‘Mulawo wabili uuli mbuli yooyu: “Weelede kuyanda simukobonyoko mbubonya mbuli mboliyanda omwini.”’—MT. 22:39.

1, 2. (a) Ino Jesu wakaamba kuti mulawo mupati wabili mu Mulawo wakali mulawo nzi? (b) Mibuzyo nzi njotutiilange-lange lino?

KUTEGWA asunke Jesu, mu Farisi umwi wakamubuzya kuti: “Mwiiyi, ino nguuli mulawo mupati mu Mulawo?” Mbubwenya mbotwakabona mucibalo cainda, Jesu wakavwiila kuti “mulawo mupati alimwi wakusaanguna” ngwakuti: “Weelede kuyanda Jehova Leza wako amoyo wako woonse abuumi bwako boonse amizeezo yako yoonse.” Jesu wakayungizya kuti: “Wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’”—Mt. 22:34-39.

2 Jesu wakaamba kuti tweelede kuyanda basimukoboma mbuli mbotuliyanda tobeni. Aboobo, inga twacita kabotu kulibuzya kuti: Ino mubwini simukoboma nguni? Mbuti mbotukonzya kubatondezya luyando basimukoboma?

INO MUBWINI SIMUKOBOMA NGUNI?

3, 4. (a) Ncikozyanyo nzi ncaakapa Jesu mukwiingula mubuzyo wakuti: “Ino mubwini simukoboma nguni”? (b) Mbuti muna Samariya mbwaakamugwasya muntu wakabbidwa, akuumwa alimwi akusiigwa kasuntukide? (Amubone cifwanikiso icili kumatalikilo aacibalo.)

3 Tulakonzya kuyeeya kuti simukoboma muntu ngotukkala limwi  munsi-munsi walo ngotuyanzana kapati alimwi mulongwe uugwasya. (Tus. 27:10) Pele amubone Jesu ncaakaamba ciindi muntu umwi iwakali kulibona kululama naakamubuzya kuti: “Ino mubwini simukoboma nguni?” Jesu wakaingula kwiinda mukupa cikozyanyo camuna Samariya uuli kabotu. (Amubale Luka 10:29-37.) Inga twayeeya kuti muna Israyeli amu Levi bakali kukonzya kuba bantu bali kabotu ciindi nobakabona muntu iwakabbidwa, kuumwa akucaala kasuntukide. Nokuba boobo, bakamweenguluka kakunyina kumucitila cintu cili coonse. Mwaalumi ooyu wakagwasyigwa amuna Samariya—bantu ibakali kulemeka Mulawo wa Musa pele ibakali kusulaikwa aba Juda.—Joh. 4:9.

4 Mukusola kuponya zilonda zyamuntu ooyu iwakaumwa, mu Samariya wakamutila mafwuta alimwi awaini. Madinari ngaakapa siŋanda yabeenzu akali kukonzya kubelekelwa kwamazuba obilo. (Mt. 20:2) Aboobo, ulalibonya muntu iwakaba simukobonyina mwini-mwini wamuntu ooyu iwakaumwa. Masimpe, cikozyanyo camuna Samariya ncaakaamba Jesu cituyiisya kuti tweelede kubafwida luzyalo akubayanda basimukoboma.

Babelesi ba Jehova balafwambaana kutondezya luyando kuli basimukobonyina (Amubone muncali 5)

5. Mbuti babelesi ba Jehova mbobakatondezya kuti balabayanda basimukobonyina ciindi nokwakacitika ntenda iilicitikila calino-lino?

5 Kanji-kanji, cilakatazya kujana bantu ibeetelela mbuli muna Samariya uuli kabotu. Eeci cili boobu nkaambo tuli “kumazuba aamamanino” ciindi bantu banji nobatajisi luyando lwakuzyalwa andulo, nobali bakali, alimwi batayandi bubotu. (2 Ti. 3:1-3) Mucikozyanyo, kulakonzya kubuka bukkale bukatazya ciindi nokwacitika ntenda iilicitikila. Amubone cakacitika ciindi noyakainda mvwula yaguwo iitegwa Hurricane Sandy mu New York City kumamanino aa October 2012. Mudolopo limwi imwakacitika ntenda, babbi bakajana coolwe cakubbida bantu ibakali kupenga akaambo kakubula magesi azintu zimbi ziyandika. Mudolopo ndimunya eeli, Bakamboni ba Jehova bakabikka bubambe bwalo ibwakabagwasya alimwi akugwasya bambi. Banakristo balacita zintu zili boobu nkaambo balabayanda basimukobonyina. Muunzila nzi zimbi motukonzya kutondezya luyando kuli basimukoboma?

MBOMUKONZYA KUTONDEZYA LUYANDO KULI BASIMUKOBONYOKO

6. Mbuti mulimo wesu mboweendelana akuba simukoboma mubotu?

6 Amubagwasye bantu kumuuya. Tulacita oobo kwiinda mukubagwasya kubikkila maano ‘kuluumbulizyo lwamu Magwalo.’ (Lom. 15:4) Cakutadooneka, ciindi notwaambila bamwi kasimpe kamu Bbaibbele mumulimo wesu wakukambauka tutondezya kuti tuli basimukobonyina babotu. (Mt. 24:14) Eelo kaka tulijisi coolwe cakwaambilizya mulumbe wa Bwami uuzwa kuli “Leza uupa bulangizi”!—Lom. 15:13.

7. Ino Mulawo Wabukkale Bubotu ninzi, alimwi mbuti mbotulongezyegwa kwiinda mukuutobela?

7 Amutobele Mulawo Wabukkale Bubotu. Mulawo ooyu ulaambidwe mumajwi ngaakaamba Jesu Mulumbe wakwe waa Cilundu, naakati: “Zyintu zyoonse nzimuyanda kuti bantu bamucitile, anywebo nzimweelede kubacitila. Eeci mubwini ncencico Mulawo azyakalembwa a Basinsimi ncozipandulula.” (Mt. 7:12) Ikuti katulanganya bantu bambi kweelana alulayo lwa Jesu, tucita zintu kweelana amakanze aa “Mulawo” (nkokuti bbuku lya Matalikilo kusika ku Deuteronomo) aa “Basinsimi” (nkokuti mabbuku aabusinsimi aali mu Magwalo aa Chihebrayo). Malembe aali boobu alatondezya kuti Leza ulabalongezya aabo ibatondezya luyando. Mucikozyanyo, kwiinda muli Isaya, Jehova wakaamba kuti: “Amubeteke kabotu akucita cabululami . . . Uli acoolwe muntu uucita obo.” (Is. 56:1, 2) Masimpe tulilongezyedwe nkaambo tucitila basimukoboma zintu caluyando alimwi cabululami.

8. Nkaambo nzi ncotweelede kubayanda basinkondoma, alimwi ncinzi cikonzya kucitika ikuti twacita oobo?

8 Amubayande basinkondonyoko. Jesu wakaamba kuti: “Mwakamvwa mbokwakaambwa  kuti: ‘Weelede kuyanda simukobonyoko akusula sinkondonyoko.’ Pele ndimwaambila kuti: Amuzumanane kuyanda basinkondonyoko akubapailila aabo bamupenzya, ikutegwa musinizye kuti muli bana ba Uso uuli kujulu.” (Mt. 5:43-45) Mwaapostolo Paulo awalo wakaamba kaambo kakozyenye naakalemba kuti: “Ikuti sinkondonyoko kafwide nzala, komupa cakulya; ikuti kafwide nyota, komupa cakunywa.” (Lom. 12:20; Tus. 25:21) Kweelana a Mulawo wa Musa, muntu wakaleelede kugwasya sinkondonyina kufwutula munyama wakwe iwawa ansi akaambo kakulemenwa. (Kul. 23:5) Kwiinda mukubelekela antoomwe munzila iili boobu, bantu ibakali basinkondonyina balakonzya kuba balongwe alimwi. Akaambo kakuti Banakristo balatondezya luyando, basinkondoma banji bacinca ncobeni myoyo yabo. Ikuti katubayanda basinkondoma—nobaba basikukazya basicinguni—tuyakukkomana twaakubona bamwi bambabo kabatambula kasimpe!

9. Ncinzi Jesu ncakaamba kujatikizya kubamba luumuno abakwesu?

9 “Amusungwaale kuyandaula luumuno abantu boonse.’’ (Heb. 12:14) Cakutadooneka, eeci cilabikkilizya abakwesu, nkaambo Jesu wakaamba kuti: “Lino ikuti uleta cipego cako kucipaililo kumane wayeeya kuti munyoko uli akaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya wapiluka utuule cipego cako.” (Mt. 5:23, 24) Leza uyakutulongezya ikuti twabayanda bakwesu alimwi akuti twafwambaana kubweza ntaamu kubamba luumuno ambabo.

10. Nkaambo nzi ncotuteelede kujanina bamwi milandu?

10 Tamweelede kujanina bambi milandu. Jesu wakaamba kuti: “Amuleke kubeteka kutegwa mutabetekwi, nkaambo lubeta ndomubetesya, ndomuyoobetesyegwa andinywe, acipimyo ncomubelesya kupimina bamwi, ncobayoobelesya kumupimina andinywe. Aboobo, ino nkaambo nzi ncolanga kakwa kali muliso lyamunyoko pele tobikkili maano kutanda lili muliso lyako? Naa, ino mbuti mbonga waambila munyoko kuti, ‘Atubone ndigusye kakwa kali muliso lyako,’ kakuli muli tanda muliso lyako? Osikuupaupa ameso! Kosaanguna kugusya tanda muliso lyako, mpoonya ulabona kabotu mbonga wagusya kakwa kali muliso lyamunyoko.” (Mt. 7:1-5) Eeyi ninzila mbotu kaka iitondezya kuti tatweelede kulangaula tulandu tusyoonto-syoonto muli bamwi kakuli swebo tujisi milandu mipati!

 NZILA YAALUBAZU YAKUTONDEZYA LUYANDO KULI BASIMUKOBOMA

11, 12. Muunzila nzi iilibedelede motutondezya kuti tulabayanda basimukoboma?

11 Tuyanda kutondezya kuti tulabayanda basimukoboma munzila iilibedelede. Mbubwenya mbuli Jesu, tulakambauka makani mabotu aa Bwami. (Lk. 8:1) Jesu wakalailila basikwiiya bakwe ‘kugwasya bantu bamisyobo yoonse kuba basikwiiya.’ (Mt. 28:19, 20) Kwiinda mukucita lubazu lwesu mukuzuzikizya mulimo ooyu, tusola kugwasya basimukoboma kutegwa basiye nzila iikwazeme alimwi mpati iitola kulunyonyooko akunjila munzila nsyoonto iitola kubuumi. (Mt. 7:13, 14) Tacidoonekwi buya kuti Jehova ulakulongezya kusoleka kuli boobu.

12 Mbubwenya mbuli Jesu, tugwasya bantu kuzyiba kuti bayandika zintu zyakumuuya. (Mt. 5:3) Kuli baabo ibazumina, tulabagwasya kucita oobo kwiinda mukubandika ambabo “makani mabotu aa Leza.” (Lom. 1:1) Aabo ibautambula mulumbe wa Bwami balayanzanizyigwa a Leza kwiinda muli Jesu Kristo. (2 Ko. 5:18, 19) Aboobo, kwiinda mukukambauka makani mabotu, tutondezya ncobeni kuti tulabayanda basimukoboma munzila iiyandika kapati.

13. Mbuti mbomulimvwa kujatikizya kutola lubazu mumulimo uulibedelede wakukambauka Bwami?

13 Kwiinda mukucita nyendo zyakupilukila zigwasya akusololela ziiyo zya Bbaibbele, tulakkutila akaambo kakugwasya bantu kuti kabapona kweelana azyeelelo zya Leza ziluleme. Eeci cilakonzya kupa kuti sikwiiya Bbaibbele acince bukkale bwakwe. (1 Ko. 6:9-11) Masimpe, cilakkomanisya kubona Leza mbwabagwasya aabo ‘ibalibambilide kutambula buumi butamani’ kabacinca bukkale alimwi akuba balongwe ba Leza. (Mil. 13:48) Muciindi cakuba bantu batajisi bulangizi, baba bantu bakkomene alimwi amuciindi cakulibilika, baba bantu bajisi lusyomo muli Taateesu wakujulu. Eelo kaka cilakkomanisya kubona mbobayaabukomena kumuuya aabo bapya! Sena tamuciboni kuba coolwe kutondezya luyando munzila yaalubazu kuli basimukoboma mbotuli bakambausi ba Bwami?

BUPANDULUZI BWALUYANDO IBWAKASOLOLELWA AMUUYA

14. Mumajwi aanu, amwaambe bube bumwi bwaluyando ibwaambidwe mulugwalo lwa 1 Bakolinto 13:4-8.

14 Ciindi notucita zintu abasimukoboma, kutobela lulayo ndwaakalemba Paulo kujatikizya luyando kulakonzya kucesya mapenzi, calo cikonzya kupa kuti tukkomane alimwi tulongezyegwe a Leza. (Amubale 1 Bakolinto 13:4-8.) Atulange-lange mubufwaafwi Paulo ncaakaamba kujatikizya luyando alimwi akubona mbotukonzya kutobela majwi aakwe kujatikizya cilongwe cesu abasimukoboma.

15. (a) Nkaambo nzi ncotweelede kukkazika moyo akuba aluzyalo? (b) Ntwaambo nzi tutondezya kuti tatweelede kuba aabbivwe akulidunda?

15 “Luyando lulakkazyika moyo alimwi luli aluzyalo.” Mbubwenya Leza mbwatondezya kukkazika moyo aluzyalo munzila njacita zintu abantu batalondokede, andiswe tuyandika kukkazika moyo akuba aluzyalo ciindi bamwi nobatulubizyila alimwi anobaamba cakutayeeya kabotu, andiza buya akuba bakali. “Luyando talukwe bbivwe,” aboobo luyando lwini-lwini luyakutupa kuti tutanyomeneni zintu nzyobajisi bamwi naa zyoolwe nzyobajisi mumbungano. Kuyungizya waawo, ikuti katujisi luyando, tatukalidundi naa kulisumpula. Kayi, “meso aalikankaizya amoyo uulisumpula, ilampi lyabasizibi, zyoonse nzibi.”—Tus. 21:4.

16, 17. Mbuti mbotukonzya kucita kweelana alugwalo lwa 1 Bakolinto 13:5, 6?

16 Luyando luyakutupa kuti katulilemeka kabotu kuli basimukoboma. Tatukababeji, tatukababbidi, naa kucita cintu cili coonse cikonzya kutupa kusotoka njiisyo amilawo ya Jehova. Luyando alimwi luyakutugwasya kutabikkila buyo maano kuzintu nzyotuyandika muciindi cakubikkila maano kuzintu nzyobayanda bamwi.—Flp. 2:4.

 17 Luyando lwini-lwini lulamuka kukalala alimwi “talubikkilili,” mbuli kuti twakali kulemba buya zibi mubbuku ciindi bamwi nobakatulubizyila. (1 Te. 5:15) Ikuti katubikkilila, takatukkomanini Jehova, ciyakuba mbuli kuyasya mulilo iwali kusuka buyo busi, calo cikonzya kupa kuti tulicise akucisa bamwi. (Lev. 19:18) Luyando lupa kuti tukakkomanine kasimpe, pele talukatupi ‘kukkomanina kutalulama,’ nokuba kuti muntu uutusulide wapenzyegwa naa tanaacitilwa bululami.—Amubale Tusimpi 24:17, 18.

18. Ncinzi ncotwiiya kujatikizya luyando kuzwa mulugwalo lwa 1 Bakolinto 13:7, 8?

18 Amulange alimwi Paulo mbwalupandulula luyando. Wakaamba kuti luyando “lulajatila zyintu zyoonse.” Ikuti umwi watulubizyila mpoonya walomba kuti tumulekelele, luyando luyakupa kuti tumulekelele. Luyando “lulasyoma zyintu zyoonse” izili mu Jwi lya Leza alimwi akutupa kuti katulumba cakulya cakumuuya ncotutambula. Luyando “lulalangila zyintu zyoonse” zilembedwe mu Bbaibbele akutupa kujana twaambo tumwi twakubeda abulangizi. (1 Pe. 3:15) Alimwi tulapaila akuba aabulangizi bwakuti zintu zileenda kabotu ciindi notuli mubukkale bukatazya. Luyando “lulaliyumya muzyintu zyoonse,” nokuba kuti zintu eezyo inga kazili zibi nzyobatulubizyila bamwi, kupenzyegwa, naa ciindi notuli mumasunko. Kuyungizya waawo, “luyando talumani.” Bantu bamvwida bayakuzumanana kutondezya luyando kukabe kutamani.

AMUZUMANANE KUBAYANDA BASIMUKOBONYOKO MBULI MBOMULIYANDA

19, 20. Ndulayo nzi lwamu Magwalo ilweelede kutupa kuzumanana kutondezya luyando kuli basimukoboma?

19 Kwiinda mukutobela lulayo lwamu Bbaibbele, tulakonzya kuzumanana kutondezya luyando kuli basimukoboma. Luyando luli boobu lujatikizya bantu boonse, ikutali bantu bamusyobo wesu pe. Alimwi tweelede kuyeeya ncaakaamba Jesu kuti: “Weelede kuyanda simukobonyoko mbubonya mbuli mboliyanda omwini.” (Mt. 22:39) Leza alimwi a Jesu balangila kuti katubayanda basimukoboma. Ikuti katutazyi cakucita kujatikizya kaambo kamwi kajatikizya basimukoboma, atupaile kuti Leza atusololele amuuya uusalala. Ikuti twacita oobo, Jehova uyakutulongezya akutugwasya kucita zintu munzila iitondezya luyando.—Lom. 8:26, 27.

20 Mulawo wakuti tuyande basimukoboma mbuli mbotuliyanda tobeni wiitwa kuti “mulawo wamwami.” (Jak. 2:8) Naakamana kwaamba milawo imwi ya Mulawo wa Musa, Paulo wakaamba kuti: “Milawo imbi iili yoonse iiliko, ilaambwa mumajwi masyoonto aaya aakuti: ‘Weelede kuyanda simukobonyoko mbubonya mbuli mboliyanda omwini.’ Uuyanda simukobonyina takonzyi kumubisizya; aboobo luyando ndoluzuzikizya mulawo.” (Lom. 13:8-10) Aboobo, tweelede kuzumanana kubayanda basimukoboma.

21, 22. Nkaambo nzi ncotweelede kumuyanda Jehova alimwi abasimukoboma?

21 Ciindi notuzinzibala kuyeeya kujatikizya kaambo ncotweelede kubayanda basimukoboma, inga cainda kubota kuyeeya majwi aa Jesu aakuti Usyi “ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.” (Mt. 5:43-45) Tweelede kutondezya luyando kuli basimukoboma, tacikwe makani naa baliluleme naa pe. Mbuli mbokwatondezyegwa kale musyule, nzila yiinda kubota yakutondezya luyando nkwiinda mukutola lubazu mukwaambila basimukoboma mulumbe wa Bwami. Eelo kaka kuli zilongezyo zinji kuli basimukoboma ikuti baswiilila makani mabotu akulumba ncobeni!

22 Tulijisi twaambo tunji twakuyanda Jehova kakunyina akudooneka. Alimwi kuli nzila zinji zyakutondezya luyando kuli basimukoboma. Kwiinda mukutondezya luyando kuli Leza akuli basimukoboma, tutondezya kuti tulaalemeka majwi ngaakaamba Jesu kujatikizya zintu ziyandika kapati. Kwiinda zyoonse, tukkomanisya Taateesu siluyando, Jehova.