Sena majwi aa Davida aajanika mu Intembauzyo 37:25 alimwi amajwi aa Jesu aajanika mulugwalo lwa Matayo 6:33 apandulula kuti Jehova takonzyi kulekela Munakristo kubula cakulya cikkwene?

Davida wakalemba kuti taakwe ‘naakabona uululeme uusiidwe, nanka lunyungu lwakwe lukumbila insima.’ Kwiinda mumajwi aayo wakalemba zintu zijatikizya babelesi ba Leza banji kweelana anzyaakalibonena. Wakalizyi kabotu-kabotu kuti Leza ulabalanganya babelesi bakwe lyoonse. (Int. 37:25) Nokuba boobo, majwi aa Davida taapandululi kuti kunyina mukombi iwakabulide zintu ziyandika naa kuti kunyina uuyakubula.

Kuli ziindi Davida lwakwe mwini naakalijana mubukkale bukatazya kapati. Ciindi cimwi cakali ciindi naakali kutija Saulo. Davida tanaakajisi zyakulya zinji, alimwi wakalomba zinkwa zyakuti alye walo alimwi abaalumi mbaakali limwi. (1 Sam. 21:1-6) Aboobo, mubukkale oobo, Davida wakali ‘kukumbila insima.’ Nokuba boobo, mubukkale oobo bukatazya, wakalizyi kuti Jehova taakwe naakamulekelezya pe. Pele masimpe ngakuti, taakwe mpotubala alo Davida mpaakali kulombelela kutegwa ajane cakulya ncaakali kuyandika.

Mulugwalo lwa Matayo 6:33, tujana cisyomezyo ca Jesu cakuti Leza uyakubapa nzyobayandika babelesi bakwe basyomeka ibasaanguna kubikka ziyandika zya Bwami mubusena bwakusaanguna mubuumi bwabo. Jesu wakaamba kuti: “Aboobo amuzumanane kusaanguna kuyandaula Bwami abululami bwakwe, eelyo zyintu zimbi zyoonse eezyi [kubikkilizya acakulya, zyakunywa, alimwi azyakusama] ziyooyungizyigwa kulindinywe.” Nokuba boobo, Jesu alimwi wakatondezya kuti akaambo kakupenzyegwa, banyina balakonzya kubula cakulya. (Mt. 25:35, 37, 40) Eeci cakamucitikila mwaapostolo Paulo. Ziindi zimwi wakali kufwa nzala anyota.—2 Ko. 11:27.

Jehova utwaambila kuti tuyakupenzyegwa munzila zisiyene-siyene. Ulakonzya kulekela kuti tubule cakulya ciindi notutondezya kuti Daibolosi mubeji. (Job. 2:3-5) Mucikozyanyo, Banakristoma bamwi, mbuli baabo ibakali muzilabba zyakupenzyezya ciindi cabulelo bwa Nazi, bakalijana mubukkale bukatazya kapati akaambo kakupenzyegwa. Kubaima zyakulya zyeelede Bakamboni yakali nenzila imwi mbyaabi iyakali kubelesyegwa kapati kutegwa banyonganye lusyomo lwabo. Bakamboni basyomeka bakazumanana kumvwida Jehova; kunyina naakabalekelezya pe. Wakalekela kuti basunkwe munzila eeyi mbubwenya mbwalekela kuti Banakristo boonse basunkwe munzila zisiyene-siyene. Nokuba boobo, tacidoonekwi pe kuti Jehova ulabagwasya aabo ibapenga akaambo kazina lyakwe. (1 Ko. 10:13) Tweelede kuyeeya majwi aajanika mulugwalo lwa Bafilipi 1:29, aakuti: “Nywebo mwapegwa coolwe akaambo ka Kilisito, ikutali buyo kuti mumusyome pe, pele alimwi akuti mupenge akaambo kanguwe.”

Jehova usyomezya kuti uyakubagwasya babelesi bakwe. Mucikozyanyo lugwalo lwa Isaya 54:17 lwaamba kuti: “Taakwe cilwisyo niciba comwe cibumbwa kukulwisya nduwe cikonzya kujana coolwe.” Cisyomezyo eeci alimwi azisyomezyo zimbi zisinizya kuti bantu ba Leza mbuli mbunga banakukwabilidwe. Pele Munakristo umwi aumwi kumugama, ulakonzya kusunkwa, ambweni akujaigwa buya.