BA Katherine bakakomenena mucisi ca United States alimwi bakabbapatizyigwa akuba Kamboni wa Jehova nobakajisi myaka yakuzyalwa iili 16. Bakali kuubikkila kapati maano mulimo wakukambauka pele bantu bamubusena mobakali kukambaukila tiibakali kubikkila maano kumulumbe wa Bwami. Bakaamba kuti: “Ndilabala zyakuluula zijatikizya bantu bakapaila kuli Leza kumulomba kuti abatumine muntu uukonzya kubagwasyilizya kuzyiba Leza. Ndakali kulombozya kujana muntu uuli boobo, pele tiicakacitika pe.”

Nokwakainda myaka iili mbwiibede kabakambauka mubusena oobo mbubwenya, ba Katherine bakatalika kuyeeya kuunka kubusena bantu nkobakali kukonzya kuutambula mulumbe wa Bwami. Bakali kulibilika ikuti naa inga bacikonzya kucita oobo. Taakwe nobakazwide kale aŋanda kwaciindi cilamfwu mubuumi bwabo pele buyo kwansondo zyobilo, alimwi noliba leelyo, bakali kukuyeeya kapati kuŋanda buzuba abuzuba. Nkakaambo kaako luyandisisyo lwabo lwakuyanda kujana lukkomano luboola mukugwasya baabo ibayandaula Jehova lwakazyikumana. Nobakalanga-langa akubona busena nkobakali kukonzya kuunka, bakalembela mutabi waku Guam mpoonya bakatambula makani aayandika kujatikizya busena oobo. Mu July 2007, kabajisi myaka yakuzyalwa iili 26, ba Katherine bakalongela ku Saipan, nsumbu iili mu Pacific Ocean, kwalo kulampa makkilomita aali 10,000 kuzwa nkobazwa. Ino zintu zyakabeendela buti?

BWIINGUZI KUMIPAILO YOBILO

Mbobakasikila buyo kumbungano eeyo mpya, tiilyakalampa pe, ba Katherine bakaswaanganya ba Doris, ibakaintu ibakajisi myaka yakuzyalwa iili kuma 40, balo ibakazumina kwiiya Bbaibbele. Nobakamana kwiiya zibalo zyotatwe mubbuku lya Bbaibbele Ncoliyiisya, ba Katherine bakatalika kukopana mumoyo. Bakaamba kuti: “Ba Doris bakali basikwiiya bali kabotu, tiindakali kuyanda kubanyonganya pe. Taakwe mubuumi bwangu nondakasolololede kale ciiyo ca Bbaibbele cisitikide, ba Doris bakali kuyandika mucizyi uucibwene kuyiisya, ambweni wamusela wabo.” Ba Katherine bakapaila kuli Jehova kuti abagwasye kujana mucizyi weelela walo ngobakali kukonzya kupa ciiyo ca Bbaibbele eeci. Mpoonya bakasala kubazyibya ba Doris kucinca kujatikizya muntu wakali kunakubayiisya.

Ba Katherine bakaamba kuti: “Kanditanaamba ncondakali kuyanda kwaamba, ba Doris bakandaambila kuti kuli penzi ndyobayanda kundaambila. Nondakamana kumvwa penzi lyabo, ndakabaambila Jehova mbwaakandigwasya kulwana penzi lyamusyobo ooyo mubuumi bwangu. Mpoonya bakandilumba.” Kumane, ba Doris bakaambila ba Katherine kuti: “Jehova ubelesya  ndinywe kundigwasya. Buzuba bwakusaanguna nomwakasika aano, ndakali kubala Bbaibbele kwamawoola manji. Ndakali kulila, kulomba Leza kuti anditumine muntu uukonzya kundigwasya kumvwisya Bbaibbele. Mpoonya mwakakonkomona amulyango. Jehova wakawiingula mupailo wangu!” Yakabeenda misozi ba Katherine ciindi nobakali kwaamba makani aaya. Bakaamba kuti: “Majwi aaba Doris bwakali bwiinguzi kumupailo wangu. Jehova wakanditondezya kuti ndakeelede kuzumanana kwiiya ambabo.”

Ba Doris bakabbapatizyigwa mu 2010 alimwi lino balasololela ziiyo zya Bbaibbele zili mbozibede. Ba Katherine bakaamba kuti: “Eelo kaka ndilikkomene kujana kuti luyandisisyo lwangu lwakugwasya muntu umwi kuba mubelesi wa Jehova lwakazuzikizyigwa!” Mazuba aano, ba Katherine mbapainiya baalubazu munsumbu yamu Pacific ya Kosrae.

KULWANA BUYUMUYUMU BOTATWE

Bakwesu abacizyi bainda ku 100 (ibajisi myaka yakuzyalwa iili akati ka 19 a 79) balabeleka kubusena bubulide ku Micronesia. Mbobalimvwa basimilimo aaba basungu kulitondezyedwe amajwi aakaamba mucizyi wazina lyakuti Erica, walo iwakalongela ku Guam mu 2006 naakajisi myaka yakuzyalwa iili 19. Wakaamba kuti: “Cilakkomanisya kucita bupainiya mucilawo bantu mobajisi nyota yakasimpe. Ndilalumba akaambo kakuti Jehova wakandigwasya kutalika mulimo ooyu. Nenzila yiinda kubota mubuumi!” Mazuba aano, ba Erica balikkomene kubeleka kabali bapainiya baalubazu ku Ebeye busena ibuli mu Marshall Islands. Masimpe ngakuti, kuli buyumuyumu bujanika kubelekela kubusena bwakunze aacisi. Atulange-lange buyumuyumu botatwe akubona mbobabulwana aabo ibakalongela ku Micronesia.

Ba Erica

Bukkale. Nobakasika kunsumbu ya Palau mu 2007, ba Simon, balo ibakajisi myaka yakuzyalwa iili 22, bakajana kuti bakali kukonzya buyo kuvwolwa mali masyoonto kapati kweezyanisya angobakali kuvwola kucisi cabo ku England. Bakaamba kuti: “Ndakeelede kwiiya kutaula kufwumbwa cintu ncondakali kuyanda. Lino, ndilasala kabotu cakulya ncondiyanda kuula, alimwi ndilalanga-langa muzintoolo ziindene-indene kutegwa ndijane zintu zijisi muulo uuli kabotu. Ikuti cintu cimwi canyonyooka, ndilasoleka kulangaula cibeela cakabeleka kale akulangaula muntu umwi uukonzya kundigwasya kucibamba.” Ino kuyanda kuba abuumi buuba-uba kwakabajatikizya buti? Ba Simon bakaamba kuti: “Candigwasya kuzyiba cini ciyandika mubuumi alimwi ambondikonzya kupona azintu zisyoonto buyo. Jehova wali kundigwasya ziindi zinji. Mumyaka iili ciloba njondabeleka kuno, lyoonse ndalijisi cakulya alimwi aakoona.” Masimpe, Jehova ulabagwasya aabo ibapona buumi buuba-uba akaambo kakuti bayanda kubikka Bwami mubusena bwakusaanguna.—Mt. 6:32, 33.

Kuyeeya kuŋanda. Ba Erica bakaamba kuti: “Tulamvwana kapati mumukwasyi, aboobo ndakali kulibilika kuti kuyeeya kuŋanda kuyakuunyonganya mulimo wangu wakukambauka.” Ino bakacita nzi kutegwa balibambile? Bakaamba kuti: “Kanditanaunka, ndakabala zibalo zyamu Ngazi Yamulindizi izyaamba kujatikizya kuyeeya kuŋanda. Eeci cakapa kuti ndilibambile kulwana buyumuyumu oobu. Mucibalo cimwi, muzyali mukaintu umwi wakaumbulizya mwanaakwe musimbi kwiinda  mukumwaambila Jehova mbwalanganya, wakati ‘Jehova ulakonzya kukulanganya kwiinda mbondikonzya kukulanganya.’ Kukulwaizya ooku kwakandiyumya-yumya.” Ba Hannah abalumi babo ba Patrick, babelekela ku Majuro mu Marshall Islands. Ba Hannah balabulwana buyumuyumu bwakuyeeya kuŋanda kwiinda mukubikkila maano bakwesu abacizyi bamumbungano mobazulilwa. Bakaamba kuti: “Ndilamulumba Jehova lyoonse akaambo kabunyina bwanyika yoonse nkaambo abalo mukwasyi wangu. Kakunyina kugwasyigwa ambabo munzila yaluyando, tiindali kunga ndacikonzya kubelekela kubusena kubulide basikumwaya.”

Ba Simon

Kuzyibila akujana balongwe. Ba Simon bakaamba kuti: “Ciindi nowasika kucisi cimbi, zintu zyoonse inga zyeenzu. Zimwi ziindi inga ndilombozya kwaamba masesya alimwi akuti bamwi kabandimvwisya.” Ba Erica bakaamba kuti: “Kumatalikilo, tiindakajisi balongwe, pele eeci cakandigwasya kuzyiba ncondakaunkila kubusena oobo. Ndakaunka kutali kuti ndijane zintu zikonzya kundigwasya pele kubelekela Jehova.” Bakayungizya kwaamba kuti: “Mukuya kwaciindi, ndakaba abalongwe babotu, balo mbondiyandisya kapati.” Ba Simon bakasoleka canguzu kwiiya mwaambo waci Palauan, calo cakabagwasya ‘kujalula moyo wabo’ kubakwesu abacizyi bamumbungano eeyo. (2 Ko. 6:13) Kusoleka kwabo kwiiya mwaambo ooyu kwakapa kuti bayandwe abakwesu. Masimpe, ikuti basikumwaya aaba beenzu babeleka antoomwe abakwesu bamumbungano mbobajana, boonse balagwasyigwa kwiinda mukuba aabalongwe bakkomanisya mumbungano. Mbulumbu nzi bumbi mbobatambula aabo ibalyaaba camoyo woonse kuyakubelekela kubusena kubulide basikumwaya?

‘KUTEBULA ZINJI’

Mwaapostolo Paulo wakaamba kuti: “Ooyo uusyanga aapati uyootebula zinji.” (2 Ko. 9:6) Njiisyo iili mumajwi aaya mubwini yaamba baabo ibakomezya mulimo wabo wakukambauka. Ino micelo nzi ‘minji njobatebula’ ku Micronesia?

Ba Patrick aba Hannah

Ku Micronesia, kucili zyoolwe zinji zyakutalisya ziiyo zya Bbaibbele alimwi akubona bantu aabo ibaiya alimwi akukatobela kasimpe kajanika mu Jwi lya Leza kabayaambele kumuuya. Ba Patrick aba Hannah bakabeleka ku Angaur, kansumbu kaniini ikajisi bantu basika ku 320. Nobakakambauka kwamyezi yobilo, bakayaanya muzyali mukaintu uuli alikke. Mpoonya-mpoonya wakazumina kwiiya Bbaibbele, wakaiya kasimpe, akucinca kapati mubuumi bwakwe. Ba Hannah bakaamba kuti: “Twamana kwiiya, twakali kuceba akulangana ciindi notwatanta macinga eesu kuzwa aŋanda akwaamba kuti: ‘Twalumba Jehova.’” Bakayungizya kwaamba kuti: “Ndilizyi kuti Jehova wakali kukonzya kumukwela mukaintu ooyu munzila imwi, pele akaambo kakubelekela kubusena kubulide basikumwaya, twakacikonzya kumujana akumugwasya mukaintu ooyu uuli mbuli mbelele kumuzyiba Jehova. Cintu eeci cakacitika mbulumbu bumwi bwiinda kubota mubuumi bwesu. Mbubwenya mbobakaamba ba Erica, “ikuti wagwasya muntu umwi kuzyiba Jehova, uyakukkomana citaambiki!”

SENA MULAKONZYA KUTOLA LUBAZU?

Muzisi zinji, kuciyandika basikumwaya ba Bwami banji. Sena inga mwaba akati kabaabo ibaunka kuyakubelekela kubusena kubulide basikumwaya? Amumulombe Jehova mumupailo kutegwa ayumye luyandisisyo lwanu lwakuyungizya mulimo wanu wakukambauka. Amwaabandike makani aaya abaalu bamumbungano yanu, mulangizi wabbazu, naa aabo ibakabelekela kale kubusena kubulide basikumwaya. Mwatalika kubikka bubambe bwakuunka, amubalembele bakumutabi ibamucisi nkomuyanda kuunka kuyakubeleka akubalomba makani aayandika kujatikizya busena oobo. * Ambweni andinywe inga mwabasangana bakwesu abacizyi banji kapati—ibacili bakubusi alimwi abapati, bakwete naa bakwetwe, batakwete naa batakwetwe—ibalyaaba amoyo woonse akulabila lukkomano lujanika ‘mukutebula zinji.’

^ par. 17 Amubone cibalo cakuti “Sena Inga ‘Mwazabukila ku Makedoniya’?” mu Mulimo Wesu wa Bwami wa August 2011.