Ncinzi ncotukonzya kucita kugwasya bakwesu abacizyi baciswa akaambo kamapefyuumu?

Bantu baciswa akaambo kamapefyuumu balijisi buyumuyumu bukatazya kapati. Masimpe, taakwe mbobakonzya kucita kutegwa bataciswi nkaambo buzuba abuzuba balayaana abantu mbobatazyi ibabelesya mapefyuumu. Nokuba boobo, bamwi balabuzya naa inga cakonzyeka kulomba bakwesu abacizyi kulilesya kubelesya mapefyuumu kwaambisya lyamiswaangano yambungano, miswaangano yabbazu, alimwi alyamiswaangano yacooko.

Masimpe, taakwe Munakristo uunga wacita caali kutegwa bantu bamwi cibayumine kujanika kumiswaangano ya Bunakristo. Toonse tulayanda kukulwaizyigwa amiswaangano yesu. (Heb. 10:24, 25) Aboobo, aabo ibaciswa akaambo kamapefyuumu cakuti tabacikonzyi kujanika kumiswaangano, balakonzya kwaabandika makani aaya abaalu. Nokuba kuti tacili camu Magwalo alimwi akuti taceeleli kubikka milawo iijatikizya kubelesya mapefyuumu kubantu bajanika kumiswaangano, baalu balakonzya kwaambila mbungano kutegwa izyibe buyumuyumu mbobajisi bamwi. Kweelana abukkale mbobubede, baalu balakonzya kusala makani aajatikizya kaambo aaka aakamwaigwa musyule oomu akwaabandika ciindi ca Muswaangano Wamulimo mucibeela caziyandika mumbungano, naa balakonzya kusala kwaambilizya cabupampu kujatikizya makani aaya. * Nokuba boobo, baalu tabakonzyi kwaambilizya lyoonse kujatikizya makani aaya. Kumiswaangano yesu kulaba bantu bapya baboola cindi aciindi balo ibatazyi kujatikizya penzi eeli, aboobo tuyanda kuti bantu bali boobo kabalimvwa kuti batambulwa. Taakwe muntu weelede kulimvwa bubi akaambo kakubelesya buyo asyoonto mafwuta aanunkilila kapati.

Ikuti penzi eeli kaliliko alimwi kweelana aziyandika kubusena ooko, cilakonzyeka kuti kabunga kabaalu kabikka bubambe bwakuti aabo ibaciswa akaambo kamapefyuumu kabakkala balikke mubusena bumwi bwa Ŋanda ya Bwami. Mucikozyanyo, balakonzya kukkala muluumu ya Ŋanda ya Bwami yakucitila miswaangano naa muluumu yakubikkila mabbuku kutegwa abalo bagwasyigwe amiswaangano. Ikuti naa inga tiicakonzyeka kucita boobo alimwi nokuba kuti cakonzyeka kumane bamwi baciciswa, mbungano ilakonzya kulekkooda miswaangano naa kubikka bubambe bwakuti kabaswiilila afooni kabali kuŋanda yabo, mbubwenya mbuli bamwi ibatabukili bulo.

Myaka misyoonto yainda, Mulimo Wesu wa Bwami wali kukulwaizya bakwesu abacizyi kutondezya kuti balababikkila maano bamwi mukaambo aaka ciindi nobali kumiswaangano yacooko. Basimuswaangano bali kulombwa kucesya kubelesya mapefyuuumu muziindi eezyi. Kwaambisya ciindi camiswaangano yacooko, nkaambo tacikonzyeki kujana busena butakonzyi kujanika bantu babelesya mapefyuumu. Nokuba boobo, kaambo aaka tamweelede kukabweza kuti koonse mboceelede kuba oobo lyamiswaangano yambungano, alimwi taakwe weelede kwaamba boobo.

Tupona mubweende bwazintu oobu, toonse tulapenga akaambo kakuti twakazyalwa katutalondokede. Eelo kaka tulabalumba aabo ibasoleka kucita cili coonse kutegwa tutaciswi kapati! Kuli baabo ibabelesya mapefyuumu, inga kwaba kulyaaba kucileka kubelesya mapefyuumu kutegwa bakwesu abacizyi baciswa cibaubile kujanika kumiswaangano ya Bunakristo. Nokuba boobo, luyando ndolukonzya kutukulwaizya kucita boobo.

 Sena mabbuku aakunyika alatondezya kuti Ponto Pilato wakaliko?

Ibbwe eeli lyakalembedwe izina lya Pilato mu Chilatini

Basikubala Bbaibbele balimuzyi Ponto Pilato akaambo kakuti wakajatikizyigwa mukubeteka akujaigwa kwa Jesu. (Mt. 27:1, 2, 24-26) Nokuba boobo, izina lyakwe lilajanika mumabbuku aambi aakaindi. Kweelana abbuku litegwa The Anchor Bible Dictionary, kuli mapepa aamabbuku aakunyika manji “aamba kujatikizya nguwe kwiinda beendelezi bana Roma boonse ibakeendelezya Judaya.”

Izina lya Pilato lilajanika kanji-kanji mumalembe aasikulemba zyakaindi mu Juda uutegwa Josephus, walo iwakalemba zintu zyakacitika zyotatwe zitondezya buyumuyumu mbwaakajana Pilato ciindi naakali kweendelezya Judaya. Mpoonya cintu cimwi cane cakalembwa asikulemba makani aakaindi mu Juda uutegwa Philo. Mulembi muna Roma uutegwa Tacitus, walo iwakalemba makani aakaindi aajatikizya beendelezi bana Roma, wakaamba kuti Ponto Pilato wakalailila kuti Jesu ajaigwe ciindi cabulelo bwa Tiberiyo.

Mumwaka wa 1961, basikuvwuntauzya makani aakaindi ibakali kubelekela abusena mpolyakabede bbuwa lyabana Roma lyakucitila misobano mu Kaisareya, Israel, bakajana ibbwe aakalembedwe izina lya Pilato mu Chilatini. Bulembo (butondezyedwe aawa) bwakali mutubeela-beela pele buyeeyelwa kuti bwakalembedwe kuti: “Kubaleza balemekwa (ŋanda eeyi iitegwa) Tiberieum, Ponto Pilato, Mweendelezi wa Judaya, wayaaba.” Ŋanda iyakali kwaambwa aawa kuboneka kuti yakali tempele mukulemeka Tiberiyo, Mweendelezi muna Roma.

Sena sikumwaya mucizyi weelede kusama citambala nasololela ciiyo ciindi nabeleka asikumwaya mukwesu?

Cibalo ca “Mibuzyo Yabasikubala” icakamwaigwa mu Ngazi Yamulindizi yamu Chingisi yamu July 15, 2002, cakaamba kuti mucizyi weelede kusama citambala nasololela ciiyo ca Bbaibbele ciindi nabeleka asikumwaya mukwesu uubbapatizyidwe naa uutabbapatizyidwe. Kulanga-langa makani aaya alimwi kutondezya kuti kuyandika kucinca asyoonto kujatikizya malailile aakapegwa mu Ngazi Yamulindizi.

Ikuti sikumwaya mukwesu iwabeleka amucizyi kabbapatizyidwe, mucizyi weelede kusama citambala ciindi nasololela ciiyo ca Bbaibbele. Kucita boobo kutondezya kuti ulabulemeka bubambe bwa Jehova bwabusilutwe mumbungano ya Bunakristo nkaambo kakuti wabeleka mulimo weelede kubelekwa amukwesu. (1Kor. 11:5, 6, 10) Nzila imwi, mucizyi ulakonzya kulomba mukwesu kuti asololele ciiyo ikuti naa mukwesu keelela alimwi kakonzya kucita boobo.

Kulubazu lumwi, ikuti mucizyi wabeleka asikumwaya mukwesu uutabbapatizyidwe uutali mulumi wakwe, inga tayandiki buya kusama citambala kweelana a Magwalo ciindi nasololela ciiyo ca Bbaibbele. Nokuba boobo, bacizyi bamwi manjezyeezya aabo alakonzya kubaambila kusama citambala nomuba mubukkale buli boobu.

^ par. 4 Kujatikizya makani aaya, inga mwabona cibalo cakuti “Helping Those With MCS,” mu Sinsimuka! yamu Chingisi yamu August 8, 2000, mapeeji 8-10.