyumya cikwati cesu kwiinda mukubelesya njiisyo zyamu Bbaibbele.”

CIINDI NOMULINDILA JEHOVA

Ncinzi ncomukonzya kucita ciindi nomusiya makani aaya mumaanza aa Jehova? Cimwi ncomukonzya kucita nkuyeeya kaambo ncomutakwete naa ncomutakwetwe. Kuti naa muyeeya kuti kaambo kapati kayeeme aakumvwida malailile aamu Bbaibbele aakuti mweelede kukwata naa kukwatwa “buyo mu Mwami,” nkokuti tulamulumbaizya kapati akaambo kakulemeka mulawo ooyu wa Leza. Amusyome kuti Jehova ulikkomene akaambo kamakanze aanu aakumvwida Jwi lyakwe. (1Sam. 15:22; Tus. 27:11) Mulakonzya kumwaambila Leza “zyoonse zili mumyoyo yanu” kwiinda mumupailo. (Int. 62:8) Mipailo yanu ilakonzya kugwasya kapati ciindi nomumukombelezya kuzwa ansi aamoyo alimwi anomucita oobo cakwiinduluka-induluka. Cilongwe canu a Jehova ciyooyumizyigwa buzuba abuzuba ciindi nomuliyumya nokuba kuti mulwana buyumuyumu bumwi mbomujana. Amusyome kuti Mupatikampatila ulabakkomanina babelesi bakwe boonse basyomeka alimwi akuti mulayandika kapati kulinguwe. Ulabikkila maano kuzintu nzyomuyandika alimwi azintu nzyomulombozya. Tasyomezyi muntu uuli woonse kuti uyoomupa muntu wakukwatana limwi. Nokuba boobo, ikuti ncobeni kamuyanda muntu wakukwatana limwi, Leza ulizyi nzila mbotu mbwakonzya kuzuzikizya zintu zibotu nzyomulombozya.—Int. 145:16; Mt. 6:32.

Ziindi zimwi inga mwalimvwa mbuli mbwaakalimvwa sintembauzyo Davida, iwakaamba kuti: “Kofwambaana kondivwiila, O Jehova; Nguzu zyangu zyamana. Utandisisi busyu bwako.” (Int. 143:5-7, 10) Muziindi zili boobu, amumupe ciindi Uso wakujulu kutegwa amutondezye makanze aakwe kujatikizya ndinywe. Mulakonzya kucita boobu kwiinda mukujana ciindi cakubala Jwi lya Leza alimwi akuzinzibala kuyeeya nzyomubala. Muyoozyiba ncoyaamba milawo yakwe alimwi muyoobona nzyaakabacitila bantu bakwe bamusyule. Kwiinda mukumuswiilila, lusyomo lwanu luyooyuma, muyoobona kuti kuswiilila nguwe cilagwasya.

Batakwete naa batakwetwe balayandika kapati mumbungano, kanji-kanji bagwasyilizya mikwasyi alimwi abakubusi

Ncinzi cimbi cikonzya kumupa kukkomana akucita zintu zigwasya mumyaka njomukkala kamutanajana wakukwatana limwi? Nomutanajana wakukwatana limwi, mulakonzya kubelesya ciindi eeci kuba muntu mupampu kumuuya, kuba mwaabi, kubeleka canguzu, kuba muntu mubotu, kutondezya kulyaaba kwabunaleza, alimwi akuba ampuwo mbotu—zintu iziyandika kapati kutegwa mukkomane mumukwasyi. (Matl. 24:16-21; Rut. 1:16, 17; 2:6, 7, 11; Tus. 31:10-27) Amusaangune kuyandaula Bwami kwiinda mukutola lubazu cakumaninina mumulimo wakukambauka amumilimo imwi ya Bunakristo; kucita boobo kuyoomukwabilila. Kujatikizya myaka nobakali kuyanda kukwata, ba Bill, mbotwaambide kumatalikilo, bakaamba kuti: “Myaka yakafwambaana kweenda! Ndakabelesya ciindi eeci mumulimo wa Jehova kandili mupainiya.”

Inzya, kukwata naa kukwatwa “buyo mu Mwami” kucibeleka asunu. Kumvwida malailile aaya kulakonzya kumugwasya kulemeka Jehova alimwi mulakonzya kukkutila kukabe kutamani. Bbaibbele lyaamba kuti: “Ulikkomene muntu uuyoowa Jehova, ooyo wiikkomanina kapati milawo yakwe. Lubono abuvwubi zili muŋanda yakwe, alimwi bululami bwakwe bulazumanana lyoonse mane kukabe kutamani.” (Int. 112:1, 3) Aboobo, amukanze kukakatila kumulawo wa Leza wakukwata naa kukwatwa “buyo mu Mwami.”

^ par. 7 Mucibalo eeci, tulanga-langa makani aaya mbuli bacizyi mbobaalanga, nokuba boobo njiisyo nzimunya eezyi zilabeleka akubakwesu.

^ par. 13 Mazina amwi acincwa.